Ka dura li, alguns líder di mundu interu, sientistas i pesoas ki ta trabadja ku tekinolojia pâpia sobri puder ki intilijénsia artifisial (IA) ten. Enbóra es ta rekonhese valor ki el ten, es mostra ma es sta preokupadu ku kuzê ki pode ben kontise si el ka uzadu dretu.

•   “Intilijénsia artifisial é un di kes tekinolojia ki ten más puder oji. El ten puder di midjora vida di algen. . . Má omésmu ténpu, el ten puder di poi suguransa di pesoas na prigu, di viola direitu i privasidadi di pesoas i kaba ku kunfiansa ki pesoas ten na demokrasia.” — Kamala Harris, visi-prizidenti di Mérka, 4 di maiu di 2023.

•   Dotor Frederik Federspiel, djuntu ku un grupu di dotoris i di spesialistas na ária di saúdi, skrebe: “Enbóra ta fladu ma intilijénsia artifisial ta ben djuda txeu na ária di saúdi, tanbê ta parse ma el pode ben prujudika nos saúdi di txeu manera”. — Publikadu na dia 9 di maiu di 2023, na un artigu na revista BMJ Global Health. a

•   “Pesoas dja sta ta uza intilijénsia artifisial pa spadja informasons falsu. Na futuru, txeu algen pode perde ses trabadju pamodi intilijénsia artifisial. Alguns algen ki ta trabadja ku tekinolojia sta txeu preokupadu ma na futuru intilijénsia artifisial pode ser un prigu pa pesoas na mundu interu.” — The New York Times, 1 di maiu di 2023.

 Ku ténpu, nu ta ben konsigi odja si pesoas ta ben uza intilijénsia artifisial pa djuda-nu ô pa prujudika-nu. Kuzê ki Bíblia ta fla?

 Bíblia ta mostra pamodi ki pesoas ka ta konsigi da-nu serteza ma kes kuza ki dja es faze pa midjora tekinolojia ta ben uzadu sô pa faze kuzas dretu.

1.  1. Sikrê pesoas pode ten bon intenson, talvês es ka ta konsigi odja kes mau rezultadu ki kuzas ki es ta faze pode ben ten.

   •   ‘Ten un kaminhu ki ómi ta atxa ma é dretu, má na fin el ta leba pa mórti.’ — Provérbios 14:12.

2.  2. Un algen ka ta konsigi kontrola si otus algen ta ben uza se trabadju di manera dretu ô mariadu.

   •   ‘N ten ki dexa nha trabadju pa kel algen ki ta ben dipôs di mi. I kenha ki ta fla si kel algen ta ben ser sábiu ô tolu? Di kalker manera, el ta ben toma kónta di tudu kes kuza ki N ranja duránti nha vida ku txeu sforsu i sabedoria.’ — Eclesiastes 2:18, 19.

 Kes kuza li ta djuda-nu odja pamodi ki nu meste di orientason di nos Kriador.

 Nos Kriador promete ma nunka el ka ta ben dexa pesoas ô algun tekinolojia ki algen faze pa distrui téra ô kes algen ki ta vive na el.

•   ‘Téra ta fika pa tudu ténpu.’ — Eclesiastes 1:4.

•   ‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.

 Nos Kriador ta uza Bíblia pa da-nu orientason ki ta djuda-nu ben ten pas i suguransa na futuru. Pa bu sabe más sobri kuzê ki Bíblia ta fla, lé artigus “Kuzê ki pode djuda-nu ten un futuru midjór?” i “Bu pode spéra un futuru midjór”.