“Primeru bês ki nu pâpia ku nos fidju-fémia sobri bebida alkólika, el tinha 6 anu di idadi. Nu fika spantadu pamodi el sabia más txeu di ki kel ki nu ta speraba.” — Alexander.

•  Kuzê ki bu debe sabe

•  Kuzê ki bu pode faze

•  Kuzê ki Bíblia ta fla sobri bebida alkólika

 Pâpia ku bus fidju sobri bebida alkólika é txeu inportanti. Ka bu spéra ti ki bu fidju pikinoti bira jóven pa bu pâpia ku el. Khamit ki é di Rúsia fla: “Éra bon si nu papiaba ku nos fidju matxu sobri bebida alkólika désdi pikinoti. N prende modi ki kel-li é inportanti dipôs ki N pasa pa un situason difísil. N diskubri ma nha fidju ki tinha 13 anu, dja staba ta bebe bebida alkólika sénpri.”

 Pamodi ki kel asuntu li debe preokupa-u?

•   Kólegas di skóla, publisidadis i tilivizon pode influensia manera ki bu fidju ta pensa di bebida alkólika.

•   Di akordu ku Séntrus di Kontrolu i Proteson di Duénsas, na Mérka, 11 pursentu di kes algen ki ta uza bebida alkólika na Mérka é kes ki inda ka ten idadi pa bebe.

 É pur isu ki autoridadis di saúdi ta konsedja pai ku mai pa es inxina ses fidju désdi pikinoti sobri prigus di uza bebida alkólika. Modi ki bu pode faze kel-li?

 Pensa na perguntas ki bu fidju pode faze-u. Mininus pikinoti é kuriozu i kes mininu más grandi é más kuriozu inda. Nton, bu ta faze dretu si bu pripara modi ki bu ta responde-s. Pur izénplu:

•   Si bu fidju tene kuriozidadi di sabe kal ki é gostu di bebida alkólika, bu pode fla-l ma vinhu ta parse ku sumu di fruta fórti i ma serveja é txeu margós.

•   Si bu fidju krê sprimenta gostu di bebida alkólika, bu pode fla-l ma bebida alkólika é fórti dimás pa korpu di mininu. Pâpia ku el sobri kuzê ki bebida alkólika ta faze algen. Fla-l ma bebida alkólika pode poi algen xinti kalmu, má si bebedu dimás el pode poi algen fika tontu, aji sen pensa i fla kuzas ki dipôs el ta rapende. — Provérbios 23:29-35.

 Informa bu kabésa. Bíblia ta fla: ‘Ómi prudenti ta aji ku konhisimentu’. (Provérbios 13:16) Informa sobri ki idadi un algen pode kumesa ta toma bebida alkólika i sobri limiti di bebida alkólika ki lei di bu país ta permiti. Asi bu ta fika ben priparadu pa djuda bu fidju.

 Toma disizon di pâpia sobri kel asuntu li. Mark, un pai ki ta mora na Britanha fla: “Adulesentis pode ten dúvidas sobri manera ki debe uzadu bebida alkólika. N pergunta nha fidju matxu ki ten 8 anu di idadi si el ta atxa ma é dretu ô mariadu uza bebida alkólika. N mante anbienti trankilu i kel-li djuda-l fla tudu kel ki el ta pensa.”

 Bu ta konsigi djuda bu fidju midjór si bu pâpia sobri kel asuntu li txeu bês. Di akordu ku idadi di bu fidju, pâpia ku el sobri bebida alkólika óras ki bu sta ta inxina-l otus kuza sima suguransa na strada i sobri séksu.

 Da izénplu. Kriansas é sima spónja. Es ta prende ku kuzas ki ta sta na ses vólta. Piskiza ta mostra ma é pai ku mai ki ten más influénsia na ses fidju. Kel-li krê fla ma si primeru kuza ki bu ta faze pa bu fika más kalmu é bebe bebida alkólika, bu fidju ta prende ma bebida alkólika é soluson pa preokupasons di vida. Nton ser bon izénplu pa bu fidju. Bu debe uza bebida alkólika ku responsabilidadi.