Kenha ô kuzê ki é anjus?
Respósta di Bíblia
Anjus é kriaturas ki ten más puder i kapasidadi ki pesoas. (2 Pedru 2:11) Anjus ta mora na un lugar spritual, ki é diferenti di kel séu ku téra ki nu ta odja. (1 Reis 8:27; Juan 6:38) É pur isu ki es pode txomadu di spritus tanbê. — 1 Reis 22:21; Salmo 18:10.
Di undi ki anjus ben?
Deus kria anjus através di Jizus, ki Bíblia ta txoma “kel primeru di tudu kriason”. Pa mostra modi ki Jeová uza Jizus pa kria kes otu kuza, Bíblia ta fla: ‘Através di [Jizus], kriadu tudu kuza na séu i na téra, kes kuza ki nu ta odja i kes kuza ki nu ka ta odja’, i kel-li ta inklui anjus. (Kolosensis 1:13-17) Kada un di kes ‘fidju di Deus verdaderu’ li kriadu. (Jó 1:6) Anjus ka ta kaza i nen es ka ta ten fidjus. — Markus 12:25.
Anjus kriadu mutu antis di téra fazedu. Kantu Deus kria téra, kes anju ‘staba ta grita’ di alegria. — Jó 38:4-7.
Kantu anjus ki ten?
Bíblia ka ta fla nunbru izatu di anjus ki ten, má el ta mostra ma ten un monti di es. Pur izénplu, na un vizon ki apóstlu Juan tevi, el odja senténas di milhon di anju. — Apokalipse 5:11, nóta di rodapé.
Kada anju ten un nómi i un manera di ser?
Sin. Bíblia ta fla nómi di dôs anju: Migel i Gabriel. (Daniel 12:1; Lukas 1:26) a Otus anju tanbê fla ma es ten nómi, má es ka fla kal ki é ses nómi. — Génesis 32:29; Juízes 13:17, 18.
Kada anju ten se manera di ser. Tanbê, es ta pode pâpia ku kunpanheru. (1 Koríntius 13:1) Es é intilijenti i es ten kapasidadi di faze kántikus pa lova Deus. (Lukas 2:13, 14) Tanbê es ten liberdadi di skodje kuzê ki é dretu i mariadu. Pur izénplu, alguns di es peka kantu es djunta ku Satanás i es rabela kóntra Deus. — Mateus 25:41; 2 Pedru 2:4.
Anjus sta divididu na grupus diferenti?
Sin. Kel anju ki ten más puder i más autoridadi é Migel, kel arkanju. (Judas 9; Apokalipse 12:7) Serafins é kes anju ki ten un puzison altu i es sta pértu di tronu di Deus. (Isaías 6:2, 6) Kerubins é un otu grupu di anjus ki tanbê ten un puzison altu i otus responsabilidadi spesial. Pur izénplu, é kes kerubin ki fika di guarda na entrada di jardin di Éden kantu Adon ku Eva tradu di la. — Génesis 3:23, 24.
Anjus ta djuda algen?
Sin, Deus ta uza se anjus fiel pa djuda pesoas oji.
Deus ta uza se anjus pa orienta se sérvus na pregason di notísias sábi di Reinu di Deus. (Apokalipse 14:6, 7) Kes orientason ka ta djuda sô kes ki ta prega, má tanbê kes ki ta obi notísias sábi. — Atus 8:26, 27.
Anjus ta djuda kongregason kontinua livri di influénsia di kes algen ki é mau. — Mateus 13:49.
Anjus ta gia i ta proteje kes algen ki é fiel pa Deus. — Salmo 34:7; 91:10, 11; Ebreus 1:7, 14.
Ka ta dura, anjus ta ben luta djuntu ku Jizus pa kaba ku tudu maldadi i sufrimentu. — 2 Tesalonisensis 1:6-8.
Kada algen ten un anju da guarda?
Deus ta uza anjus pa djuda se sérvus kontinua ku un fé fórti, má kel-li ka krê fla ma Deus ta da kada un di se sérvus un anju pa toma kónta di es. b (Mateus 18:10) Anjus ka ta proteje kes sérvu di Deus di tudu prubléma i tentason ki es ta pasa pa el. Bíblia ta mostra ma txeu bês Deus ta da un algen sabedoria i forsa pa el konsigi aguenta firmi i pa el atxa “un saída” di un prubléma. — 1 Koríntius 10:12, 13; Tiagu 1:2-5.
Alguns ideia mariadu sobri anjus
Ideia mariadu: Tudu anju é bon.
Verdadi: Bíblia ta pâpia di ‘kes forsa spritual di mal’ i di ‘kes anju ki peka’. (Efézius 6:12; 2 Pedru 2:4) Kes anju mau li é dimónis, ki djunta ku Satanás i es rabela kóntra Deus.
Ideia mariadu: Anjus ka ta móre.
Verdadi: Kes anju mau, ki ta inklui Satanás, ta ben distruídu. — Judas 6.
Ideia mariadu: Óras ki un algen móre, el ta bira un anju.
Verdadi: Anjus é ka pesoas ki móre i resusitadu. Es é un otu kriason di Deus. (Kolosensis 1:16) Kes algen ki Deus ta resusita pa ba vive na séu ka ta móre más. (1 Koríntius 15:53, 54) Es ta ten un puzison más altu ki anjus. — 1 Koríntius 6:3.
Ideia mariadu: Anjus kriadu pa sirbi pesoas.
Verdadi: Anjus ta obi ku leis di Deus. Es ka ta obi ku nos leis. (Salmo 103:20, 21) Ti Jizus tanbê rekonhese ma si el mesteba di ajuda, el ka ta pidiba anju, má el ta pidiba Deus. — Mateus 26:53.
Ideia mariadu: Nu pode ora pa anjus pa pidi-s ajuda.
Verdadi: Orason ta faze párti di nos adorason, i é sô Jeová ki nu debe adora. (Apokalipse 19:10) Nu debe ora sô pa Deus, através di Jizus. — Juan 14:6.
a Alguns traduson di Bíblia ta uza nómi “Lúsifer” na Isaías 14:12. Pamodi kel-li, alguns algen ta atxa ma Lúsifer é nómi di kel anju ki bira Satanás, ô Diabu. Má, kel nómi li na ebraiku krê fla ‘brilhanti’. Na kes versíklu antis i dipôs di Isaías 14:12 ta mostra ma kel nómi li ka sta ligadu ku Satanás, má el sta ta pâpia di kes rei di Babilónia ki Jeová ta ba rabaxaba pamodi ses orgulhu. (Isaías 14:4, 13-20) Kel palavra ‘brilhanti’ uzadu pa faze kes rei di Babilónia trósa dipôs ki es distruídu.
b Alguns algen ta atxa ma kuzê ki kontise ku Pedru kantu el tradu di kadia ta mostra ma Pedru tinha se própi anju da guarda. (Atus 12:6-16) Má, kantu disiplus pâpia sobri ‘anju [di Pedru]’, pode ser ki es staba ta atxa ma un anju bai pâpia ku es na nómi di Pedru.
Bu pode gosta di kes-li tanbê
RESPÓSTAS PA PERGUNTAS DI BÍBLIA
Ken ki é Migel, kel anju prinsipal?
El é konxedu tanbê pa otu nómi ki di sertéza bu konxe.
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.