Nu meste kuida dretu di kes kuza di valor ki nu ten, sima nos kaza ô nos karu. Di mésmu manera, nu meste kuida dretu di nos amizadi ku Deus. Modi ki bu pode kontinua ta ten un amizadi fórti ku Deus dipôs ki bu batiza?

Na kel artigu li

•  Kontinua ta studa palavra di Deus

•  Kontinua ta ora pa Jeová

•  Kontinua ta pâpia sobri kes kuza ki bu ta kridita na el

•  Kontinua ta sisti runion

 Testu di Bíblia: ‘Kontinua ta da frutu na tudu bon óbra i ta omenta na konhisimentu izatu di Deus.’ — Colossenses 1:10.

 Kuzê ki kel testu li krê fla: Dipôs ki bu batiza, bu meste kontinua ta lé Bíblia i ta pensa na kes kuza ki bu sta ta prende. — Salmo 25:4; 119:97.

 Kuzê ki pode kontise: Alvês, bu pode ka xinti vontadi di studa. Talvês bu pode fla ma studa é ka pa bo.

 Kuzê ki bu pode faze: Faze más piskiza sobri kes asuntu di Bíblia ki bu gosta. Faze bu prugrama di studu pesoal. Ka bu faze un prugrama ki ta pô-u ta xinti kansadu dimás. Bu obijetivu é bira bu amor pa Jeová i pa se Palavra más fórti. Studa di kel manera li ta ser bon pa bo i tanbê ta da-u alegria. — Salmo 16:11.

 Un ideia: Pa bu tra más pruvetu di bu studu, tenta studa na un lugar kétu, undi otus algen ka ta distrai-u.

 Bu meste di más ajuda?

•   Lé:

   “Modi ki Bíblia pode djuda-m? — Párti 2: Bira bu leitura di Bíblia más sábi”

   “Modi ki N pode prende konsentra?”

•   Odja vídiu:

   Kuzê ki otus jóven ta fla — Leitura di Bíblia

•   Diskarega:

   “Prugrama di leitura di Bíblia”

 Testu di Bíblia: “Ka nhos preokupa dimás ku ninhun kuza, má sénpri nhos ora pa Deus i nhos inplora-l pa el orienta nhos na tudu kuza, i sénpri nhos agradese-l.” — Filipensis 4:6.

 Kuzê ki kel testu li krê fla: Bu ta obi ku Deus óras ki bu ta lé Bíblia i bu ta pâpia ku el óras ki bu ta faze orason. Ka bu skese ma na bus orason bu pode pidi pa kuzas ki bu meste, má tanbê bu pode agradese pa kes kuza ki dja bu ten.

 Kuzê ki pode kontise: Si bu ka toma kuidadu bu pode kumesa ta fla mésmu kuza na orason. Bu pode ti atxa ma Jeová ka sta ta obi bus orason i ma el ka sta interesadu na kuzê ki bu ten pa fla-l. — Salmo 10:1.

 Kuzê ki bu pode faze: Duránti dia, ba ta pensa na alguns kuza ki bu pode fla na orason. Si na kel óra bu ka atxa ténpu pa faze un orason ku kalma, tenta ka skese kel asuntu pa bu pode ora sobri el más tardi. Ora sobri kes kuza ki é inportanti pa bo i ka bu skese di ora pa otus algen tanbê. — Filipensis 2:4.

 Un ideia: Si bu atxa ma bu sta ta fla mésmu kuza na orason, pâpia ku Jeová sobri kel-li. El krê pa bu konta-l tudu kuza ki ta preokupa-u. — 1 João 5:14.

 Bu meste di más ajuda?

•   Lé:

   “Pamodi ki N debe faze orason?”

•   Diskarega:

   “Modi ki N pode midjora nhas orason”

 Testu di Bíblia: ‘Presta txeu atenson na bu kabésa i na bu manera di inxina. Pamodi óras ki bu faze si, bu ta salva bu kabésa i kes ki ta obi-u.’ — 1 Timóteo 4:16.

 Kuzê ki kel testu li krê fla: Óras ki bu ta pâpia ku otus algen sobri kes kuza ki bu ta kridita na el, bu fé tanbê ta bira más fórti. I pamodi kel-li, bu pode salva bu kabésa i kes ki ta obi-u.

 Kuzê ki pode kontise: Alvês bu pode ka xinti vontadi di pâpia ku otus algen sobri kes kuza ki bu ta kridita na el. Bu pode ti xinti medu di faze kel-li, prinsipalmenti na skóla.

 Kuzê ki bu pode faze: Ka bu dexa sentimentus negativu, sima medu, kontrola kuzê ki bu ta faze. Apóstlu Paulu skrebe: ‘Sikrê N [pâpia di notísias sábi] kóntra nha vontadi, simé é un responsabilidadi ki N dadu.’ — 1 Coríntios 9:16, 17.

 Un ideia: Si bu pai ku bu mai dexa-u, djobe un algen ki pode djuda-u i ki pode ser un bon izénplu pa bo. El debe ser un algen ki ta da un bon izénplu na pregason. — Provérbios 27:17.

 Bu meste di más ajuda?

•   Lé:

   “Pamodi ki N ta xinti medu di pâpia sobri nha relijion?”

 Testu di Bíblia: ‘Nu pensa na kunpanheru pa nu insentiva kunpanheru pa amor i pa bons óbra, ka nu dexa di sta na runion’. — Hebreus 10:24, 25.

 Kuzê ki kel testu li krê fla: Motivu prinsipal di nu bai runion é adora Jeová. Má ten más dôs kuza ki ta kontise óras ki nu ta bai runion. Primeru, irmons ku irmans na runion ta inkoraja-nu. Sugundu, nu ta inkoraja-s óras ki nu ta sisti i partisipa na runion. — Romanos 1:11, 12.

 Kuzê ki pode kontise: Alvês duránti runion bu pode kumesa ta pensa na otus kuza, i pamodi kel-li bu pode perde informasons inportanti. Ô bu pode ka sisti tudu runion. Bu pode fika tantu konsentradu na faze otus kuza sima trabadju di skóla ki bu pode fika sen ténpu di sisti runion.

 Kuzê ki bu pode faze: Trabadju di skóla é inportanti, má ka bu dexa nada inpidi-u di sisti tudu runion. Sforsa pa bu prende tudu kel ki bu pode. Tenta da komentáriu. I dipôs di runion fla un algen ma bu gosta di se komentáriu ô di un párti ki el faze na runion.

 Un ideia: Pripara antis di bu bai runion. Diskarega aplikativu JW Library®, i bai na kel párti “Runions” pa bu odja ki asuntu ki sta ba papiadu di el na kada runion.

 Bu meste di más ajuda?

•   Lé:

   “Pamodi ki N debe sisti runion?”