PERGUNTAS KI JÓVENS TA FAZE
Pamodi ki nha pai ku nha mai ka ta dexa-m divirti?
Bus amigu konvida-u pa un fésta na fin di simana. Bu ta pergunta bu pai ku bu mai si bu pode bai, i es ta fla-u di manera firmi “nau”. Bu ka sta dimiradu. É kel mésmu respósta li ki es da-u di kel últimu bês.
Na kel artigu li
Pamodi ki nha pai ku nha mai sénpri ta fla nau?
Si bu ta atxa ma sénpri ki bu pidi bu pai ku bu mai algun kuza es ta fla nau, talvês bu pode pensa ma es ka krê pa bu divirti.
É si ki un jóven ki txoma Marie xinti kantu el tevi se primeru telemóvel. El fla: “Nha pai poi txeu régra sobri ki aplikativus ki N pode diskaregaba, kenha ki N pode papiaba ku el i ti ki óra ki N pode papiaba ku el. Má nhas amiga pode fazeba kuzê ki es kreba!”
Pensa na kel-li: Bu ta atxa ma pai di Marie ka kreba pa el divirti? Ku kuzê ki se pai pode staba preokupadu?
Limiti di velosidadi ta tra-u liberdadi di algun manera, má el ta proteje-u di prigu. É kel mê ki ta kontise ku kes régra ki pai ku mai ta kria.
Tenta faze kel-li: Imajina ma bu ten un fidju, ki é jóven, ki ranja un telemóvel. Kuzê ki bu ta preokupaba ku el? Ki régras bu ta kriaba pa protejeba el? Kuzê ki bu ta flaba el si el flaba bo ma bu ka krê pa el divirti?
“Nha pai sénpri ta flaba: ‘Poi na nha lugar.’ Faze kel-li djuda-m odja pamodi ki kes régra é inportanti i pamodi ki el kria-s. Si N tinha fidju, N ta atxa ma N ta speraba pa el sigiba kes mésmu régra ki nha pai ta spera pa N sigi.” — Tanya.
Kuzê ki N pode faze pa nha pai ku nha mai fla sin?
“Grita ka ta rezolve nada. Faze kel-li ta kansa abo i bu pai ku bu mai. Si bu diskuti, bu pai ku bu mai pode atxa ma inda bu sta mininu i ma bu ka sta prontu pa ten más liberdadi.” — Richard.
“Normalmenti nha pai ku nha mai ta ten bons motivu pa kada régra ki es ta kria. Nha pai ku nha mai ka sta tenta inpidi-m di divirti. Kuzê ki es krê é pa N divirti di kel midjór manera ki ten, ki ka ta pô-m na prubléma.” — Ivy.
Konsedju di Bíblia: ‘Algen ki ka ten sabedoria ta mostra tudu se raiba, má algen ki ten sabedoria ta mante kalmu i el ta kontrola-l.’ — Provérbios 29:11.
“Sen nha pai da kónta, N tenta ka sigi kes régra ki el poi sobri modi ki N ta uzaba nha telemóvel. N tenta atxa maneras di manda nhas amiga mensajen di noti ô diskarega kes aplikativu ki nha pai ka ta dexaba mi. Dipôs, el ben da kónta i se régras bira más duru pamodi dja el ka ta kunfiaba na mi. Tenta ka sigi kes régra é ka un bon ideia.” — Marie.
“Ten paxénxa. Pode leba algun ténpu pa bu pai ku bu mai muda un régra. Má si es odja ma bu ta sigi kes régra ki es kria, ten más xansi di es da-u más liberdadi.” — Melinda.
Konsedju di Bíblia: “Nhos obi ku nhos pai i ku nhos mai na tudu kuza”. — Kolosensis 3:20.
“Insisti pa bu ten kel ki bu krê ka ta poi kuzas ta ser más fásil, nen el ka ta dexa-u ten kel ki bu krê.” — Natalie.
“Un pai ku un mai ta krê odja ma bu ta toma bons disizon. Nton, óras ki N ta pâpia ku nha pai i ku nha mai, N ta tenta uza motivus ki ta faze sentidu, envês di kes kuza ki N ta xinti. Óras ki N ta faze kel-li N ta ten bons rezultadu.” — Joseph.
Konsedju di Bíblia: “Onra bu pai ku bu mai.” — Efézius 6:2.
Bu pode gosta di kes-li tanbê
PERGUNTAS KI JÓVENS TA FAZE
Modi ki N pode pâpia ku nha pai ku nha mai sobri ses régras?
Odja modi ki bu pode pâpia ku bu pai ku bu mai ku ruspetu i modi ki bu pode fika spantadu ku kes bon rezultadu.
VÍDIUS DI DIZENHUS NA KUADRU BRANKU
Modi ki N pode ganha más liberdadi?
Bu pode atxa ma bu debe tratadu sima un adultu, má bu pai ku bu mai pode ka konkorda. Kuzê ki bu pode faze pa ganha ses kunfiansa?
WHAT YOUR PEERS SAY
Modi ki N debe pâpia ku nha pai i ku nha mai?
Bu pode ganha más di ki kel ki bu ta imajina.
