Alvês, alguns algen ki ta adora Deus ta pergunta si bale péna gasta tudu kel ténpu i sforsu pa vive sima Bíblia ta fla. (Salmo 73:2, 3) Ti es pode kumesa ta faze kuzas ki ta bai kóntra kel ki lei di Jeová ta fla. Dipôs, es ta tenta sukundi kes kuza mariadu ki es sta ta faze, pa tenta ingana otus algen ki ta adora Deus.

 Kel artigu li fazedu pa djuda kes ki sta ta vive di kel manera li, má ki krê para.

Na kel artigu li

•  Kuzê ki krê fla leba un vida finjidu?

•  Si N sta leba un vida finjidu, kel-li krê fla ma mi é un algen mau?

•  Modi ki N pode para di leba un vida finjidu?

•  Kuzê ki otus jóven ta fla

 Leba un vida finjidu krê fla ma óras ki bu sta ku bus koléga ki ka ta sirbi Jeová, bu ta faze kuzas ki bu sabe ma é mariadu, má óras ki bu sta djuntu ku algen ki ta adora Jeová sima bo, bu ta aji sima si bu krê sirbi Jeová. É sima si bu sta ta vive dôs vida diferenti, i na kada un di es bu sta ta sukundi algun kuza sobri bo.

 “Óras ki bu ta leba un vida finjidu, bu sta ta sukundi algun kuza di bo na tudu dôs ladu. Pur isu, ningen ka sabe kenha ki bo é di verdadi. Nton, óras ki bu ta vive di kel manera li bu sta ta ingana tudu algen.” — Erin.

 Bu sabia? Leba un vida finjidu, pode inklui faze kuzas ki bu sabe ma ka ta agrada Jeová óras ki bu sta bo sô.

 “Kantu N tinha 14 anu, N kumesa ta odja fotus i vídius mariadu na internet. Na frenti di otus algen, N ta ajiba sima si N ta odiaba pornografia. Má na nha korason, N sabia ma N ka ta odiaba el di verdadi.” — Nolan.

 Konsedju di Bíblia: “Ningen ka ta pode ser skravu di dôs dónu. Pamodi ô el ta ôdia un i el ta ama kel otu, ô el ta pega na un i el ta dispreza kel otu”. — Mateus 6:24.

 Nen sénpri. É klaru ki alguns algen disidi ma es ka krê vive di akordu ku kel ki Bíblia ta fla. Má, é si na bu kazu? Ô ten un otu motivu pamodi bu sta ta konporta si, sima:

•   Bu ta xinti stranhu pamodi bo é diferenti di bus koléga.

•   Bu gosta más di kuzas ki bus koléga gosta di ki kes kuza ki irmons di bu kongregason gosta.

•   Bu ta xinti ma bu ka ten forsa i ma bo é ka kapás di sigi tudu kes lei di Deus.

 “N ta atxa ma alguns jóven ki ta leba un vida finjidu, es ta xinti más sábi di sta djuntu ku pesoas ki ka ta sirbi Jeová, pamodi es krê faze párti di algun kuza. Ka ta inporta é kuzê.” — David.

 É klaru ki ninhun di kes motivu li é ka diskulpa pa un algen leba un vida finjidu. Má, el ta djuda-nu intende pamodi ki ti mésmu algen dretu ta kai na kel éru li. Si kel-li sta ta kontise ku bo, kuzê ki bu pode faze?

1.  1. Pensa na modi ki bu sta ta vive gósi. Pergunta bu kabésa: ‘É kel tipu di algen li ki N krê ser? Si N kontinua si, kal ki ta ser rezultadu di kuzas ki N sta faze?’

    Konsedju di Bíblia: ‘Un algen prudenti ta odja prigu, má kes ki ka ten spiriénsia ta kontinua ta bai i es ta kai na prublémas.’ — Provérbios 27:12.

2.  2. Ser onéstu. Pâpia di bu situason ku bu pai i ku bu mai ô ku un amigu maduru ki ta ruspeta leis di Jeová. Talvês, es ta ba fika kontenti pamodi bu txiga na es ta pidi ajuda. I es ta ba fika ku txeu orgulhu di odja ma bu krê faze kel ki é dretu!

    “Un di kes kuza más difísil ki dja N faze, foi konta nhas éru pa otus algen, má kantu N faze kel-li N xinti mutu más midjór.”— Nolan.

    Konsedju di Bíblia: ‘Ken ki ta sukundi se pekadus ka ta ten bons rezultadu, má kel ki ta konfesa-s i ta bandona-s, ta tratadu ku mizerikórdia.’ — Provérbios 28:13.

3.  3. Seta kes rezultadu di bu konportamentu. Lenbra ma si bu sukundi algun kuza di bu pai ku bu mai i di bu kongregason, es pode perde kel kunfiansa ki es tinha na bo. Pamodi kuzê ki bu faze, bu pai ku bu mai i ansions di bu kongregason, pode ka dexa-u faze alguns kuza duránti algun ténpu. Seta kes rezultadu di bu konportamentu i sta disididu na konporta ku “onestidadi na tudu kuza”. — Ebreus 13:18.

    Konsedju di Bíblia: ‘Obi konsedju i seta disiplina, pa bu pode bira sábiu na futuru.’ — Provérbios 19:20.

4.  4. Sforsa pa bu kunfia di verdadi ma Deus ta ama-u. Pamodi Jeová ta ama-nu, el sabe tudu kuza ki nu ta faze. Pur isu, el ta da kónta i el ta fika tristi si bu sta leba un vida finjidu. Má, el tene gana di djuda-u koriji bus éru ‘pamodi el ta kuida di bo.’ — 1 Pedru 5:7.

    Konsedju di Bíblia: ‘Odjus di Jeová ta anda pa tudu téra, pa mostra se forsa pa kes algen ki ten korason konplétu pa el’. — 2 Crónicas 16:9.