Pipinu-di-mar é un animal ki ta sta na fundu di mar i na rótxa di koral. Se péli pode ten txeu ruga, el pode ten uns kuza sima bruga ô ti el pode ten spinhus. Se péli ta muda txeu di akordu ku situason ki el sta. Na poku minutu ô ti na alguns sugundu se péli pode bira txeu móli, sima jelatina ô txeu riju, sima un padás di madera. Kel kapasidadi li ki el ten, ta djuda-l bira móli pa el konsigi entra na braku txeu pikinoti i tanbê fika txeu riju asi pa kes animal ki ta krê pega-l, ka konsigi tra-l di la. Pipinu-di-mar ten kes kapasidadi li pamodi se péli é spetakular.

 Pensa na kel-li: Péli di pipinu-di-mar pode muda pa fika di três manera diferenti: móli, riju i entri móli i riju. Pa el konsigi faze kel-li, pipinu-di-mar ta liga ô disliga ligamentus ki el ten na se péli através di proteínas ki ta pô-l ta bira riju ô móli.

 Kes proteína ki ta poi se péli bira riju, ta djunta kes ligamentu ki pipinu-di-mar ten na se péli. Kes proteína ki ta poi se péli bira móli, ta disliga kes ligamentu. Péli di pipinu-di-mar pode bira txeu móli ti ki ta parse ma el sta ta disfaze.

 Sientistas sta ta kôpia kapasidadi ki pipinu-di-mar ten di muda se péli, pa es faze uns material ku kel mésmu kapasidadi. Un di ses obijetivu é kria uns material, ki ta txomadu eletrodu, pa es uza na operason di sérbru. Es krê faze kes material di un manera ki es ta fika riju, asi pa es podu na lugar sértu na sérbru, duránti operason, má omésmu ténpu pa es ser di un manera ki dipôs es ta bira móli, asi pa ten más xansi di operason kóre dretu.

 Kuzê ki bu ta atxa? Péli di pipinu-di-mar, ki é ben fetu, ben di ivoluson? Ô tevi un algen ki faze-l?