“Pamodi ka ten nada ki Deus ta fla ki el ka ta pode faze.” — Lukas 1:37, Traduson di Mundu Novu.

 Deus Tudu-Poderozu pode faze kuzas ki pa nos ta parse ma el ka ta pode faze. Ka ten nada ki ta inpidi-l di kunpri kuzê ki el fla ô ki el promete.

 Dja ki Jeová a Deus sénpri ta kunpri kel ki el fla, na gregu kel testu orijinal na Lukas 1:37 tanbê pode traduzidu si: “Pamodi promésas di Deus nunka ka pode fadja” ô “Pamodi pa Deus nada é ka inposível”. Kes traduson li di kel testu gregu orijinal ta pâpia di kel mésmu verdadi: ninhun kuza ki Deus fla ô promésa ki el faze ka ta fika sen kunpri, pamodi ka ten nada ki el ka ta pode faze. — Isaías 55:10, 11.

 Na Bíblia nu ta atxa otus ideia sima kel-li sobri kes promésa di Deus. Pur izénplu, Jeová uza un anju pa fla ma Sara, mudjer di Abraon, ta ben fikaba grávida sikrê dja el staba algen grandi. Deus fla tanbê: ‘Ten algun kuza ki Jeová ka ta pode faze?’ (Génesis 18:13, 14) Dipôs ki Jó pensa na kriason di Deus, el fla: ‘Ka ten nada ki bu sta pensa na el ki bu ka ta pode faze.’ (Jó 42:2) Un bês, kantu disiplus di Jizus fla-l ma es ka sabia si kel ki es staba ta faze ta txigaba pa es ser salvu, Jizus lenbra-s ma “Deus ta pode faze tudu kuza.” — Mateus 19:25, 26. b

 Un anju ki txoma Gabriel fla Maria, un jóven judeu ki éra vírjen, kes palavra ki sta na Lukas 1:37. Gabriel fla-l ma el ta ben tinha un fidju, ki é “Fidju di kel Más Grandi”, i ma el debe poba el “nómi di Jizus.” El ta ben biraba Rei di Reinu di Deus, ki ta ben governa pa tudu ténpu. — Lukas 1:26-33; Apokalipse 11:15.

 Maria pergunta-l modi ki kel-la pode kontiseba dja ki el ka éra kazadu i inda el éra vírjen. (Lukas 1:34, 35) Gabriel fla-l ma Deus ta ba uzaba Se spritu santu, ô Se forsa, pa faze kel-la. Na kel ténpu, Jizus éra un fidju spritual di Deus na séu. Pur isu, Jeová uza se spritu santu pa poi vida di se Fidju la di séu na bariga di Maria. (Juan 1:14; Filipensis 2:5-7) Nton, Jeová faze un milagri i Maria fika grávida. Pa djuda Maria ten un fé más fórti na puder di Deus, kel anju fla-l ma Elizabeti, se família ki dja staba ‘di idadi’, staba grávida. Elizabeti i se maridu, Zakarias, ka tinha ninhun fidju pamodi Elizabeti ka ta konsigi fikaba grávida. (Lukas 1:36) Ku ténpu ses fidju, ki txomaba Juan Batista, nase. Tanbê Jeová dja papiaba sobri trabadju di pregason di Juan. — Lukas 1:10-16; 3:1-6.

 Talvês anju Gabriel staba ta pensa na Maria i Elizabeti kantu el fla kes palavra ki sta na Lukas 1:37. Kes mésmu palavra li ta garanti kes ki ta adora Jeová oji ma el ta kontinua ta kunpri se promésas. Kel-li ta inklui se promésa di troka tudu govérnus di ómi pa kel govérnu justu di se Fidju, Jizus Kristu, ki é Rei di Reinu di Deus na séu. — Daniel 2:44; 7:13, 14.

 Odja kel vídiu li pa bu sabe más sobri livru di Lukas.