Un rilatóriu di Nasons Unidu ta fla ma:

•   Di dia 7 ti 23 di otubru di 2023, géra entri Israel ku Gaza mata más di 6.400 algen i 15.200 panha pankada. Maioria di es éra algen inosenti. Alén di kel-li, milharis di algen tevi ki sai di ses kaza.

•   Ti dia 24 di setenbru di 2023, géra entri Rúsia ku Ukránia mata 9.701 algen i 17.748 panha pankada na Ukránia.

 Ki speransa Bíblia ta da pa kes algen ki sta ta sufri pamodi géra?

 Bíblia ta fla ma Deus ta ben ‘kaba ku géra na Téra interu.’ (Salmo 46:9) El ta ben uza un govérnu ki sta na séu, ô un reinu, pa ben fika na lugar di tudu govérnus di ómi. (Daniel 2:44) Reinu di Deus ta ben traze pas pa tudu algen na téra.

 Odja kuzê ki Jizus Kristu, ki é Rei di Reinu di Deus, ta ben faze:

•   ‘El ta ben salva kes algen póbri ki ta sta ta txora ta pidi ajuda, i tanbê kes algen umildi i tudu kes ki ka ten algen pa djuda-s. El ta xinti péna di koitadu i di póbri, i el ta salva vida di algen póbri. El ta libra-s di abuzu i di violénsia, i ses sangi ta ten txeu valor pa el.’ — Salmo 72:12-14.

 Através di se Reinu, Deus ta ben kaba ku tudu mizéria i sufrimentu ki ten pamodi géra i violénsia.

•   “El ta ben linpa tudu lágua di ses odju, i ka ta ben ten más mórti, nen tristéza, nen txoru nen dór. Kes kuza ki tinha antis ka ta ben ten más.” — Apokalipse 21:4.

 Falta poku pa Reinu di Deus ben aji i toma kónta di téra. Bíblia dja flaba di “géra i di notísias di géra” ki nu sta ta odja oji. (Mateus 24:6) Kes-li i otus kuza ta mostra ma nu sta vive na “ténpu di fin”. — 2 Timótiu 3:1.