Un jóven ki txoma Elaine, fla: “Kantu ki N odja ma nhas koléga tinha txeu algen ta sigi-s na redi sosial, N pensa: ‘Uau, txeu algen konxe-s!’ Na verdadi, N fika ku un kuzinha di siumis.”

 Dja bu kustuma xinti si? Si dja bu kustuma xinti si, kel artigu li pode djuda-u ivita kai na armadilha di krê ten txeu algen ta sigi-u na redi sosial.

•  Kal ki é kes prigu?

•  “Pesoas ta pensa ma es é txeu konxedu”

•  Ten txeu algen ta sigi-u i ta gosta di kuzas ki bu ta publika, é inportanti mê?

•  Toma kuidadu pa bu ka finji ser umildi

 Bíblia ta fla na Provérbios 22:1: ‘É midjór ten un bon nómi di ki ten txeu rikéza’. Nton, é normal bu krê ten un bon nómi i ti mésmu krê pa otus algen gosta di bo.

 Má alvês kel dizeju li é tantu grandi ki bu ka ta konsigi ser filís timenti bu ka xinti ma txeu algen konxe-u. Kel-li pode ser un prigu? Onya, ki ten 16 anu, ta atxa ma sin. El fla:

 “Dja N kustuma odja algen ta faze kuzas prigozu, sima salta di sugundu andar la na skóla sô pa txeu algen konxe-l.”

 Alguns algen ta filma ses kabésa ta faze kuzas prigozu i es ta pô-s na redi sosial sô pa txoma atenson. Pur izénplu, txeu jóven ta publika na redi sosial, vídius ki es sta ta kume produtus di laba ropa. Kes produtu li ten kuzas ki ta prujudika nos saúdi i ningen ka debe faze kel-la!

 Bíblia ta fla: ‘Ka bu faze nada pamodi dizeju di algen ngaba-u.’ — Filipenses 2:3, Good News Translation.

 Pensa na kel-li:

•   É txeu inportanti pa bo ser konxedu na redi sosial?

•   Bu ta poba bu saúdi i bu vida na prigu, sô pa txoma atenson i pa bus koléga gosta di bo?

 Má nen sénpri pesoas ka ta faze kuzas prigozu pa es pode konxedu. Erika, ki ten 22 anu, repara ma alguns algen ta faze otus kuza. El fla:

 “Pesoas ta publika txeu fotu di ses vida i kel-li ta poi ta parse ma es ten txeu amigu ki es ta pasa ténpu djuntu ku es. Kel-li ta poi otus algen ta pensa ma es é txeu konxedu.”

 Kara, ki ten 15 anu, fla ma alguns algen ka ta ser onéstu sô pa poi otus ta pensa ma es é txeu konxedu. El fla:

 “Dja N odja pesoas ta publika fotus ki ta parse ma es staba na un fésta, má na verdadi es staba na ses kaza.”

 Mateus, ki ten 22 anu, fla ma dja el kustuma faze un kuza kuazi sima kel-li. El fla:

 “N publika un fotu ki ta parse ma N staba na Monti Everesti, má ami nunka N ka bai Ázia!”

 Bíblia ta fla: ‘Nu krê konporta ku onestidadi na tudu kuza.’ — Hebreus 13:18.

 Pensa na kel-li:

•   Si bu ta uza redi sosial, dja bu kustuma publika algun kuza ki é ka verdadi sô pa bu ser más konxedu?

•    Kes fotu i komentáriu ki bu ta publika, ta mostra kenha ki bo é di verdadi i na kuzê ki bu ta kridita?

 Txeu algen ta kridita ma pa bu ser konxedu na redi sosial, bu meste ten txeu algen ta sigi-u i txeu algen ta gosta di kuzas ki bu ta publika. Mateus, ki dja nu papiaba di el antis, fla ma dja el kustuma xinti si. El fla:

 “N ta kustumaba pergunta algen: ‘Kantu algen ki ta sigi-u? Ô kal ki é kuza ki dja bu publika ki algen más gosta?’ Pa N pode tinha más algen ta sigi-m, N ta sigiba algen ki nen N ka konxe i N ta tinha gana pa es sigiba mi tanbê. N komesa ta xinti ma N mesteba pa algen konxeba mi i redi sosial poi kel dizeju li ta bira kada bês más fórti.”

 Maria, ki ten 25 anu, repara ma alguns algen ta atxa ma ses valor ta dipende di kantu algen ki ta sigi-s i di kantu algen ki gosta di kuzas ki es ta publika. El fla:

 “Si un minina publika un fotu na redi sosial i poku algen gosta di kel fotu, el ta atxa ma el é feia. É klaru ki kel-li é un pensamentu mariadu, má txeu algen na kel situason li ta reajiba di mésmu manera. É sima ki es mê, es sta trata ses kabésa mariadu.”

 Bíblia ta fla: ‘Ka nu bira orgulhozu, ta poi algen ta konpiti es ku es i ta inveja kunpanheru.’ — Gálatas 5:26.

 Pensa na kel-li:

•   Bu ta atxa ma redi sosial ta pô-u ta konpara ku otus algen?

•    Bu sta más preokupadu ku kantu algen ki ta sigi-u na redi sosial di ki ten amigus di verdadi i ki ta preokupa ku bo?