Apóstlu Paulu skrebe: “Óras ki N krê faze kel ki é dretu, kel ki é mariadu sta déntu di mi.” (Romanus 7:21) Dja bu kustuma xinti di kel manera li? Si bu respósta é sin, kel artigu li pode djuda-u ka kai na tentason di aji di akordu ku dizejus mariadu.

•  Kuzê ki bu meste sabe

•  Kuzê ki bu pode faze

•  Kuzê ki otus jóven ta fla

 Txeu bês óras ki otus algen ta faze-nu preson nu pode xinti tentadu na faze kuzas mariadu. Na verdadi, Bíblia ta fla ma “maus koléga ta straga bon konportamentu.” (1 Koríntius 15:33, nóta di rodapé) Preson di otus algen, ô di tilivizon, internet i redi sosial pode pô-u ta kria dizejus mariadu na bu korason. Kel-li pode pô-u ta xinti tentadu na faze kuzas mariadu i el pode ti pô-u ta ‘sigi un monti algen pa faze kel ki é mariadu’. — Êxodo 23:2.

 “Kel dizeju pa otus algen gosta di nos i seta-nu pode pô-nu ta faze kalker kuza ki es faze, sô pa nu pode ten ses aprovason.” — Jeremy.

 Pensa na kel-li: Pamodi ki tentason pode ser más fórti si bu ta preokupa dimás ku kuzê ki algen ta pensa? — Provérbios 29:25.

 Konkluzon: Ka bu dexa preson di kolégas pô-u ta faze kel ki bu sabe ma é mariadu.

 Konxe dretu kes kuza ki bu ta kridita na el. Si bu ka konxe dretu kes kuza ki bu ta kridita na el, bu pode bira sima un brinkedu na mô di otus algen. É mutu más midjór nu sigi kel konsedju di Bíblia li: “Nhos djobe dretu tudu kuza. Nhos pega na kel ki é bon.” (1 Tesalonisensis 5:21) Óras ki bu ta intende dretu kes kuza ki bu ta kridita na el, ta fika más fásil bu pega na es i ka kai na tentason di bai kóntra es.

 Pensa na kel-li: Pamodi ki bu ta kridita ma kes lei di Deus é bon pa bo?

 “N da kónta ma sénpri ki N ta mante fiel pa kes kuza ki N ta kridita na el i N ka ta kai na tentason, otus algen ta ruspeta-m más txeu pamodi kel-li.” — Kimberly.

 Izénplu di Bíblia: Daniel. Kantu Daniel inda éra jóven, el ‘disidi na se korason’ ma el ta ben obiba ku leis di Deus. — Daniel 1:8.

 Konxe bus pontu fraku. Bíblia ta pâpia di “kes dizeju di juventudi”, ki é kes dizeju ki ta kustuma sta más fórti óras ki nos é jóven. (2 Timótiu 2:22) Kel-li ka ta inklui sô dizeju seksual, má tanbê dizeju pa otus algen seta-nu i di toma disizons di nos pa nos, óras ki inda nu ka sta prontu pa faze kel-la.

 Pensa na kel-li: Bíblia ta fla ma “kada un ta provadu óras ki se própi dizeju ta atrai-l i ta ingoda-l.” (Tiagu 1:14) Ki dizeju pode bira un tentason más fórti pa bo?

 “Ser onéstu ku bu kabésa sobri kes tentason ki é más fásil bu kai na es. Faze piskiza sobri modi ki bu pode luta kóntra kes tentason i toma nóta di kes pontu ki pode djuda-u. Di es manera, si bu pasa pa kel tentason li otu bês, bu ta sabe modi ki bu ta aji.” — Sylvia.

 Izénplu di Bíblia: Davidi. Na alguns situason, preson di otus algen i se própi dizeju pô-l ta kai na tentason. Má Davidi prende ku se érus i el tenta faze midjór. El faze orason pa Jeová i el fla: ‘kria na mi un korason puru, i poi déntu mi un spritu novu, un spritu firmi.’ — Salmo 51:10.

 Lenbra ma é bo ki ta disidi. Bíblia ta fla: “Ka bu dexa mal vense-u”. (Romanus 12:21) Kel-li krê fla ma abo é ka obrigadu dexa tentason vense-u. Bu pode disidi faze kel ki é dretu.

 Pensa na kel-li: Si bu pasa pa un situason ki bu xinti tentadu na faze un kuza mariadu, kuzê ki bu pode faze pa ten serteza ma bu ta aji di manera sértu i mostra ma é abo ki sta kontrola situason?

 “N ta pensa na modi ki N ta xinti si N kai na kel tentason. N ta xinti midjór? Talvês, má sô pa un momentu. N ta xinti dretu dipôs ki pasa algun ténpu? Nau, N ta xinti sô piór. Bale péna? Nau!” — Sophia.

 Izénplu di Bíblia: Paulu. Sikrê el rekonhese ma el tinha tendénsia di faze kuzas mariadu, Paulu mostra ma el tinha kontrolu sobri kel situason. El skrebe: “N ta disiplina duru nha korpu i N ta leba-l sima skravu”. — 1 Koríntius 9:27, nóta di rodapé.

 Konkluzon: É bo ki ta manda, é bo ki ta disidi si bu ta kai na un tentason ô nau.

 Lenbra, ma kes tentason é sô pa un ténpu. Melissa, ki ten 20 anu, fla: “Txeu kuza ki ta parseba un tentason grandi kantu N staba na liseu, gósi ta parse pikinoti. Pensa na kel-li ta da-m serteza ma tentason ki N sta pasa pa el gósi, tanbê ta ben pasa i un dia N ta ben djobe pa tras i da kónta ma ka kai na tentason foi midjór disizon.”