Txeu maridu ku mudjer ta atxa ma é difísil es pâpia ku kunpanheru mésmu óras ki es ta sta djuntu. Pamodi ki kel-li ta kontise?

•  Pamodi ki alguns maridu ku mudjer ta xinti afastadu di kunpanheru nbóra es ta sta djuntu?

•  Kuzê ki nhos pode faze

•  Kuzê ki otus algen kazadu ta fla

•  Perguntas ki pode djuda nhos pâpia ku kunpanheru

•   Nu ta sta txeu kansadu

   “Óras ki nu ten ténpu pa sta ku kunpanheru, ô mi ô nha maridu ta sta txeu kansadu. Óras ki N ta sta kansadu, N ta xatia faxi dimás. Nton é midjór nu odja tilivizon di ki pâpia ku kunpanheru.” — Anna.

•   Nos aparelhu iletróniku ta distrai-nu

   “Redi sosial i diverson na internet pode toma-u txeu ténpu. Bu pode pasa txeu óra na redi sosial i bu ka pâpia nada ku bu maridu ô ku bu mudjer. Alvês nen nhos ka ta sta na mésmu lugar na kaza.” — Katherine.

•   Nu ka gosta di kes mésmu kuza

   “Óras ki nha maridu ta ben di trabadju, txeu bês el ta kustuma gasta monti ténpu ta faze kes kuza ki el gosta. El ta trabadja duru, nton el merese pasa ténpu el sô ta faze kes kuza ki el gosta. Má N ta gostaba pa nu pasa más ténpu djuntu.” — Jane.

•   Nu ta sta sénpri ta trabadja, mésmu óras ki nu sta na kaza

   “Dja ki nu ten aparelhus iletróniku, nu pode kontinua ta trabadja mésmu óras ki nu sta na kaza ku nos família. Txeu bês N ta responde kes mensájen di trabadju na kel óra ki N devia staba ta pasa ténpu ku nha mudjer.” — Mark.

•   Rekonhese ma é inportanti nhos pasa ténpu djuntu i ma kel-li é ka un kuza ki nhos debe faze sô di vês en kuandu.

   Prinsípiu di Bíblia: ‘Nhos konfirma kuzê ki é más inportanti’. — Filipenses 1:10.

   Pensa na kel-li: Na kuzas ki bu ta faze, bu ta mostra ma bu kazamentu é más inportanti ki bu trabadju ô kes kuza ki bu gosta? Bu ta da bu maridu ô mudjer ténpu i atenson sô óras ki bu ka tene más nada pa faze?

   Sujiston: Sénpri faze planu pa bu pasa ténpu ku bu maridu ô mudjer sen nada pa distrai nhos.

   “N gosta txeu óras ki nha maridu ta faze planu pa nu pasa ténpu djuntu sô nos dôs. Kel-li ta pô-m ta xinti spesial i ta da-m sertéza ma el ta krê sta djuntu ku mi. Tanbê ta pô-m ta ama-l inda más txeu.” — Anna.

•   Prende fla bus aparelhu iletróniku “gósi nau”.

   Prinsípiu di Bíblia: ‘Ten un ténpu markadu pa tudu kuza’. — Eclesiastes 3:1.

   Pensa na kel-li: Kantu bês ki bu ta dexa un mensájen ô un tóki di telemóvel inpidi-u di da bu maridu ô bu mudjer tudu atenson?

   Sujiston: Nhos tenta kume djuntu peloménus un bês pur dia i nhos poi nhos telemóvel lonji di nhos. Óras ki nhos ta kume djuntu é un bon xansi di nhos pâpia di kuzas ki nhos faze duránti kel dia.

•   Óras ki ta da, nhos faze kónpra ô trabadju di kaza djuntu.

   Prinsípiu di Bíblia: ‘Dôs é midjór ki un, pamodi es ten un bon rekonpénsa pa ses trabadju duru.’ — Eclesiastes 4:9.

   Pensa na kel-li: Kantu bês ki un di nhos ta bai el sô faze algun kuza ô kunpra kuzas ki família ta meste?

   Sujiston: Nhos trabadja djuntu sima un ekipa pa djuda kunpanheru, mésmu óras ki un di nhos ta konsigi faze kel trabadju el sô.

   “Nu pode uza kes trabadju di kaza sima faze kónpra, laba losa, dobra ropa i kuida di kintal, sima un xansi di pasa ténpu djuntu.” — Nina.

•    Ser ikilibradu.

   Prinsípiu di Bíblia: ‘Tudu algen debe sabe ma nhos é ikilibradu.’ — Filipenses 4:5.

   Pensa na kel-li: Modi ki bu pode ten sertéza ma bu ka ta iziji txeu di bu maridu ô bu mudjer?

   Sujiston: Nhos pâpia ku kunpanheru pa nhos pode ntende kuzê ki kada un di nhos ta meste. Nhos disidi modi ki kada un di nhos ta gasta se ténpu di manera ki ta dexa nhos tudu dôs filís.

   “Nha maridu ten txeu inerjia, má ami N ten poku inerjia pamodi prublémas di saúdi. Txeu bês N ta fla-l pa el sai i pa el ba divirti i ma N ta fika na kaza ta spera-l. N ta fika na kaza pa diskansa timenti el ta sai pa faze izersísiu. Nos tudu dôs ta xinti midjór pamodi nu ta konsigi faze kel ki nu meste.” — Daniela.

 Primeru, kada un di nhos pode pensa na kada un di kes pergunta li. Dipôs, nhos pâpia ku kunpanheru sobri kes respósta.

•    Bu ta atxa ma gósi bo ku bu maridu ô mudjer sta tra kel ténpu ki meste pa nhos sta djuntu ku kunpanheru?

•   Ki sforsu bu maridu ô mudjer dja faze pa pasa ténpu ku bo ki bu podia ilojiaba el?

•   Na kuzê ki bu ta gostaba pa bu maridu ô mudjer midjora?

•   Kantu bês ki aparelhus iletróniku dja inpidi-u di da bu maridu ô mudjer atenson óras ki el sta pâpia?

•   Modi ki nhos tudu dôs pode ser ikilibradu na kuzê ki nhos ta spéra di kunpanheru?

•   Ki mudansas kada un di nhos pode faze kel simana li pa ten más ténpu ku kunpanheru, sen nada pa distrai nhos?