Cecil éra un irmon umildi i el ta inportaba txeu ku otus algen. Se izénplu, izénplu di nha mai i di otus irmon ku irmans fiel di nha kongregason, pô-m ta ten “dizeju... pa aji”, ô pa da nha midjór pa Jeová. (Filipensis 2:13) Dexa-m konta nhos nha stória.

 N nase na anu di 1943. Nha pai ku nha mai ta moraba na un kaza na kanpu, pértu di sidadi di Bundaberg, na Queensland, na Austrália. La é un lugar ki ten txeu kana di asukra. Kes algen di kel zóna ta kustumaba bai pa sidadi tudu sábadu di noti pa es bai konvive ku kunpanheru. Na un sábadu, na anu di 1939, nha pai ku nha mai konxe dôs pioneru (Tistimunhas di Jeová ki ta prega pa ténpu interu) ki pâpia ku es sobri Bíblia. Kel ki es prende toka ses korason, i ku ténpu es bira Tistimunhas di Jeová. Pur isu mi ku nha irman, Jean, nu kriadu na un família ki ta sirbi Deus. Infilismenti, nha pai móre kantu ki el kai di skada na kaza. N tinha sô 7 anu i se mórti mexe txeu ku mi. Má, inda N ta lenbra dretu ma el éra un ómi trabadjador i ki gostaba di poi otus algen ta ri. N ten txeu vontadi di odja-l otu bês na resureison i konxe-l más dretu! — Atus 24:15.

 Nha mai ta trataba otus algen ku bondadi i el éra ikilibradu. El ta dexaba nos avontádi pa nu fla-l si nu gostaba ô nu ka gostaba di un kuza. Má, el éra firmi óras ki éra kuzas ki tinha aver ku prinsípius di Bíblia i adorason pa Jeová. Sénpri nu ta sistiba runion, i nha mai ta flaba nos pa nu ka pasa txeu ténpu dipôs di skóla ku nos koléga ki ka éra Tistimunha di Jeová. (1 Koríntius 15:33) Óras ki N ta pensa na kel-li, N ta xinti txeu gratidon pamodi se firméza.

 Nha mai éra un publikadora ki tinha txeu zelu, i txeu bês el ta staba di pioneru di féria (ki gósi ta txomadu di pioneru ajudanti). N ta lenbra ma el ta kustuma vizitaba más di 50 kaza pa intrega revista Sentinéla i Nhos korda!. Mésmu kantu dja el staba algen grandi i se saúdi staba fraku, el kontinua ta preokupa ku kes algen ki ta mostraba interesi pa verdadi. El tinha txeu amor pa otus algen, i prinsipalmenti pa se fidjus, pur isu nu ta amaba el txeu i nu sforsa pa nu imita se izénplu. Na anu di 1958, kantu N tinha 14 anu, N da nha vida pa Jeová i N batiza.

 Poku ténpu dipôs ki N batiza, Rudolf, ki éra un jóven di nos kongregason ki tinha uns 20 anu batiza tanbê. El muda di Alimanha pa Austrália. Tudu sábadu di palmanhan, mi ku Rudolf txeu bês nu ta pregaba pa kes algen ki staba xintadu na karu ta spéra kes algen di ses família ki ba fazeba kónpra.

 Rudolf éra un irmon ki tinha txeu zelu i el konvida-m pa N sirbi di pioneru ku el duránti kes féria di skóla. Un bês nu pasa 6 simana djuntu na sidadi di Gladstone, ki ta fikaba uns 190 kilómetru (118 milha) pa nórti di Bundaberg. Kel manera ki Rudolf djuda-m sima un irmon más grandi i kel alegria ki N xinti kantu N staba pioneru di féria, pô-m ku dizeju di ser pioneru fíksu. Kantu N tinha 16 anu, N alkansa nha méta i N staba disididu na uza nha vida pa ténpu interu na sirvisu di Jeová.

 Nha primeru diziginason di pioneru foi na Mackay, ki éra un sidadi pértu di mar, na nórti di Bundaberg, i ki ta fikaba pértu di Grandi Barera di Koral. Dipôs di más ô ménus un anu, kantu N tinha 17 anu, N diziginadu pioneru spesial a na interior di Austrália, na un zóna ki tinha poku algen ta moraba la. Nha kunpanheru di pregason éra un irmon skodjedu ku spritu santu, ki txomaba Bennett (Ben) Brickell, ki ta lebaba mi más di 30 anu. b Foi un grandi priviléjiu trabadja ku kel irmon li ki tinha txeu spiriénsia i ki txeu algen ta atxaba ma éra un di kes midjór pioneru!

 Nos tiritóriu ta fikaba na Queensland na un zóna pértu di Golfu di Karpentária. Na kel ténpu, mi ku Ben éra úniku Tistimunhas di Jeová na kel tiritóriu, ki tinha poku algen ta moraba la. Alvês nu ta konduziba alguns óra di un kaza ti txiga na kel otu kaza. Timenti nu ta staba ta viaja di karu, na kes strada xeiu di téra, Ben ta kontaba mi txeu spiriénsia ki el pasa pa el na pregason. Un di kes spiriénsia éra kantu el ta uzaba karus di son c na pregason duránti Sugunda Géra Mundial, kantu óbra di Tistimunhas di Jeová na Austrália staba proibidu.

 Dipôs di pasa un dia interu na pregason, nu ta djobeba un lugar trankuilu pa nu pasaba noti. d Pa nu fazeba janta, nu ta panhaba lenha i nu ta fazeba un fogera. Pa N durmiba N ta uzaba un lansol, ki ka ta dexa agu pasa i ki N ta poba na txon, i tanbê N uzaba uns kobertor i un trabiseru. Ti inda N ta lenbra di modi ki N ta fikaba dimiradu ku puder di Jeová óras ki N ta odjaba pa séu xeiu di stréla, sen lus di eletrisidadi.

 Na kel tiritóriu li txeu izoladu, éra prigozu un karu straga. Un bês, eixu di karu kebra. Éra un dia kenti i nu tinha poku agu. Pa troka eixu di kel karu, Ben tevi ki panha buleia ti sidadi di Klonkuri. N fika três dia ku karu. Duránti kes dia, alguns kondutor ki staba ta pasa mostra-m bondadi i es da-m agu. Un ómi da-m tanbê un livru uzadu i el fla: “Lé kel livru li, nha amigu. El pode djuda-u.” N fika dimiradu di odja ma enbóra kel livru ka éra di nos organizason, el ta kontaba spiriénsia di Tistimunhas di Jeová na kes kanpu di konsentrason nazista!

 Mi ku Ben nu sirbi di pioneru djuntu duránti kuazi un anu. Últimu kuza ki el fla-m kantu nu staba ta dispidi di kunpanheru foi: “Nha manu, kontinua ta luta pa bu mante fiel.” Se izénplu di zelu i di fórti amor pa Jeová da-m más forsa pa nunka N ka dexa nha sirvisu pa ténpu interu.

 Dipôs di sirbi di pioneru duránti alguns anu na interior di Austrália, N konvidadu pa N sirbi di enkaregadu di grupu di kongregason. Kel-li ta involve pasa un simana ô más ku kada kongregason i kes grupu izoladu di un grupu di kongregason. Duránti kes anu, N sirbi na kuatu grupu di kongregason, ki ta inkluiba kongregasons na Queensland i na Nova Gales di Sul. Dipôs, na anu di 1971, kontise un kuza ki N ka staba ta spera. N tevi priviléjiu di kursa turma nunbru 51 di Skóla di Jiliádi, ki é un skóla pa misionárius Tistimunhas di Jeová, ki ta fazedu na Nova Iórki. Kes sinku mês konsentradu ta studa Bíblia, i pasa ténpu sábi djuntu ku kes alunu i instrutoris pripara-m pa nha prósimu diziginason, ki éra trabadju di misionáriu na Taiuan.

 Na nha turma diziginadu 9 algen pa Taiuan. Un di es éra irmon Ian Brown, di Nova Zilándia, ki diziginadu pa sirbi djuntu ku mi. Nu ka sabia kuazi nada sobri Taiuan. Nu ka sabia nen undi ki el ta fikaba ti kantu nu odja na un mapa.

 N ka ta konsigi pensa na dôs lugar ki é txeu diferenti di kunpanheru, sima interior di Queensland i Taiuan! Nos primeru i kel más grandi dizafiu foi prende língua xinês. Duránti algun ténpu, N ka staba ta konsigi intende kuzê ki staba ta fladu na runion, ki é undi nu ta prende kes kuza pa nu mante nos fé fórti. Tanbê, nen N ka ta konsigi papiaba dretu ku nhas irmon ku irmans. Kel situason li djuda mi ku Ian da más valor pa kel trenamentu i konhisimentu ki nu resebe na Jiliádi. Kel trenamentu, djuntu ku studu di Bíblia i orason di korason, djuda-nu mante nos amizadi fórti ku Jeová. Enbóra nu ka staba ta konsigi pâpia dretu ku nos irmon ku irmans, nu xinti inkorajadu di odja ses amor pa nos i pa Jeová.

 Dipôs ki nu txiga na Taiuan, tudu kes misionáriu faze un kursu di xinês na poku ténpu i ku txeu informason. Nos profesóra éra un irman di Austrália ki txomaba Kathleen Logan, e ki formaba na turma nunbru 25 di Skóla di Jiliádi. Nu staba txeu konsentradu na prende kel língua, i nu kumesa lógu ta poi na prátika kes kuza ki nu staba ta prende. Na nos primeru dia di pregason, mi ku Ian nu dikora un aprizentason pikinoti. Kantu nu staba ta bai pa tiritóriu, nu kumesa ta pâpia sobri kal di nos ki debe papiaba na kel primeru kaza. Dja ki mi éra más bédju ki Ian, N fla-l ta brinka ma dja N disidiba ma éra el ki ta papiaba primeru. Kel algen ki abri pórta éra un ómi xinês ki staba ben bistidu. Ku paxénxa el obi aprizentason di Ian, ki éra un mistura di inglês ku xinês. Dipôs nu fika spantadu kantu el pergunta-nu na inglês kuzê ki nu kreba! Nu kontinua ta pâpia ku el i na fin di nos konbérsu, el inkoraja-nu pa nu ka dizisti di prende xinês. Kes palavra ki el fla-nu ku bondadi da-nu koraji pa nu “kontinua ta luta”, sima Ben ta flaba.

 Nos tiritóriu éra un bon párti di sidadi di Taipé, ki é kapital di Taiuan. Dja ki tinha poku Tistimunhas di Jeová na kel sidadi, maioria di kes algen nunka ka obiba mensajen di Reinu. Má kel-li ka pô-nu ta fika dizanimadu, i nu kumesa ta prega ku zelu. Na kel ténpu nu ta kustuma dexaba senténas di revista pa mês. Na verdadi, alguns algen toma kes revista sô pa es sabeba kenha ki nos éra i kuzê ki nu krê flaba! Má simé, nu faze nos midjór pa nu spadja simentis di verdadi, i nu tinha serteza ma alguns di kes simenti ta kriaba na kes korason sinseru.

 Na kel ténpu N konxe un irman di Taiuan ki txoma Wen-hwa, i nu bira amigu di kunpanheru. El ta amaba verdadi i el krê djudaba kes algen di la tra pruvetu di mensajen di Bíblia tanbê. Pur isu, el djuda ami i txeu otus misionáriu midjora nos manera di pâpia xinês. N paxona pa kel irman zeloza li i nu kaza na anu di 1974.

 Wen-hwa djuda misionárius midjora ses manera di prega. Pur izénplu, el djuda-nu intende tradison i manera di pensa di kes algen di Taiuan. El djuda-nu muda nos aprizentason, asi pa nu konsigi papiaba ku kes algen na tiritóriu, ki txeu di es éra budista i taoista. Na Taiuan éra normal pesoas adoraba ses família ki dja moreba, i maioria di kes algen nunka ka leba ô ti mésmu odjaba un Bíblia. Pur isu, na nos aprizentason nu fika ta pâpia más sobri Kriador. Nu ta mostraba es ma se nómi é Jeová i pamodi ki nu pode ten serteza ma el ta izisti. Pur izénplu, si un agrikultor ô un piskador flaba: “Nu meste di txuba ku sól pa nu ten kumida”. Nu ta flaba: “Má kenha ki ta da-nu kumida? É ka kel Deus tudu-poderozu, ki kria tudu kuza i ki merese nos adorason?”

 Sima ténpu ba ta pasa, nu kumesa ta odja rezultadu di nos trabadju. Kes simenti di Reinu kumesa ta kria na korason di txeu algen sinseru. Alguns studanti di Bíblia sforsa txeu pa dexa kes ensinu falsu ki dja tinha txeu anu ki es ta kriditaba na el i kes tradison ki Deus ka ta aprova. Má ku ajuda di kes misionáriu i kes irmon di la, es konsigi faze kes mudansa li i midjora ses vida txeu. (Juan 8:32) Dipôs txeu irmon diziginadu ansion i ajudanti di kongregason, i txeu irmon ku irmans entra na sirvisu pa ténpu interu, sima sirbi na Betel tanbê.

 Na anu di 1976, N tevi priviléjiu di ser konvidadu pa N sirbi na Kumison di Filial di Taiuan timenti N kontinua ta sirbi di misionáriu na kanpu. Na anu di 1981, mi ku Wen-hwa, nu konvidadu pa nu sirbi na Betel, i N kontinua ta sirbi na Kumison di Filial pa txeu anu. Dja ten más di 60 anu ki N entra na sirvisu pa ténpu interu. Dja N pasa más di 50 anu na Taiuan, i kuazi 50 anu djuntu ku nha mudjer ki N krê txeu. Nha amigu i kunpanheru di pregason, Ian Brown, kontinua fiel na se sirvisu pa ténpu interu ti kantu el móre na anu di 2013.

 Mi ku Wen-hwa nu ta sforsa txeu pa nu mante okupadu na nos trabadju na Betel, na nos kongregason di língua xinês i na pregason. Nu ta agradese Jeová pa kes priviléjiu li ki ten txeu valor pa nos. El da-m dizeju i puder pa N sirbi-l di tudu korason kantu mi éra jóven, i gósi ki dja N sta un algen grandi, el sta kontinua ta faze kel-li pa mi ku Wen-hwa.