Dipôs di kria kel primeru ómi ku mudjer, Deus uni-s através di un kazamentu. El kria kazamentu pa ómi ku mudjer i ses fidju xinti sábi i suguru. — Génesis 1:27, 28; 2:18.

 Deus krê pa tudu kazal ser filís. (Provérbios 5:18) Na Bíblia el da alguns lei pa kazamentu i tanbê prinsípius ki pode djuda-nu ten bons rezultadu na kazamentu.

Na kel artigu li nu ta ben odja:

•  Kal ki é alguns lei di Deus pa kazamentu?

•  I sobri siparason i divórsiu?

•  Un kazamentu meste ser na rejistu pa Deus aprova?

•  Kuzê ki Bíblia ta fla sobri responsabilidadi di maridu ku mudjer?

•  Deus ta iziji oji pa kes ki é kazadu ten fidjus?

•  Modi ki Bíblia pode djuda nha kazamentu?

•  Testu di Bíblia sobri kazamentu

 Désdi komésu, Deus kria kazamentu pa ser un union entri un ómi ku un mudjer. (Génesis 2:24) Deus ka ta seta pa un algen ten más di un mudjer ô maridu, konportamentu omoseksual ô kazal ki ta vive djuntu sen kaza. (1 Coríntios 6:9; 1 Tessalonicenses 4:3) Jizus inxina se sigidoris pa obi ku kel lei ki Deus da désdi komésu pa kazamentu. — Marcos 10:6-8.

 Pa Deus, kazamentu ten ki ta ser pa tudu ténpu. Óras ki un ómi ku un mudjer ta kaza, es ta promete ma es ta ser lial pa kunpanheru i fika djuntu pa tudu ténpu di ses vida. Deus ta spéra ma es ta kunpri kel promésa li. — Marcos 10:9.

 Pode ten situasons ki maridu ku mudjer pode fika siparadu di kunpanheru, sima óras ki es ta viaja pa kuida di algun prubléma urjenti na família. Bíblia ka ta apoia siparason óras ki un kazal ta ten prubléma na kazamentu. Envês di kel-li, na kel situason li el ta fla ma kazal meste trabadja pa da dretu ku kunpanheru. — 1 Coríntios 7:10.

 Úniku bazi di Bíblia pa divórsiu é adultériu. (Mateus 19:9) Nton, si un maridu ô mudjer disidi sipara ô divôrsia pa kalker otu motivu ki é ka adultériu, Bíblia ka ta aprova pa ninhun di es namora ô kaza ku un otu algen. — Mateus 5:32; 1 Coríntios 7:11.

 Deus ta spéra ma tudu kristons ta obi ku leis di ómis sobri kazamentu. (Tito 3:1) Óras ki un kazal ta rejista ses kazamentu es ta mostra ruspetu pa leis di ómis i pa leis di Deus i ma kazamentu é un konpromisu ki é pa tudu ténpu.

•   Responsabilidadi di kada un. Maridu ku mudjer debe trata kunpanheru ku amor i ruspetu. (Efésios 5:33) Es debe satisfaze dizejus seksual di kunpanheru ku amor i ivita situason ki pode pô-s ka ta ser fiel pa kunpanheru. (1 Coríntios 7:3; Hebreus 13:4) Si es ten fidju, maridu ku mudjer debe dividi responsabilidadi di kria ses fidju. — Provérbios 6:20.

   Bíblia ka ta pâpia di manera klaru sobri modi ki kazal debe dividi trabadju di dia-dia i kes trabadju di kaza. Es pode disidi tudu djuntu kuzê ki é midjór pa ses família.

•   Papel di maridu. Bíblia ta fla ma ‘maridu é kabésa di mudjer’. (Efésios 5:23) El é kabésa pamodi el ki ta kuida di família i toma disizons ki ta djuda se mudjer ku se fidjus.

   El debe sforsa pa da-s kuza ki es ta meste, preokupa ku ses sentimentu i djuda-s ten un amizadi fórti ku Jeová. (1 Timóteo 5:8) El ta mostra ma el ta da valor pa kualidadis i kapasidadis di se mudjer óras ki el ta trabadja djuntu ku el i el ta leba en kónta se opinion i kuzê ki el ta xinti óras ki es sta toma un disizon. (Provérbios 31:11, 28) Bíblia ta fla ma maridu debe kuida di ses responsabilidadi. — Colossenses 3:19.

•   Papel di mudjer. Bíblia ta fla ma ‘mudjer debe ruspeta se maridu di korason.’ (Efésios 5:33) Deus ta fika kontenti óras ki el ta odja mudjer ta ruspeta papel ki el da maridu.

   Se papel é djuda maridu. Djuda-l toma bons disizon i apoia-l kómu kabésa di família. (Génesis 2:18) Bíblia ta pâpia dretu di un mudjer ki ta kunpri kel papel inportanti ki el ten na kazamentu. — Provérbios 31:10.

 Nau. Má na pasadu, Deus da alguns di se sérvu órdi pa ten fidju. (Génesis 1:28; 9:1) Má, kel órdi li ka ta aplika pa kes ki ta sigi Jizus oji. Jizus nunka ka fla se sigidoris pa ten fidju. Nen se sigidoris ka fla ma kenha ki é kazadu debe ten fidju. É kazal ki ta disidi di es pa es si es ta ten fidju ô nau.

 Bíblia ten prinsípius ki pode djuda un kazal kumesa ses kazamentu dretu. Prinsípius di Bíblia tanbê pode djuda un kazal ivita i rezolve prublémas na kazamentu.

 Prinsípius di Bíblia pode djuda un kazal faze kel-li . . .

•   mostra amor di verdadi. — 1 Coríntios 13:4-7; Colossenses 3:14.

•   lida ku diferénsa. — 1 Coríntios 10:24.

•   sta sénpri prontu pa obi ku kunpanheru. — Tiago 1:19.

•   mostra ruspetu. — Romanos 12:10.

•   púrdua. —1 Pedro 4:8.

•   ser lial. — Marcos 10:9.

•   ten paxénxa. — Efésios 4:2, 3.

•   trabadju en ekipa. — Eclesiastes 4:9.

•   bira bu kazamentu más fórti. — Cântico de Salomão 8:7.