Bu sta ta ten difikuldadis pa vive pamodi krizi di dinheru? Duénsas ki ta spadja faxi, dizastris na naturéza, instabilidadi na govérnu i géras pode traze txeu prubléma di dinheru. Fika sen dinheru di un óra pa kel otu pode traze txeu preokupason. Má na Bíblia bu pode atxa konsedjus ki ta djuda-u vive ku ménus dinheru.

 Konsedju di Bíblia: ‘N prende lida. . . ku txeu kuza i ku sta sen nada.’ — Filipenses 4:12.

 Sikrê bu ten ménus dinheru gósi, bu pode prende vive ku kel novu situason. Ta ser más fásil pa bo ku bu família lida ku kel situason li, si nhos seta faxi ma kuzas muda i nhos sforsa pa vive di akordu ku nhos situason.

 Djobe si govérnu sta ta da algun ajuda ki bu pode resebe. Faze kel-li faxi pamodi txeu bês es ta da poku ténpu pa algen da nómi pa resebe ses ajuda.

 Konsedju di Bíblia: ‘Planus ta fadja óras ki ka ten kumunikason, má ku konsedju di txeu algen ta ten bons rezultadu.’ — Provérbios 15:22.

 Pâpia sobri kel situason li ku bu mudjer i ku bus fidju. Óras ki tudu algen na família ntende kuzê ki sta pasa, ta ser más fásil pa es apoia kalker mudansa ki nhos meste faze. Óras ki tudu algen ta sforsa pa popa i ka dexa kuzas ta straga, dinheru ta rende más.

 Konsedju di Bíblia: ‘Xinta primeru i faze kónta’. — Lucas 14:28.

 Óras ki bu ten poku dinheru, é más inportanti inda bu sabe modi ki bu sta gasta tudu bu dinheru. Primeru, skrebe kantu dinheru ki bu sta spéra resebe na kel mês. Dipôs, skrebe tudu dispéza ki bu ten, sikrê es pode muda dipôs. Si ta da, tudu mês, tenta guarda algun dinheru pa algun imerjénsia ô kuzas ki bu ka sta spéra.

 Un ideia: Óras ki bu sta faze kónta di bus dispéza, ka bu skese di inklui tanbê kes kuza ki bu ta gasta poku dinheru. Bu pode fika dimiradu di odja kantu dinheru ki bu ta gasta ku kuzas pikinoti. Pur izénplu, un ómi diskubri ma tudu anu el ta gastaba senténas di dóla sô ku xuinga!

 Konsedju di Bíblia: ‘Nhos konfirma kuzê ki é más inportanti’. — Filipenses 1:10.

 Konpara dinheru ki bu ten ku kel ki bu ta gasta, djobe kuzê ki bu meste gasta ménus dinheru ku el ô ti mésmu ki bu ka meste, pa bu pode vive ku kel dinheru ki bu ta ganha gósi. Pensa na kes izénplu li:

•   Transpórti. Si bu ten más ki un karu, bu ta pode bende un di es? Bu ta pode troka bu karu pa un ki ta gasta ménus? Bu pode anda na transpórti pa públiku, na bisikléta ô ti mésmu ku pé?

•   Diverson. Bu pode dexa di uza pa un ténpu kanal di tilivizon ki bu ta paga pa es ô sites i aplikativus di filmi ku múzika? Dja bu pensa na otus manera di divirti ki ta fika más baratu? Pur izénplu, na un bibliotéka na bu zóna, bu pode atxa livrus ô filmis pa nprista, sen paga nada.

•   Dispézas di kaza. Pâpia ku bu família sobri kuzê ki nhos pode faze pa popa agu, lus i gas. Ka dexa lánpida sendedu sen nisisidadi i toma banhu más faxi pode parse poku, má ta djuda popa dinheru.

•   Kumida. Envês di ba kume na restoranti, faze bu kumida na kaza. Pensa na kuzê ki bu sta ba kuzinha. Si ta da kunpra i kuzinha kumida más txeu i guarda kel ki resta. Faze un lista di kónpra antis di bu bai lója asi bu ka ta kunpra kuzas ki bu ka meste. Kunpra frutas i verduras frésku na undi bu ta mora, ki ta kustuma ser más baratu. Ivita kume kumida ki é ka bon pa saúdi. Talvês bu pode faze un órta pikinoti na bu kaza.

•   Ropa. Ka bu kunpra ropa sô pa sigi móda má kunpra óras ki bu meste. Tenta kunpra ropa ki sta más baratu ô kes ki é uzadu má ki sta dretu. Sénpri ki da, seka bus ropa na sól. Asi bu ta ivita uza mákina di seka ropa ki ta gasta txeu lus.

•   Kónpra. Antis di bu kunpra algun kuza, primeru pensa na kes pergunta li: “N ta pode kunpra kel kuza li? N ta meste-l?” Bu ta pode spéra más un ténpu pa troka bu karu ô bu telemóvel pa un más novu? Kuzê ki bu ta atxa di bende alguns kuza ki bu ka sta uza más? Asi bu ta ten un vida más sinplis i inda bu ta ganha algun dinheru.

 Un ideia: Si bu tene poku dinheru, pruveta kel xansi li pa larga alguns ábitu mariadu ki ta faze mal pa saúdi i ki ta gasta dinheru. Sima fuma, djuga pa ganha dinheru i bebe dimás. Larga kes ábitu mariadu ta djuda-u popa dinheru i midjora bu saúdi.

 Konsedju di Bíblia: ‘Filís é kes ki ten konsénsia ma es ten nisisidadi spritual’. — Mateus 5:3.

 Bíblia ta da-nu kel konsedju li: ‘Pamodi sabedoria é un proteson sima dinheru é un proteson. Má vantaji di konhisimentu é kel-li: sabedoria ta proteje vida di kel algen ki ten el.’ (Eclesiastes 7:12) Nu pode atxa kel sabedoria li na Bíblia. Txeu algen diskubri ma konsedjus di Bíblia ta djuda na asuntus ki ten aver ku dinheru i ta djuda-nu ivita fika preokupadu ku kuzas ki ka meste. — Mateus 6:31, 32.