NU MANTE SIENTI!
Violénsia kóntra pulítikus — Kuzê ki Bíblia ta fla?
Violénsia kóntra pulítikus sta ta spadja na mundu.
Na kanpanha di 2023 i 2024 na Méxiku matadu 39 kandidatu, ki nunka ka kontiseba, i tevi otus fórma di violénsia kóntra pulítikus.
Na Europa ka dura li, tevi txeu kazu di violénsia kóntra pulítikus i kel-li ta inklui kantu es tenta mata primeru ministru di Slovákia na dia 15 di maiu di 2024.
Mérka fika dimiradu pamodi na dia 13 di julhu di 2024 es tenta mata Donald Trump, ki antis éra prizidenti.
Pamodi ki ten txeu violénsia kóntra pulítikus na mundu? Algun dia el ta ben kaba? Kuzê ki Bíblia ta fla?
Bíblia dja flaba ma ta ben tinha divizon na pulítika
Bíblia dja flaba ma na nos ténpu, ki el ta txoma di “ténpu di fin,” txeu algen ta tinha manera di ser ki ta poi violénsia i diskuson ta bira más txeu.
“Na ténpu di fin situason ta fika konplikadu i difísil di aguenta. Pamodi ómis ta ben... ser ingratu, disleal, ... ka ta krê konkorda ku otus, ... runhu, ... traidor, temozus, xeiu di orgulhu”. — 2 Timótiu 3:1-4.
Tanbê Bíblia dja flaba ma na nos ténpu ta ben tinha dizórdi sima revólta i konfuzon na pulítika. (Lukas 21:9, nóta di rodapé) Má, violénsia kóntra pulítikus i divizon ka ta kontinua pa tudu ténpu.
Violénsia kóntra pulítikus ta ben kaba
Bíblia ta splika ma Deus ta ben troka tudu govérnu di ómi pa se govérnu na séu.
‘Deus di Séu ta ben traze un reinu ki... ta ben disfaze i el ta ben kaba ku tudu kes otu reinu, i sô el ta ben fika pa tudu ténpu’. — Daniel 2:44.
Reinu di Deus ta ben poi pesoas ta fika unidu di verdadi i el ta ben poi pas na mundu interu.
Se Rei, ki é Jizus Kristu, ta txomadu di ‘Prínsipi di Pas’ i el ta ben garanti ma ‘pas ka ta ten fin’. — Isaías 9:6, 7.
Désdi gósi, kes algen ki ta apoia kel govérnu li sta ta prende modi ki es ta vive na pas. Pur isu, Bíblia ta fla: ‘Es ta transforma ses spada na aradu, i ses lansa na kuzas pa poda. Nason ka ta labanta spada kóntra kel otu nason, nen es ka ta prende géra más.’ — Isaías 2:3, 4.
Pa prende más, lé artigu “Kuzê ki Reinu di Deus ta ben faze?” i odja vídiu Kuzê ki é Reinu di Deus?