Pamodi ki Jizus ta txomadu di Fidju di Deus?
Respósta di Bíblia
Bíblia txeu bês ta txoma Jizus di ‘Fidju di Deus’. (João 1:49) Kes palavra ‘Fidju di Deus’ ta mostra ma Deus é Kriador, ô Fonti di tudu vida, ki tanbê ta inklui vida di Jizus. (Salmo 36:9; Apocalipse 4:11) Bíblia ka ta inxina ma Deus bira pai di un fidju sima un algen ta bira pai di un fidju.
Bíblia tanbê ta txoma anjus di ‘fidjus di Deus verdaderu’. (Jó 1:6) I Bíblia ta fla ma kel primeru ómi Adon éra ‘fidju di Deus’. (Lúkas 3:38, Bíblia Na Prugrésu Di Traduson Pa Lingua Kabuverdianu, BPK) Má, dja ki Jizus é kel primeru kriason di Deus i kel úniku ki Deus faze el sô, Bíblia ta mostra ma Jizus é kel Fidju más inportanti di Deus.
Jizus ta viveba na Séu antis di el ben pa Téra?
Sin. Jizus éra un anju na Séu antis di el ben pa Téra. Jizus fla: ‘N dixi di Séu’. — João 6:38; 8:23.
Deus kria Jizus antis di el kria kalker otu kuza. Odja kuzê ki Bíblia ta fla sobri Jizus:
‘El é kel primeru di tudu kriason’. — Colossenses 1:15.
El é ‘kel primeru ki Deus faze kantu el kumesa ta kria’. — Apocalipse 3:14.
Jizus kunpri kel profesia ki ta papiaba di kel ki ‘se komésu é désdi ténpu antigu, désdi kes ténpu txeu antigu.’ — Miqueias 5:2; Mateus 2:4-6.
Kuzê ki Jizus ta fazeba antis di el ben pa Téra?
El tinha un puzison inportanti na Séu. Jizus pâpia di kel puzison ki el tinha na Séu kantu el ora: ‘Nha Pai, da-m glória, kel glória ki N tinha kantu N staba djuntu ku bo antis di mundu izistiba.’ — João 17:5.
El djuda se Pai kria tudu kes otu kuza. Jizus trabadja djuntu ku Deus ‘sima un bon trabadjador’. (Provérbios 8:30) Tanbê, Bíblia ta fla sobri Jizus: ‘Através di el fazedu tudu kes otu kuza na Séu ku na Téra’. — Colossenses 1:16.
Deus uza Jizus pa kria tudu kes otu kuza ki ta izisti. Kel-li ta inklui anjus i Séu ku Téra. (Apocalipse 5:11) Nu pode fla ma trabadju ki Deus ku Jizus faze é sima óras ki un arkitétu i un konstrutor ta trabadja djuntu ku kunpanheru. Kel arkitétu ta dizenha prujétu i kel konstrutor ta uza kel prujétu pa faze kel konstruson.
El éra Palavra. Óras ki Bíblia ta pâpia di vida di Jizus antis di el ben pa Téra, el ta txoma-l di ‘Palavra’. (João 1:1) Kel-li krê fla ma Deus uza se Fidju pa pasa informason i instruson pa kes otu anju.
Tanbê ta parse ma Deus uza Jizus pa ser se Pórta-Vós, ô Palavra, pa pâpia ku algen na Téra. Pode ser ki Deus uza Jizus pa da Adon ku Eva instrusons na jardin di Éden. (Génesis 2:16, 17) Talvês Jizus éra kel anju ki gia israelitas na dizértu i éra se vós ki es tinha ki obiba ku el. — Êxodo 23:20-23. a
a Palavra ka éra kel úniku anju ki Deus uza pa pâpia ku pesoas li na Téra. Pur izénplu, el uza otus anju pa daba israelitas se Lei envês di uza se primeru Fidju. — Atos 7:53; Gálatas 3:19; Hebreus 2:2, 3.
Bu pode gosta di kes-li tanbê
VERDADIS INPORTANTI DI BÍBLIA
Jizus Kristu é Deus?
Jizus Kristu ku Deus Tudu-Poderozu é mésmu algen? Ô es é dôs algen diferenti?
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.