Sin. Deus ta preokupa óras ki un di se sérvus sta duenti. Bíblia ta fla: ‘Jeová ta djuda-l óras ki el sta duenti na kama.’ (Salmo 41:3) Si bu sta ta vive ku un duénsa ki ka ten kura, odja três kuza ki pode djuda-u:

1.   Faze orason pa Deus da-u forsa pa bu aguenta firmi. Bu pode resebe ‘pas di Deus ki ningen ka ta konsigi ntende’, ki pode djuda-u fika ménus preokupadu i aguenta firmi. — Filipenses 4:6, 7.

2.   Ser puzitivu. Bíblia ta fla: ‘Korason kontenti é un bon ramedi, má spritu dizanimadu ta kaba ku forsa di algen.’ (Provérbios 17:22) Prende ka leba tudu kuza asériu dimás. Faze kel-li ta djuda-u fika kontenti na kes dia ki bu sta tristi i tanbê el é bon pa bu saúdi.

3.   Bira bu fé na promésa di Deus pa futuru más fórti. Un speransa fórti pode djuda-u ten alegria sikrê bu sta ta vive ku un duénsa ki ka ten kura. (Romanos 12:12) Bíblia ta pâpia di un ténpu ki ‘ningen ka ta ben fla: “N sta duenti.”’ (Isaías 33:24) Nton, Deus ta ben kaba ku kes duénsa ki ka ten kura, ki é un kuza ki siênsia di oji ka ta konsigi faze. Pur izénplu, Bíblia ta fla ma kes algen bédju ta ben bira jóven otu bês i ku bon saúdi. El ta fla: ‘Pa se karni bira más frésku di ki kel di un jóven; pa el torna volta pa kes dia ki el tinha forsa di juventudi.’ — Jó 33:25.

 Nóta: Nbóra Tistimunhas di Jeová ta rekonhese ma Deus ta djuda, tanbê es ta djobe ajuda di dotoris pa faze tratamentus di kes duénsa ki ka ten kura. (Marcos 2:17) Má, nu ka ta rakumenda ninhun tipu di tratamentu; nu ta atxa ma kada algen debe toma se própi disizon na kes asuntu ki ten aver ku saúdi.