Grandi tribulason ta ben ser kel ténpu más difísil ki algen dja pasa pa el. Profesias di Bíblia ta mostra ma el ta ben kontise na “ténpu di fin”. (2 Timótiu 3:1; Daniel 12:4) El ta ben ser un “tribulason, ki sima kel-la nunka ka kontiseba désdi komésu di kriason, ki Deus kria, ti gósi, i nen el ka ta ben kontise otu bês.” — Markus 13:19; Daniel 12:1; Mateus 24:21, 22.

Kuzê ki ta ben kontise duránti grandi tribulason?

•   Relijion falsu ta ben distruídu. Relijion falsu ta ben distruídu faxi di tal manera ki pesoas ta fika dimiradu. (Apokalipse 17:1, 5; 18:9, 10, 21) Deus ta ben uza kes govérnu di mundu, ki Nasons Unidu ta reprizenta, pa distrui relijion falsu. — Apokalipse 17:3, 15-18. a

•   Relijion verdaderu ta ben atakadu. Un grupu di nasons, ki na livru di Ezequiel ta txomadu di ‘Gogi di téra di Magogi’, ta ben tenta kaba ku kes algen ki ta faze párti di relijion verdaderu. Má Deus ta ben proteje kes ki ta adora-l, asi es ka ta distruídu. — Ezequiel 38:1, 2, 9-12, 18-23.

•   Kes algen ki ta mora na téra ta ben julgadu. Jizus ta ben julga tudu algen na téra i “el ta ben sipara pesoas di kunpanheru, sima pastor ta sipara ovelhas di kabritus.” (Mateus 25:31-33) Kuzê ki ta ben mostra si es é ovelha ô kabritu? Si es apoia ô nau kes “irmon” di Jizus ki ta ba governa ku el na séu. — Mateus 25:34-46.

•   Kes ki ta ba governa na Reinu di Deus ta ben djuntadu. Kes algen ki skodjedu pa ba governa ku Kristu, ki kontinua fiel ti fin di ses vida li na téra, ta resusitadu pa ba vive na séu. — Mateus 24:31; 1 Koríntius 15:50-53; 1 Tesalonisensis 4:15-17.

•   Armajedon. Kel-li é “kel géra di kel grandi dia di Deus, kel Tudu-Poderozu” ki tanbê ta txomadu di “dia di Jeová”. (Apokalipse 16:14, 16; Isaías 13:9; 2 Pedru 3:12) Na julgamentu ki Kristu ta ben faze, tudu kes algen ki el disidi ma é inimigu di Deus ta ben distruídu. (Sofonias 1:18; 2 Tesalonisensis 1:6-10) Tanbê el ta ben distrui kel féra di seti kabésa ki Bíblia ta pâpia di el i ki ta reprizenta pulítika di mundu interu. — Apokalipse 19:19-21.

Kuzê ki ta ben kontise dipôs di grandi tribulason?

•   Satanás ku ses dimóni ta ben podu prézu. Un anju poderozu ta ben bota Satanás ku ses dimóni “na abismu” ki ta reprizenta un situason ki un algen ka ta pode faze nada, sima si el sta mortu. (Apokalipse 20:1-3) É sima si Satanás ta ben podu prézu i el ka ta konsigi influensia kuzê ki ta kontise na mundu. — Apokalipse 20:7.

•   Govérnu di mil anu ta ben kumesa. Reinu di Deus ta ben kumesa se Govérnu di mil anu i el ta ben traze txeu benson pa tudu algen na téra. (Apokalipse 5:9, 10; 20:4, 6) “Un monti di algen”, ki ningen ka ta pode konta, ta ben “sai di grandi tribulason” i es ta ben odja Govérnu di mil anu ta kumesa. — Apokalipse 7:9, 14; Salmo 37:9-11.