Dja dura ki kes algen ki ta studa animal diskubri kel kapasidadi ki kraka ten di pega riju na rótxas, na kais i na barkus. Ta fladu ma kóla di kraka é mutu más fórti ki kalker otu tipu di kóla ki ta fazedu. Má, manera ki kraka ta pega na kes lugar modjadu, éra un mistériu duránti txeu ténpu.

 Pensa na kel-li: Studus ki fazedu ta mostra ma óras ki un larva di kraka dja sta más grandi i ki el ta konsigi nada, el ta djobe dretu txeu lugar antis di el skodje un pa el pega na el. Sientistas ta kridita ma óras ki larva skodje kel lugar, el ta produzi dôs líkidu. Kel primeru é un líkidu sima óliu ki ta tra agu di kel lugar ki el skodje pa el pega i el ta pripara kel lugar pa el baza kel sugundu líkidu, ki ten proteínas ki ta txomadu di fosfoproteínas.

 Kes dôs líkidu li djuntu ta kria un plaka ki ta pega riju, ki nen bakitérias ka ta konsigi distrui-l. Kel kapasidadi li é inportanti pamodi kraka ta pasa réstu di se vida pegadu na kel lugar.

 Kel prosésu di faze kel kóla ta nvolve más kuza di ki kel ki sientistas ta pensaba antis. Un algen ki ta faze párti di kel ekipa ki diskubri kel prosésu li, fla: “É un soluson natural i txeu intilijenti ki ta djuda rezolve prubléma di kria barera di agu na un lugar.” Kes diskubérta li, pode djuda kes algen ki ta faze piskiza, kria kóla ki pode uzadu dibaxu di agu i tanbê pa kria kólas natural pa uza na kes aparelhu iletróniku i pa dotoris uza na alguns tipu di operason.

 Kuzê ki bu ta atxa? Kóla di kraka ben di ivoluson? Ô tevi un algen ki faze-l?