Verdaderu ô falsu

1.   Si bu ten txeu amigu, nunka bu ka ta xinti bo sô.

2.   Si bu entra na un redi sosial, nunka bu ka ta xinti bo sô.

3.   Si bu manda txeu mensajen na telemóvel, nunka bu ka ta xinti bo sô.

4.   Si bu faze kuzas pa otus algen, nunka bu ka ta xinti bo sô.

 Pamodi?

•   Ten txeu amigu é ka un garantia ma nunka bu ka ta xinti bo sô.

   “N ta preokupa ku nhas amigu, má alvês N ka ta atxa ma es ta preokupa ku mi. Kel tipu di solidon ki é más piór é óras ki bu sta serkadu di amigus, má ta parse ma es ka ta ama-u i nen ma es ka meste-u.” — Anne.

•   Sta na redi sosial é ka un garantia ma nunka bu ka ta xinti bo sô.

   “Alguns algen ta djunta amigus sima si es sta ta faze koleson di algun kuza. Má ten un kuartu xeiu di kes koleson, ka ta poi ningen ta xinti ma el gostadu di el. Si bus amigu na internet é ka bus amigu di verdadi, es é sima kes koleson ki ka ta sirbi pa nada.” — Elaine.

•   Manda txeu mensajen é ka un garantia ma nunka bu ka ta xinti bo sô.

   “Alvês óras ki bu sta xinti bo sô, bu ta fika sénpri ta djobe na bu telemóvel pa odja si algun di bus amigu ka manda-u mensajen. I óras ki bu odja ma ningen ka manda-u mensajen, bu ta xinti más piór inda!” — Serena.

•   Faze kuzas pa otus algen é ka un garantia ma nunka bu ka ta xinti bo sô.

   “N ta tenta sénpri faze algun kuza pa nhas amigu, má N ta xinti ma es ka ta faze mésmu kuza pa mi. N ka ta rapende di faze kuzas dretu pa es, má N ta xinti un bokadinhu stranhu pamodi nunka es ka ta faze nada pa mi.” — Richard.

 Konkluzon: Na verdadi, solidon ten txeu aver ku manera ki nu ta odja kuzas. Un jóven, ki txoma Jeanette, fla: “Solidon ka ta ben di fóra, má el ta ben di déntu di algen”.

 Kuzê ki bu pode faze si bu sta xinti bo sô i sen ninhun amigu?

Bira un algen ku más kunfiansa.

 “Algen pode xinti solidon pamodi falta di suguransa. É difísil faze ô seta novus amigu si bu ta atxa ma ningen ka ta preokupa ku bo.” —Jeanette.

 Bíblia ta fla: “Ama bu prósimu sima bu kabésa.” (Gálatas 5:14) Pa nu ten bons amizadi, nu meste ama nos kabésa. Má é klaru ki nu krê toma kuidadu pa kel-li ka bira na orgulhu. — Gálatas 6:3, 4.

Ivita xinti péna di bu kabésa.

 “Solidon pode ser sima un armadilha. Si bu fika ta xinti txeu péna di bu kabésa, ningen ka ta krê sta djuntu ku bo i bu ta fika ta xinti inda más bo sô.” — Erin.

 Bíblia ta fla: “Amor. . . ka ta djobe se própi interesi”. (1 Koríntius 13:4, 5) Na verdadi, óras ki nu ta pensa dimás na nos kabésa, nu ta skese di pensa na otus algen i kel-li pode poi nos amigus ta afasta di nos. (2 Koríntius 12:15) Má verdadi é kel-li: si pa bu xinti dretu bu ta dipende di kuzê ki otus ta faze pa bo, di serteza é bo ki ta perde! Si bu sta sénpri ta fla: “Ningen ka ta txoma-m” ô “Ningen ka ta konvida-m pa nada”, bu sta ta poi bu filisidadi na mô di otus algen. É kel-li ki bu krê?

Ka bu seta kalker algen pa ser bu amigu.

 “Un algen ki sta xinti el sô, el pode buska atenson di kalker algen. El krê xinti ma el é inportanti pa algun algen. Má, alguns algen pode pô-u ta xinti si sô pa pruveta di bo. Dipôs bu ta ba xinti más bo sô di ki bu staba antis.” — Brianne.

 Bíblia ta fla: ‘Ken ki ta anda ku algen ki ten sabedoria, ta ganha sabedoria, má ken ki ta sta djuntu ku algen ki ka ten juís, ta ten prublémas.’ (Provérbios 13:20) Óras ki un algen sta ku txeu fómi, el ta seta kume kalker kuza. Di mésmu manera, óras ki un algen sta xinti falta di amigus, el pode seta kalker algen pa ser se amigu. Ti pode ser fásil pa algen pruveta di bo. Ku ténpu, bu pode atxa ma kes amizadi ki é sô pa interesi é normal i ma bu ka debe spera nada más midjór.

 Konkluzon: Tudu algen ta xinti el sô di vês en kuandu. Má alguns más di ki otus. Enbóra solidon pode ser un sentimentu kasábi, na verdadi, el é sô un sentimentu. Kuzas ki nu ta xinti ta ben di kuzas ki nu ta pensa i nu pode kontrola kes kuza ki nu ta pensa.

 Tanbê ser ekilibradu na kuzê ki bu ta spera di otus algen. Jeanette, ki dja nu papiaba di el antis, fla: “É ka tudu algen ki ta ba ser bu midjór amigu. Má bu ta ba atxa pesoas ki ta preokupa ku bo i kel-li dja txiga. Kel-li ta djuda-u ka xinti bo sô.”

 Bu meste di más ajuda? Lé kuadru “ Vense medu di ranja amigus”. Tanbê diskarega PDF “Como lidar com a solidão”.