Notísias oji ta pâpia txeu di pesoas ki sta fla kuzas ki ta mostra ódiu ô ki ta faze violénsia pamodi diskriminason, di pesoas ki ta prujudika otus algen pamodi ses rasa, i di géra.

•   “Pamodi géra entri Israel i Gaza, i pesoas ki ta pâpia kóntra govérnus, konbérsus ki ta mostra ódiu dja spadja na redi sosial.” — The New York Times, 15 di novenbru di 2023.

•   “Désdi 7 di otubru, na mundu interu sta ta ten kada bês más ódiu, i konbérsus i krimis pamodi ódiu. Kes kuza li ta dexa pesoas preokupadu.” — Dennis Francis, prizidenti di Asenbleia Jeral di Nasons Unidu, 3 di novenbru di 2023.

 Konbérsu ki ta mostra ódiu, violénsia i géra é ka un kuza novu. Na verdadi, Bíblia ta pâpia di pesoas na pasadu ki ‘ponta palavras kruel sima flexas,’ i ki gostaba di géra i violénsia. (Salmo 64:3; 120:7; 140:1) Má Bíblia ta mostra ma kel ódiu ki nu sta odja oji ten un siginifikadu inportanti.

 Bíblia ta splika pamodi ki ten txeu ódiu oji. Odja dôs motivu:

1.  1. Dja el flaba di un ténpu ki “amor di maioria di algen ta ben [friaba].” (Mateus 24:12) Envês di amor, pesoas ta ben tinha konportamentus ki ta mostra ódiu. — 2 Timótiu 3:1-5.

2.  2. Kel tantu ódiu ki ten oji ta mostra kel influénsia mau di Satanás ki é Diabu. Bíblia ta fla ma “mundu interu sta na puder di Malvadu.” — 1 Juan 5:19; Apokalipse 12:9, 12.

 Má, Bíblia ta fla ma ka ta dura Deus ta ben kaba ku tudu kuza ki ta traze ódiu. Tanbê el ta ben kaba ku tudu sufrimentu pamodi ódiu. Bíblia ta promete:

•   Deus “ta ben linpa tudu lágua di ses odju, i ka ta ben ten más mórti, nen tristéza, nen txoru nen dór. Kes kuza ki tinha antis ka ta ben ten más.” — Apokalipse 21:4.