‘Ami é Jeová. Kel-li é nha nómi; N ka ta da ningen nha glória, nen nha lovor pa imajis na fórma di státua.’ — Isaías 42:8, Tradução do Novo Mundo.

 Deus ta fla-nu kal ki é se nómi i el ta fla-nu tanbê ma el ka ta dividi se glória ô lovor ku ninhun deus falsu.

  Deus da se kabésa kel nómi li, ki na Kabuverdianu nu ta fla ‘Jeová’. Na alguns Bíblia na purtugês nu ta atxa skrebedu “Jeová” ô “Javé”. a (Êxodo 3:14, 15) Nbóra nómi di Deus ta parse kuazi 7 mil bês na Velho Testamento (Skrituras Ebraiku-Aramaiku), txeu tradutor troka-l pa titlu “SINHOR” (tudu ku létra grandi). Un izénplu di kel-li sta na Salmo 110:1, ki ten un profesia ki ta pâpia di Jeová i di Jizus. Bíblia verson Rei Jaime na Inglês ta fla: ‘SINHOR [Jeová] fla nha Sinhor [Jizus].’ (Atos 2:34-36) Na Tradução do Novo Mundo nu ka ta fika konfuzu sobri kenha ki é kes dôs ‘Sinhor’, pamodi el ta poi nómi di Deus na lugar ki el debe sta. El ta fla: ‘Jeová fla nha Sinhor: “Xinta na nha ladu direita, ti ki N poi bus inimigu dibaxu di bus pé.”’

 Txeu studiozu ta kridita ma nómi di Deus ta siginifika “El ta faze kontise”. É sô kel Deus verdaderu ki ta konsigi vive di akordu ku kel nómi li, pamodi é sô el ki pode faze se kabésa ô se kriason bira kalker kuza ki el krê pa el faze se vontadi kontise.

  Pamodi el é nos kriador i kel úniku Deus verdaderu ki ten, Jeová ta merese pa nu adora sô el. Ka ten más nada nen más ningen ki ten direitu di resebe nos adorason i kel-li ta inklui imajis i kalker otu algen ô kuza ki pesoas ta adora. — Êxodo 20:2-6; 34:14; 1 João 5:21.

 Na kes primeru versíklu di Isaías kapítlu 42, Jeová faze un profesia sobri trabadju di se ‘skodjedu’. Deus fla ma kel sérvu di sel li ki ta agrada-l ‘ta ben traze justisa pa nasons.’ (Isaías 42:1) Sobri kel promésa li, Deus fla: ‘Gósi, N sta ben pâpia nhos di kuzas novu. Antis di es kontise, N ta fla nhos es.’ (Isaías 42:9) Kel profesia sobri ‘kel ki Deus skodje’ kunpri txeu séklu dipôs, kantu Misías ô Kristu txiga i el faze se trabadju di pregason na téra. — Mateus 3:16, 17; 12:15-21.