Sédu ô tardi bus fidju ta kaba pa fadja na algun ária di ses vida i es ta fika diziludidu. Modi ki bu pode djuda-s rekupera?

•  Kuzê ki bu debe sabe

•  Kuzê ki bu pode faze

 Fadja ta faze párti di vida. Bíblia ta fla ma ‘nos tudu nu ta fadja’. (Tiago 3:2) Mininus tanbê ta fadja. Má, fadja pode ten un ladu bon, pamodi el pode djuda mininus prende modi ki es ta lida ku situasons difísil. Kriansas ka ta nase ku kel kapasidadi li, má es pode dizenvolve-l. Un mai ki txoma Laura fla: “Mi ku nha maridu nu repara ma óras ki mininus ta prende lida ku ses fadja é midjór, envês di finji ma nada ka kontise. Asi es ta prende ka dizisti óras ki es ta pasa pa diziluzon.”

 Txeu mininu ka sabe lida ku diziluzon. Alguns mininu ka prende lida ku diziluzon pamodi ses pai ku mai ta proteje-s i ta pô-s ta pensa ma es ka faze nada eradu. Pur izénplu, si un mininu panha un mau nóta na próva, txeu pai ku mai lógu ta poi kulpa na profesor. Si un mininu briga ku un koléga di skóla pai ku mai lógu ta poi kulpa na kel se koléga.

 Nton modi ki mininus ta konsigi prende rekonhese ses éru, si pai ku mai sénpri ta proteje-s di tudu rezultadu di ses fadja?

•   Inxina bus fidju odja ma kes kuza ki es ta faze ta ten rezultadu.

   Bíblia ta fla: ‘Pamodi kel ki algen símia, é kel ki tanbê el ta kodje’. — Gálatas 6:7.

   Tudu kuza ki nu ta faze ten se rezultadu. Tudu kel ki nu straga ta kusta pa konpo. Tudu éru ten se rezultadu. Mininus debe konxe kel prinsípiu ki ta mostra ma tudu kel ki nu ta faze ten un rezultadu. Tanbê, es debe xinti ma es ten ses párti di kulpa na kel ki kontise. Nton, ivita poi kulpa na otu algen ô ranja diskulpa pa éru di bu fidju. Envês di kel-la, dexa-l xinti kes rezultadu ki é normal pa mininus di se idadi. Tanbê, mininus debe konsigi odja klaru ligason entri kes kuza mariadu ki es faze i kes rezultadu.

•   Djuda bus fidju atxa soluson pa ses prubléma.

   Prinsípiu di Bíblia: ‘Sikrê justu kai 7 bês, el ta torna labanta otu bês’. — Provérbios 24:16.

   Diziluzon pode duê txeu, má é ka fin di mundu. Djuda bus fidju konsentra na djobe soluson envês di konsentra na djobe kes injustisa ki kontise na kel situason. Pur izénplu, si bu fidju matxu panha mau nóta na un próva na skóla, djuda-l odja ma pa el pode midjora kel situason, el debe studa más txeu i sta disididu na faze se midjór otu bês. (Provérbios 20:4) Si bu fidju-fémia diskuti ku se amiga, djuda-l odja modi ki el pode bai na se amiga primeru pa faze pas ku el, ka nporta kenha ki ten kulpa. — Romanos 12:18; 2 Timóteo 2:24.

•   Inxina bus fidju seta ses limitason.

   Prinsípiu di Bíblia: ‘N ta fla kada un di nhos pa ka pensa di se kabésa más di ki kel ki el debe pensa’. — Romanos 12:3.

   Si bu fla bu fidju ma el é “midjór” ki otus na un kuza ki el ta faze, bu ka sta ta fla-l verdadi i nen bu ka sta ta djuda-l. Mésmu kes mininu ki é bon na skóla nen sénpri ka ta panha bon nóta. I kes mininu ki é bon na algun disportu, ka ta ganha tudu jogu. Mininus ki ta seta ses limitason ta konsigi lida midjór ku diziluzon.

   Bíblia ta fla ma provasons pode pô-nu bira más fórti i djuda-nu dizenvolve kapasidadi di ka dizisti. (Tiago 1:2-4) Nton, nbóra diziluzon ta dizanima algen, bu pode djuda bus fidju ser ikilibradu na manera ki es ta odja kes diziluzon.

   Pa bu inxina bus fidju lida ku situasons difísil, ta leba ténpu i sforsu sima óras ki bu ta inxina-s otus kualidadi. Má bu ta ben odja rezultadus óras ki es bira un adulesenti i es konsigi lida dretu ku diziluzon. Un livru a ta fla: “Kes adulesenti ki sabe lida ku ses prubléma ka ta faze nada prigozu ô sen pensa óras ki es sta txeu preokupadu. Es ten más xansi di konsigi ten bons rezultadu óras ki kontise kuzas novu ô situasons ki es ka staba ta spéra.” Lida ku situason difísil é un kualidadi ki es ta kontinua ta meste ti óras ki es bira adultu.

 Konsedju: Da izénplu. Lenbra ma manera ki bu ta lida ku bus diziluzon di vida ta djuda-u inxina bus fidju modi ki es pode lida ku di ses.