Kuzê ki é ‘txabis di Reinu’?
Respósta di Bíblia
‘Txabis di Reinu’ krê fla autoridadi di abri pórta pa algen ‘entra na Reinu di Deus.’ (Mateus 16:19; Atos 14:22) a Jizus da apóstlu Pedru ‘txabis di Reinu di Séu’. Kel-li krê fla ma Pedru resebe autoridadi pa da informasons sobri modi ki kes algen fiel ta resebeba spritu santu i entra na Reinu di Séu.
Modi ki kes txabi uzadu?
Pedru uza autoridadi ki Deus da-l pa abri kaminhu pa três grupu diferenti di algen entra na Reinu di Deus:
Judeus ku kes algen ki bira judeu. Poku ténpu dipôs ki Jizus móre, Pedru insentiva monti algen ki éra judeu pa seta Jizus kómu kel algen ki Deus skodje pa governa na Reinu. Pedru mostra-s kuzê ki es tinha ki faze pa es ten salvason. É di kel manera li ki Pedru abri kaminhu pa es entra na Reinu. I monti algen ‘seta se palavra’. — Atos 2:38-41.
Samaritanus. Un ténpu dipôs Pedru mandadu pa samaritanus. b Más un bês, Pedru uza txabi di Reinu, kantu el ku apóstlu Juan ‘ora pa kes samaritanu resebe spritu santu.’ (Atos 8:14-17) Kel-li abri kaminhu pa samaritanus entra na Reinu.
Gentis di otus nason. Três anu i meiu dipôs ki Jizus móre, Deus mostra Pedru ma gentis di otus nason, ô gentis ki ka éra judeu, tanbê ta tinha xansi di entra na Reinu. Nton, Pedru uza un di kes txabi kantu el prega pa gentis di otus nason. Di kel manera li el abri pórta pa es resebe spritu santu, pa es bira disiplus di Jizus i ten speransa di governa na Reinu. — Atos 10:30-35, 44, 45.
Kuzê ki siginifika ‘entra na Reinu’?
Kes ki ta ‘entra na Reinu’ ta governa djuntu ku Jizus la di Séu. Bíblia ta fla ma es ta ben ‘xinta na tronus’ i es ta ben ‘reina sobri Téra.’ — Lucas 22:29, 30; Apocalipse 5:9, 10.
Ideias mariadu sobri kes txabi di Reinu
Ideia mariadu: É Pedru ki ta disidi ken ki ta entra na Séu.
Verdadi: Bíblia ta fla ma é Jizus Kristu ki ta ‘julga kes bibu i kes mortu’, é ka Pedru. (2 Timóteo 4:1, 8; João 5:22) É Pedru própi ki fla kel-li sobri Jizus: ‘É el ki Deus skodje pa ser juís di algen bibu i di algen mortu.’ — Atos 10:34, 42.
Ideia mariadu: É Pedru ki disidi ki ténpu ki kes txabi di Reinu ta sérba uzadu.
Verdadi: Kantu ki Jizus pâpia sobri txabis di Reinu, el fla Pedru: ‘Tudu kuza ki bu liga na Téra, ta fika ligadu na Séu, i tudu kuza ki bu disliga na Téra, ta disligadu na Séu.’ (Mateus 16:19, Missionários Capuchinhos) Nbóra alguns algen ta atxa ma kes palavra li krê fla ma é Pedru ki ta disidi modi ki ta uzadu kes txabi di Reinu, má kel manera ki kes vérbu uzadu primeru na gregu, ta mostra ma kes disizon ta tomadu primeru na Séu i dipôs Pedru ta sigi-s, é ka Pedru ki ta toma kes disizon primeru.
Bíblia ta mostra na otus testu ma Pedru sô staba ta sigi orientason di Séu kantu el uza kes txabi di Reinu. Pur izénplu, el faze sima Deus fla kantu el uza kel tirseru txabi. — Atos 10:19, 20.
a Na Bíblia, ‘txabi’ alvês ta reprizenta autoridadi i responsabilidadi. — Isaías 22:20-22; Apocalipse 3:7, 8.
b Relijion di samaritanus éra diferenti di relijion di judeus, má es ta kriditaba na alguns kuza ki staba na Lei ki Deus da Muizés.
Bu pode gosta di kes-li tanbê
ESSENTIAL BIBLE TEACHINGS
Kuzê ki é Reinu di Deus?
Na se trabadju di pregason, kuza ki más Jizus pâpia di el éra Reinu di Deus. Dja ten txeu ténpu ki se sigidoris ta ora pa kel Reinu ben.
RESPÓSTAS PA PERGUNTAS DI BÍBLIA
Kenha ki ta bai pa Séu?
Txeu algen ta pensa ma tudu algen dretu ta bai pa Séu, má kel ideia li ka sta dretu. Kuzê ki Bíblia ta inxina?
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.