El xinta na txon, ku korpu kubértu di frida di kabésa pa pé i ku txeu dór. Imajina se situason. El sta ku kabésa pa baxu, onbru kaídu, el sô, sen forsa nen pa spanta móskas ki ta xinta na el. Xintadu na meiu di sinza pa mostra se tristéza, úniku kuza ki el podia faze éra raspa se péli duenti ku un padás di jaru di baru. Se vida muda txeu! Se amigus, vizinhus i famílias bandona-l. Pesoas fika ta faze-l trósa, ti mininus tanbê. El atxa ma se Deus, ki é Jeová, tanbê staba kóntra el, má el staba eradu. — Jó 2:8; 19:18, 22.

 Kel ómi li é Jó. Deus fla: ‘Ka ten ningen na Téra sima el.’ (Jó 1:8) Dipôs di txeu anu, Jeová kontinua ta atxa ma Jó é un di kes ómi más justu ki dja vive na Téra. — Ezequiel 14:14, 20.

 Bu sta ta pasa pa prublémas i disgrasa? Stória di Jó pode konsola-u txeu. Tanbê el pode djuda-u ntende midjór un kualidadi ki tudu sérvu di Jeová meste ten, ki é lialdadi. Un algen ki é lial ta sirbi Jeová di korason i el ta kontinua ta adora-l sikrê ku prublémas. Nu dexa Jó inxina-nu más sobri kel kualidadi li.

 Ta parse ma algun ténpu dipôs di mórti di Jó, Muizés ki éra un ómi fiel, skrebe stória di vida di Jó. Através di spritu santu, Muizés konsigi skrebe ka sô sobri kuzas ki afeta Jó li na Téra, má tanbê sobri alguns kuza ki kontise na Séu.

 Na komésu di stória, nu ta odja Jó ta leba un vida trankilu i filís. El éra un ómi riku, txeu konxedu i ruspetadu na Téra di Us, ki talvês ta fikaba na nórti di Arábia. El éra un algen ki gostaba di da, el ta djudaba i el ta protejeba kes algen ki ka ta konsigiba proteje ses kabésa. Jó ku se mudjer abensuadu ku 10 fidjus. Más inportanti inda, Jó éra un ómi spritual. El ta sforsaba pa agrada Jeová, sima se famílias faze, pur izénplu Abraon, Izaki, Jakó i Juzé. Sima kes ómi li, Jó ta fazeba papel di saserdóti pa se família, pamodi sénpri el ta ofereseba sakrifisius pa se fidjus. — Jó 1:1-5; 31:16-22.

 Má, dirapenti, stória di Jó ta muda. Nu ta kumesa ta odja kuzê ki staba ta kontise na Séu. I nu ta fika ta sabe kes kuza ki Jó ka sabia. Tudu kes anju fiel di Jeová staba na un runion ku Jeová na Séu. Má, dipôs kel anju rebéldi ki é Satanás, entra na kel runion. Jeová sabia ma el ka gostaba di Jó, nton Jeová pâpia ku Satanás i El fla-l modi ki Jó éra un grandi izénplu di lialdadi. Má Satanás responde: ‘É atoa ki Jó ta ruspeta Deus? Bu ka poi un sérka di proteson na se vólta, na se kaza i na tudu kuza ki el ten?’ Satanás ta ôdia kes algen ki é lial. Óras ki es ta mostra ma es ta ama Jeová di tudu ses korason, es sta ta mostra ma Satanás é un traidor ki ka ten amor. Dipôs, Satanás fla ma Jó ta sirbiba Deus sô pa interesi. El fla ma si Jó perdeba tudu kuza, el ta maldisuaba Jeová! — Jó 1:6-11.

 Jó ka sabia, má Jeová da-l un priviléjiu grandi ki éra prova ma Satanás staba eradu. Satanás dadu autorizason di tra Jó tudu kuza ki el tinha. Sô el ka podia mataba Jó. Nton Satanás kumesa se trabadju kruel. Sô na un dia monti disgrasa kontise ku Jó. El perde tudu se animal. Primeru, se bois i burus, dipôs se ovelhas i se kamelus. Más piór inda, kes algen ki ta kuidaba di ses animal matadu. Es fla Jó ma alguns di se sérvus móre pamodi ‘lumi ki ben di Deus’, talvês un raiu. Antis di Jó konsigi ntende mórti di se sérvus i ma dja-l biraba póbri, kontise un kuza piór. Se 10 fidjus móre tudu djuntu na kaza di kel más bédju, kantu ki un tenpistadi ben dirapenti i distrui kel kaza! — Jó 1:12-19.

 É difísil ô talvês inposível imajina modi ki Jó staba ta xinti. El ratxa se ropa, el rapa kabélu i el kai na txon. Konkluzon ki Jó txiga éra ma Jeová tra-l tudu kuza ki El daba el. Satanás uza spertéza na faze kuzas di un manera ki Jó ta pensaba ma foi Deus ki poi tudu kes disgrasa ta kontise na se vida. Má simé Jó ka maldísua Deus sima Satanás dja flaba. Envês di kel-la, Jó fla: ‘Pa nómi di Jeová kontinua ta ser lovadu.’ — Jó 1:20-22.

 Ku raiba, Satanás ka dizisti. El torna bai frenti di Jeová duránti un runion di anjus. Más un bês Jeová ilôjia lialdadi di Jó, ki staba ta mante firmi ku kes ataki di Satanás. Satanás responde: ‘Péli pa péli. Ómi ta da tudu kuza ki el ten pa se vida. Má, gósi labanta bu mô i mexe na se osu i na se karni, i di sertéza el ta maldisua-u na bu róstu.’ Satanás tinha sertéza ma si Jó fikaba txeu duenti el ta maldisuaba Deus. Jeová kunfia na Jó ku tudu sertéza, pur isu el permiti pa Satanás poi Jó fika duenti, má pa ka mata-l. — Jó 2:1-6.

 Poku ténpu dipôs, Jó staba ta pasa pa kel situason tristi ki primeru parágrafu ta pâpia di el. Imajina modi ki se mudjer staba ta xinti. Dja el staba ku txeu tristéza pamodi se 10 fidju ki móre, gósi el tinha ki odja se maridu ta sufri txeu sen el pode djuda-l! El fla dizanimadu: ‘Inda bu sta ta mante bu lialdadi? Maldísua Deus i móre!’ El ka sta parseba ku kel mudjer ki Jó konxeba i ki el ta amaba. Jó ntende ma se mudjer fla-l kel-la pamodi tudu kel ki staba ta kontise. Má simé, el nega maldísua se Deus. El ka peka na nada ki el fla. — Jó 2:7-10.

 Bu sabia ma kel stória tristi li, ki kontise mê, ta afeta bu vida? Repara ma Satanás faze kel akuzason gravi li ka sô kóntra Jó, má tanbê kóntra tudu algen na Téra. El fla: ‘Ómi ta da tudu kuza ki el ten pa se vida.’ Na otus palavra, Satanás ta kridita ma ninhun di nos nu ka ta mante nos lialdadi. El ta fla ma bu ka ten amor di verdadi pa Deus, ma bu ta bandonaba Deus faxi pa salva bu kabésa. É sima si Satanás sta ta fla ma bu ta pensa sô na bu kabésa sima el! Bu ta gostaba di prova ma el sta eradu? Kada un di nos ten kel priviléjiu li. (Provérbios 27:11) Nu ben odja ki prublémas ki Jó pasa pa el dipôs.

 Três ómi ki konxeba Jó, ki Bíblia ta fla ma es éra amigu ô algen konxedu di Jó, obi di kuzê ki Jó staba ta pasa pa el i es viaja pa bai vizita-l i da-l forsa. Kantu es odja-l di lonji, es ka konsigi konxe-l. Jó staba ku txeu dór, se péli staba prétu ku kel duénsa. Gósi Jó ka staba sima el éra antis. Kes três ómi ki é Elifás, Bildadi i Zofar, finji ma es staba txeu tristi pamodi sufrimentu di Jó. Es grita riju i es da ku téra na ses kabésa. Dipôs es xinta na txon, pértu di Jó, sen fla nada. Es xinta la duránti un simana, dia ku noti, kaladu. Nu ka debe pensa ma es fika kétu pa konsola Jó, pamodi es ka pergunta-l nada sobri se situason. Sô es sabia ma Jó staba ku txeu dór, pamodi kel-la ta daba pa odja klaru. — Jó 2:11-13; 30:30.

 Dipôs, foi Jó ki kumesa ta pâpia. Ku palavras xeiu di dór, el maldísua kel dia ki el nase. I el fla kuzê ki más tinha el ta sufri. El ta atxaba ma éra Deus ki staba ta pô-l ta sufri! (Jó 3:1, 2, 23) Nbóra Jó inda éra un ómi di fé, el staba ta meste di txeu konsolu. Má kantu ki kes três ómi ki el konxeba kumesa ta pâpia, Jó da kónta ma éra midjór es kontinuaba sen fla nada. — Jó 13:5.

 Primeru ki pâpia foi Elifás, ki talvês éra kel más bédju i ki tinha mutu más idadi di ki Jó. Dipôs kes otu dôs ómi pâpia tanbê. Nu pode fla ma es sigi kel mésmu rasusinu di Elifás. Alguns di kes kuza ki es fla ta parseba ma ka ta afetaba Jó. Es ripiti kes kuza ki otus algen ta flaba sobri Deus i ki ta parseba ma éra dretu. Pur izénplu, es fla ma Deus é grandi, ma el ta kastiga kenha ki é mau i ma el ta abênsua kes ki é dretu. Kes kuza li, ka ta mostraba ninhun bondadi pa Jó. Elifás uza un rasusinu sinplis pa mostra ma si Deus é bon i el ta kastiga kes ki é mau, nton Deus staba ta kastiga Jó. Kel-li krê fla ma Jó faze algun kuza mariadu. — Jó 4:1, 7, 8; 5:3-6.

 Nu ka ta fika dimiradu pamodi Jó ka seta kel rasusinu la. El nega obi ku es. (Jó 6:25) Má kel-li poi kes três ómi ta fika ku más sertéza inda ma Jó staba ta sukundi algun kuza eradu ki el faze. Es ta atxaba ma Jó mereseba kes kuza mariadu ki staba ta kontise ku el. Elifás fla ma Jó é orgulhozu, mau, i el ka tinha ruspetu pa Deus. (Jó 15:4, 7-9, 20-24; 22:6-11) Zofar fla Jó pa el para di faze kuzas mariadu i di xinti kontenti ku pekadu. (Jó 11:2, 3, 14; 20:5, 12, 13) I Bildadi foi más kruel inda. El tenta mostra ma fidjus di Jó faze algun pekadu pur isu es mereseba móre di kel manera la! — Jó 8:4, 13.

 Kes ómi faze un kuza inda más piór. Alén di es duvida di lialdadi di Jó, es mostra ma ka bale péna ser lial pa Deus! Na kel primeru bês ki Elifás pâpia, el konta ma un bês el nkontra ku un spritu. Konkluzon ki Elifás txiga dipôs di kel spiriénsa li ku Diabu foi: Deus ‘ka ta kunfia na se sérvus, i el ta atxa fadjas na se anjus.’ Di akordu ku kel rasusinu mau li, pesoas nunka ka ta konsigi agrada Deus! Dipôs, Bildadi fla ma pa Deus lialdadi di Jó ka tinha valor. Jó éra sima un bitxu pikinoti pa Deus! — Jó 4:12-18; 15:15; 22:2, 3; 25:4-6.

 Dja bu kustuma tenta konsola un algen ki staba ta sufri txeu? É ka fásil faze kel-la. Má nu pode prende txeu ku kes ómi ki staba ta pâpia ku Jó. Es ta inxina-nu kes kuza ki nu ka debe fla. Kes três ómi uza palavras konplikadu i ku bazofaria, má ninhun di es ka txoma Jó pa se nómi! Es ka liga pa sentimentus di Jó nen es ka trata-l ku bondadi. a Nton, si un algen ki bu ta preokupa ku el sta ta xinti tristi, tenta mostra-l amor, bondadi i ma bu ta preokupa ku el. Tenta djuda kel algen bira se fé i koraji más fórti, asi pa el pode kunfia na Deus i kridita na Se grandi bondadi, mizerikórdia i justisa. É kel-la ki Jó ta fazeba pa kes ómi, si éra el ki staba na ses lugar. (Jó 16:4, 5) Nton, modi ki Jó reaji ku kes ataki kóntra se lialdadi?

 Jó dja staba dizanimadu kantu ki es kumesa ta fla-l kes kuza la. Désdi komésu Jó fla ma alguns di se palavras foi ‘sen pensa’ i ‘palavras di un ómi dizusperadu’. (Jó 6:3, 26) Nu ta konsigi ntende pamodi ki el fla si. Se palavras mostra kel dór ki el staba ta xinti na se korason. Tanbê se palavras mostra ma el ka sabia di tudu kuza. Dja ki tudu kes kuza ki kontise ku el i ku se família foi faxi i ta parseba ma es ben di Deus, Jó pensa ma é Jeová ki faze-l kes kuza. Tinha txeu kuzas inportanti ki Jó ka sabia, nton el tra alguns konkluzon eradu.

 Má, Jó éra un ómi ki tinha un fé fórti. El mostra se fé na kuzas ki el fla na kel konbérsu kunpridu. Se palavras éra di verdadi, bunitu i ta nkoraja-nu oji. Kantu ki el pâpia sobri kes kuza bunitu ki Deus kria, el da glória pa Deus di un manera ki ninhun otu algen ka ta konsigi fazeba sen ajuda di Deus. Pur izénplu, el fla ma Jeová ta ‘susti Téra riba di nada’. Kel-li é un kuza ki siênsia diskubri txeu ténpu dipôs. b (Jó 26:7) I kantu ki Jó pâpia di se speransa pa futuru, el mostra kunfiansa sima di kes ómi ki tinha txeu fé. Jó ta kriditaba ma si el moreba, Deus ta lenbraba di el, ta xintiba sodadi di el i dipôs ta daba el vida otu bês. — Jó 14:13-15; Hebreus 11:17-19, 35.

 I sobri lialdadi? Elifás i se dôs amigu mostra ma lialdadi di ómis ka ten ninhun valor pa Deus. Jó kridita na kel ideia mau li? Klaru ki nau! Jó fla ma lialdadi ten valor pa Deus. El fla ku sertéza sobri Jeová: ‘El ta odja ma mi é lial.’ (Jó 31:6) Dipôs Jó odja klaru ma kes kuza ki kes três ómi staba ta pâpia di el, éra sô un ataki kóntra se lialdadi. Kel-li poi Jó ta faze un diskursu kunpridu i ki dexa kes três ómi kaladu.

 Jó ntende ma se lialdadi ta nvolveba manera ki el ta viveba tudu dia. Nton el splika modi ki el mante se lialdadi na se manera di vive i na kuzas ki el ta fazeba. Pur izénplu, el ivita tudu tipu di adorason di imaji, el trata otus ku bondadi i ruspetu, el kontinua linpu na se konportamentu, el ruspeta se kazamentu i más inportanti inda el mante lial pa kel úniku Deus verdaderu, ki é Jeová. Pur isu, Jó podia fla di tudu se korason: ‘Ti N móre, N ta mante nha lialdadi!’ — Jó 27:5; 31:1, 2, 9-11, 16-18, 26-28.

 Lialdadi é txeu inportanti pa bo, sima éra pa Jó? Lialdadi é un palavra fásil di fla, má Jó odja ma lialdadi é mutu más di ki sô palavras. Nu ta mostra nos amor di verdadi i di tudu nos korason pa Deus, óras ki nu ta obi ku el i nu ta faze kel ki el ta fla ma é dretu. Nu debe faze kel-li tudu dia, mésmu óras ki nu ta pasa pa prublémas. Si nu konporta si, nu sta ta faze sima Jó. Di sertéza nu ta poi Jeová kontenti i nu ta mostra ma se inimigu, ki é Satanás, ka ten razon. Kel-li é midjór manera di nu imita fé di Jó!

 Má stória di Jó ka ta tirmina li. El skese kuzê ki éra más inportanti, nton el fika ta difende sô se kabésa i ta tenta prova ma el éra justu i el skese di difende se Deus. Nton el mesteba pa algen koriji-l i pa djuda-l odja kuzas sima Jeová ta odja. I inda el staba ta sufri txeu dór i tristéza, pur isu el mesteba konsolu di verdadi. Kuzê ki Jeová ta fazeba pa kel ómi li di fé i ki mante se lialdadi? Un otu artigu di kel párti li ta ben responde kel pergunta li.