SPLIKASON DI TESTUS DI BÍBLIA
Josué 1:9 — ‘Ten koraji i ser fórti’
‘N ka fla-u pa bu ten koraji i pa bu ser fórti? Ka bu dexa medu toma kónta di bo, pamodi Jeová, bu Deus, ta sta ku bo pa undi ki bu bai.’ — Josué 1:9, Tradução do Novo Mundo.
Kuzê ki Josué 1:9 ta siginifika
Ku kes palavra li, Jeová a Deus garanti Juzué, ki éra se sérvu fiel, ma el podia ‘ten koraji i ser fórti’ sikrê el pasaba pa situasons difísil ô pa kuzas ki podia dexaba el ku txeu medu. Dja ki Jeová ta staba ku Juzué pa djudaba el lida dretu ku kalker situason, el ka tinha ninhun motivu pa el xintiba medu di kuzas ki podia ben kontiseba ku el si el obiba ku mandamentus di Deus. Deus mostra ma el staba ku Juzué pamodi el orienta-l i el djuda-l ganha géra kóntra se inimigus.
Modi ki Juzué podia ‘ten koraji i ser fórti?’ El podia atxaba forsa i koraji na kes Skritura ki Jeová daba es na kel ténpu. Kel-li ta inkluiba ‘tudu Lei ki Muizés, sérvu di [Jeová] da [Juzué].’ b (Josué 1:7) Jeová fla Juzué pa ‘le-l ku vós baxu dia ku noti’. (Josué 1:8) Lé i pensa txeu na kuzê ki el lé, ta poba se korason ta fikaba más fórti pa faze vontadi di Deus. Pur isu, Juzué meste ajiba di akordu ku tudu kel ki el prende na Palavra di Deus. Asi, el ta ‘kunpriba ku kuidadu tudu ki staba skrebedu na el.’ Si el fazeba kel-li, el ta konsigi ajiba ku sabedoria i el ta tinha bons rezultadu. É kel-li própi ki kontise. Nbóra el nfrenta dizafius, el tevi un vida filís i el mante fiel pa Jeová duránti tudu se vida. — Josué 23:14; 24:15.
Kes palavra ki Jeová fla Juzué ta kontinua ta da-nu forsa oji. Es ta mostra modi ki Jeová ta nporta ku tudu se sérvus, prinsipalmenti óras ki es ta pasa pa prubléma. El krê pa es lida dretu ku ses situason sima Juzué faze! I sima Juzué, es pode ‘ten koraji i ser fórti’ óras ki es ta lé Bíblia sénpri i pensa txeu na kuzê ki es ta lé i aji di akordu ku kel ki es lé.
Kuzê ki kes versíklu antis i dipôs di Josué 1:9 ta fla
Dipôs ki Muizés móre, Jeová manda Juzué pa lidera nason di Israel. (Josué 1:1, 2) Na kel ténpu, israelitas staba prontu pa entra na Kanan, kel Téra ki Deus prometeba es. Má es tinha ki nfrentaba inimigus ki éra fórti. Pur izénplu, Juzué tevi ki géra ku kes kananeu ki éra rei di mau. c (Deuteronómio 9:5; 20:17, 18) Tanbê kes kananeu éra más txeu i es staba más ben priparadu pa géra di ki israelitas. (Josué 9:1, 2; 17:18) Má Juzué sigi ku koraji kes orientason ki Jeová da-l. I Deus mostra ma el staba ku el, pamodi kes israelita vense maioria di ses inimigu sô na 6 anu. — Josué 21:43, 44.
a Nómi Jeová é un traduson na Kabuverdianu di kes kuatu létra na Ebraiku יהוה (YHWH), ki ta forma nómi di Deus, ki ta txomadu Tetragrama. Na New International Version (Nova Versão Internacional) kel nómi li traduzidu pa “SINHOR” na es versíklu. Pa sabe más informason sobri Jeová i pamodi ki alguns traduson di Bíblia ka ta uza kel nómi li, djobe artigu: “Ken ki é Jeová?”
b Kes skritura, ki skrebedu ku orientason di spritu santu, ki Juzué tinha i ki gósi nos tudu nu pode atxa-s na Bíblia, talvês ta inkluiba kes sinku livru ki Muizés skrebe (Génesis, Êxodo, Levítico, Números i Deuteronómio), livru di Jó i un ô dôs Salmo.
c Pa sabe más sobri pamodi ki kes géra kontise, djobe artigu “Por que Deus guerreou contra os cananeus?” na Sentinéla di 1 di janeru di 2010, na purtugês.
Bu pode gosta di kes-li tanbê
ENSINUS DI BÍBLIA
Ajudas pa studa Bíblia
Skodje publikasons, vídius ô otus ajuda pa bu pode studa Bíblia di un manera ki bu ta prende más.
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.
