Bu gosta di un algen i nhos disidi kumesa ta namora pa odja si nhos pode ser un bon maridu ô un bon mudjer pa kunpanheru. Kuzê ki nhos pode spera timenti nhos ta ba ta konxe kunpanheru midjór?

Na kel artigu li

•  Nhos ser sinseru ku kunpanheru

•  Nhos ta ten opinion diferenti

•  Nhos pode spera ma namoru ka ta ser fásil

 Nhos pode prende más sobri kunpanheru timenti nhos ta ba ta pasa ténpu djuntu. Bu ta prende alguns kuza di kel algen óras ki bu ta odja modi ki el ta konporta na situasons diferenti.

 Má simé, ten alguns kuza ki nhos ta meste pâpia ku kunpanheru di manera sinseru. Óras ki nhos ta faze kel-li, nhos ka debe dexa nhos sentimentus inpidi nhos di odja modi ki kuzas é di verdadi.

 Nhos pode pâpia di kuzas sima kes-li:

•   Dinheru. Bu ten algun dívida? Alvês é difísil pa bu uza bu dinheru ku sabedoria? Si bu kaza, modi ki bu ta sustenta bu kabésa i kel algen ki bu kaza ku el, i modi ki nhos ta kuida di nhos dispéza?

•   Saúdi. Bu ten un bon saúdi? Dja bu tevi algun prubléma gravi di saúdi antis?

•   Métas. Kuzê ki bu ta gostaba di faze na bu vida? Bus méta é sima métas di kel algen ki bu sta ta namora ku el? Bu ta kontinua filís dipôs ki bu kaza, sikrê bu situason muda i bu ka konsigi alkansa bus méta?

•   Família. Bu ten algun família ki gósi bu ten responsabilidadi di kuida di el? Bu ta ben ten kel responsabilidadi li na futuru? Bu krê ten fidju? Si sin, kantu ki bu ta gostaba di ten?

 Óras ki bu ta pâpia di kes asuntu li, ser onéstu. Ka bu sukundi nen ka bu muda kes informason sô pa kel otu algen gosta más txeu di bo. — Ebreus 13:18.

 Pensa na kel-li: Kuzê ki bu meste sabe sobri kel algen ki bu sta ta namora ku el? Kuzê ki el meste sabe sobri bo? Modi ki ser onéstu gósi ku kunpanheru pode djuda nhos da dretu ku kunpanheru si nhos disidi kaza?

 Konsedju di Bíblia: “Nhos debe pâpia verdadi ku kunpanheru”. — Efézius 4:25.

 “Kel minina pode pensa: ‘Di li 6 mês nu pode sta noivu.’ Má, kel rapás pode sta ta pensa na faze kel-li sô dipôs di un anu. Na kel situason li, kel minina pode fika maguadu i konfuzu pamodi el staba ta spera faze kel-li más sédu. Pur isu, é inportanti pa es tudu dôs sabe kuzê ki kada un ta pensa sobri kel-li.” — Ariana, ki dja ten un anu kazadu.

 Ka ta izisti dôs algen igual. Pur isu, ka bu pensa ma kel algen ki bu sta ta namora ku el ta ba konkorda ku bo na tudu kuza ô ma el ta ba pensa di mésmu manera ki bo. Nhos manera di pensa pode ser diferenti pamodi nhos kultura i manera ki nhos kriadu.

 Pensa na kel-li: Óras ki nhos ka ta konkorda ku kunpanheru na kes kuza pikinoti, ki ka ta bai kóntra ninhun prinsípiu di Bíblia, nhos ta dexa pasa pa nhos pode mante pas?

 Konsedju di Bíblia: “Nhos dexa tudu algen odja ma nhos é ikilibradu.” — Filipensis 4:5.

 “Mésmu ki nhos ta atxa ma nhos é un kazal ‘perfeitu’, nhos é diferenti. Enbóra konbina ku kunpanheru é inportanti, kes kualidadi ki nhos ta mostra óras ki nhos ka ta konkorda ku kunpanheru é más inportanti inda.” — Mateus, ki dja ten sinku anu kazadu.

 Namoru ta ben iziji txeu di bu ténpu i pode traze alguns preokupason. Kuzê ki pode djuda-u?

 Poi limiti ikilibradu. Ka bu konsentra dimás na bu namoru di manera ki bu ta dexa di kunpri bus responsabilidadi ô dexa di pasa ténpu ku bus amigu. Alana, ki dja ten sinku anu kazadu, fla: “Bu ta kontinua ta meste di bus amigu dipôs ki bu kaza i es tanbê ta kontinua ta meste-u. Ka bu iginora bus amigus sô pamodi bu kumesa ta namora.”

 Lenbra ma dipôs ki bu kaza, bu ta meste ser ikilibradu na tudu ária di bu vida. Nton, pamodi ki bu ka ta tenta ser un algen ikilibradu timenti bu sta ta namora?

 Pensa na kel-li: Bu ta iziji txeu ténpu i atenson di kel algen ki bu sta ta namora ku el? Bu ta xinti ma el sta iziji txeu di bo? Modi ki nhos tudu dôs pode ser ikilibradu asi pa nhos ka xinti kansadu dimás ô sufokadu ku nhos namoru?

 Konsedju di Bíblia: ‘Ten un ténpu markadu pa tudu kuza; ten un ténpu pa tudu kuza ki ta fazedu’. — Eclesiastes 3:1.

 “Si na namoru nhos pasa ténpu djuntu sô ta divirti, nhos pode ten un surpréza kasábi na kazamentu. É bon pa un kazal faze kes trabadju ki es ta faze na ses dia-dia, sima faze kónpra, kuida di kaza i adora Deus djuntu. Kel-li pode djuda-s prende trabadja djuntu, ki é un kuza ki ta ben djuda-s na ses kazamentu.” — Daniel, ki dja ten dôs anu kazadu.

 Lenbra ma namoru é kel ténpu ki ta djuda nhos sabe si nhos ta kaza ku kunpanheru ô nau. Na párti 3 di es grupu di artigu, nu ta ben pâpia sobri kuzê ki bu debe pensa na el antis di bu toma kel disizon li.