SPLIKASON DI TESTUS DI BÍBLIA

João 3:16 — ‘Pamodi Deus ama mundu di tal manera’

TOKA

João 3:16 — ‘Pamodi Deus ama mundu di tal manera’

‘Pamodi Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.’ — João 3:16, Tradução do Novo Mundo.

Kuzê ki João 3:16 ta siginifika

Deus ta ama-nu i el krê pa nu vive pa tudu ténpu. Pamodi kel-li, el manda se Fidju, Jizus Kristu, pa ben pa Téra. Timenti Jizus staba na Téra, el faze kuzas txeu inportanti. Pur izénplu, el inxina se sigidoris sobri se Deus i Pai. (1 Pedro 1:3) Otu kuza txeu inportanti ki el faze é ki el da se vida pa pesoas. Pa nu konsigi ganha kel vida pa tudu ténpu, nu meste ten fé na Jizus.

Kes palavra ‘el da se Fidju unijénitu’, ta mostra ma Deus ta ama-nu rei di txeu. a Jizus é un Fidju di Deus ki ka ten igual. Modi? É sô Jizus ki Deus kria sen ajuda di ningen. (Colossenses 1:17) El é ‘primeru di tudu kriason’. (Colossenses 1:15) Tudu kes otu kriason, ki ta inklui kes otu anju, kumesa ta izisti através di Jizus. Má, Jeová b Deus staba dispostu na manda se Fidju ki más el ta ama ‘pa sirbi i pa da se vida pa resgata un monti di algen.’ (Mateus 20:28) Jizus sufri i móre pa el pode liberta-nu di pekadu ku mórti, ki nu erda di primeru ómi, Adon. — Romanos 5:8, 12.

Mostra fé na Jizus ta nvolve más di ki kridita na el ô rekonhese kuzê ki el faze pa nos. Nu meste prova nos fé na Fidju di Deus i nu ta prova kel-li óras ki nu ta obi ku el i sigi se pasus. (Mateus 7:24-27; 1 Pedro 2:21) Bíblia ta fla: ‘Ken ki mostra ma el ten fé na Fidju, ta ten vida pa tudu ténpu; ken ki ka obi ku Fidju ka ta odja vida’. — João 3:36.

Kuzê ki kes versíklu antis i dipôs di João 3:16 ta fla

Jizus fla kes palavra la timenti el staba ta pâpia ku un xéfi di relijion di judeus ki txomaba Nikodemus. (João 3:1, 2) Na kel konbérsu la, Jizus konta alguns kuza inportanti sobri Reinu di Deus c i sobri ‘nase otu bês’. (João 3:3) Tanbê el konta modi ki el ta moreba. El fla: ‘Fidju di Ómi ta ben labantadu [pregadu na un staka], asi pa tudu algen ki ta kridita na el pode vive pa tudu ténpu.’ (João 3:14, 15) Dipôs el distaka ma é Deus ki da pesoas kel xansi di vive pamodi se grandi amor pa es. Jizus tirmina ta splika ma pa nu konsigi ten vida, nu ten ki mostra fé i faze kuzas ki ta agrada Deus. — João 3:17-21.

a Palavra na língua gregu ki traduzidu pa ‘unijénitu’ é monogenes. Ten un publikason ki splika ma el ta siginifika “un i úniku. . . kel úniku di se tipu ô grupu, úniku (di se tipu).” — Léxico Grego-Inglês do Novo Testamento e de Outra Primitiva Literatura Cristã (A Greek-English Lexicon of the New Testament and Other Early Christian Literature, p. 658).

b Jeová é nómi di Deus. — Salmo 83:18.

c Reinu di Deus, ki tanbê ta txomadu ‘Reinu di Séu’, é un govérnu ki ta manda la di Séu. (Mateus 10:7; Apocalipse 11:15) Deus skodje Jizus Kristu pa ser Rei di kel Reinu. Reinu di Deus ta ben kunpri vontadi di Deus pa Téra. (Daniel 2:44; Mateus 6:10) Pa bu sabe más, odja artigu “Kuzê ki é Reinu di Deus?”