Bu maridu ô bu mudjer dja kustuma fla-u ma el sta preokupadu ku kantu ki bu ta bebe? Nton, ten alguns kuza ki bu debe pensa na el.

Na kel artigu li

•  Bebe dimás ta prujudika kazamentu

•  Bu sta visiadu na bebida?

•  Ka bu nega ma bu ten prubléma ku bebida

•  Kuzê ki bu pode faze

 Bebe dimás pode traze txeu tipu di prubléma di saúdi, sima prubléma na korason, na fígadu i kánser. Má alén di prublémas di saúdi, bebe dimás ta prujudika kazamentu. El pode traze violénsia, falta di dinheru, traison i divórsiu.

 Bíblia ta fla ma óras ki un algen ta bebe dimás, bebida ‘ta morde sima un kóbra i el ta bota venénu sima un kóbra ki ten venénu.’ (Provérbios 23:32) Modi ki bu ta sabe si bu sta visiadu na bebida?

 Kes pergunta li pode djuda-u sabe si bu sta visiadu na bebida:

•   Bu ten prubléma ku kontrola kantu ki bu ta bebe?

•   Txeu bês bu ta fika ta pensa na ki óra ki bu ta torna bebe?

•   Bu ta bebe sikrê kel-li ta traze prubléma na bu vida i na bu kazamentu?

•   Bu ka ta xinti dretu óras ki bu sta tenta larga bebida?

•   Bebida ta pô-u ta diskuti ku bu maridu ô bu mudjer?

•   Bu ta konsigi bebe más txeu di ki antis?

•   Bu ta bebe sukundidu ô bu ta sukundi bebida na kaza ô na trabadju?

 Si bu responde sin pa un ô más di kes pergunta li, talvês bu sta kumesa ta fika visiadu na bebida.

 Bu maridu ô bu mudjer dja kustuma fla-u ma el sta preokupadu ku kantu ki bu ta bebe? Talvês bu tenta poi kel prubléma ta parse pikinoti ô bu tenta ranja diskulpa. Talvês bu poi kulpa na otus algen, sima ken ki bu sta kazadu ku el, i bu fla kuzas sima:

•   “Si bu ta trataba mi midjór, N ka ta bebeba.”

•   “Si bu tinha nha xéfi, bu ta bebeba tanbê.”

•   “N konxe txeu algen ki ta bebe más txeu ki mi.”

 Si bu fla un kuza sima kel-li, talvês bu sta ta poi bu dizeju di bebe na frenti di bu dizeju di ten un kazamentu filís. Kal di es ki debe ser más inportanti?

 Konsedju di Bíblia: “Ómi kazadu sta preokupadu... na modi ki el pode agrada se mudjer”. — 1 Koríntius 7:33.

•   Leba preokupason di bu maridu ô bu mudjer asériu. Sikrê bu maridu ô bu mudjer ta preokupa dimás ku kel asuntu li, pamodi ki bu ka ta muda? Si bu ta insisti na bebe sikrê bu maridu ô bu mudjer ta fika preokupadu, kel-li pode mostra ma bebe dimás dja bira un prubléma.

   Konsedju di Bíblia: “Pa kada algen kontinua ta djobe, ka se própi vantajen, ma kel di otu algen.” — 1 Koríntius 10:24.

•   Djobe informasons ki ta djuda-u. Pa ganha un géra, un trópa meste sabe modi ki ses inimigu ta ataka-l. Di mésmu manera, pa vense bu inimigu bu meste sabe más sobri vísiu di bebida i modi ki el ta poi algen ta bira skravu. Tanbê bu meste sabe kuzê ki bu debe faze pa kaba ku vísiu di bebida i ka kai na el otu bês.

   Konsedju di Bíblia: “Pa nhos ka seta di ninhun manera kes dizeju di karni ki ta géra kóntra nhos.” — 1 Pedru 2:11.

•   Djobe ajuda. Ten txeu kuza ki ta fazedu pa djuda kes algen ki ten prubléma ku bebida, sima tratamentu pa larga bebida, kes séntru ki ta fazedu kes tratamentu i ospital. Tanbê bu pode pidi un amigu maduru pa djuda-u odja si ten algun kuza ki bu ka sta da kónta ki sta pô-u ku vísiu di bebida. I dipôs pidi se ajuda óras ki bu xinti gana di bebe.

   Konsedju di Bíblia: ‘Un amigu di verdadi ta ama tudu óra i el é un irmon ki nase pa ténpu di frónta.’ — Provérbios 17:17.

 Bebe dimás é un prubléma konplikadu i sô lé un artigu pikinoti ka ta rezolve-l. Tanbê, sô fla ma bu ta tenta bebe más poku, ka ta txiga pa bu vense-l. Bu debe lenbra ma bebe dimás ka ta prujudika sô bu saúdi, el ta prujudika bu kazamentu tanbê.

 Pa sabe más: Lé kes artigu li pa odja modi ki otus algen konsigi para di bebe dimás.

 “Ami é ka un ómi violéntu más”

 “N ka ta xinti vergónha di nha kabésa más”

 “N ta viveba na rua”

 Tanbê odja vídiu ‘N staba kansadu ku nha manera di vive’