Kalker algen ki dja kustuma tenta mata un móska sabe modi ki é difísil konsigi faze kel-la. Pamodi kapasidadi ki móska ten di reaji faxi, kuazi sénpri es ta konsigi skapa óras ki algen ta tenta pega-s.

 Sientistas diskubri ma ten un tipu di móska, ki txoma móska di fruta, ki ten kapasidadi di faze movimentus sima kes ki avions di kasa ta faze, má na ménus di un sugundu. Michael Dickinson, ki é un profesor di universidadi, fla ma lógu ki kes móska li ta nase, “es ta konsigi bua sima un pilotu profisional. É sima poi un bebé ki kaba di nase pa el konduzi un avion di kasa i kel bebé sabe dretu modi ki é pa el faze.”

 Alguns di kes algen ki ta faze piskiza, filma movimentus ki kes móska ta faze i es diskubri ma es ta da ku aza 200 bês na kada sugundu. Má es meste da ku aza sô un bês pa es konsigi muda di direson i fuji di prigu.

 Tanbê kes algen ki ta faze piskiza diskubri ma kes móska li ta reaji faxi óras ki es xinti amiasa. Es ta reaji 50 bês más faxi di ki óras ki un algen ta piska odju. Profesor Michael Dickinson splika ma “kel móska li ta faze un kálkulu txeu difísil i uma faxi pa sabe di undi ki prigu sta ta ben i kal ki é midjór direson pa el fuji.”

 Kes algen ki ta faze piskiza krê diskubri modi ki sérbru txeu pikinoti di un móska di fruta ta konsigi faze kel-li.

 Kuzê ki bu ta atxa? Kapasidadi ki un móska di fruta ten na bua ben di ivoluson? Ô tevi un algen ki faze-l?