Di dia 23 ti 28 di julhu di 2024, fazedu Fera Internasional di Luanda na sidadi di Luanda, na Angola. Kel-li ta faze 39 bês ki es sta ta faze-l. Kel atividadi li ki ta fazedu tudu anu, tinha kuazi 1.800 aprizentason i kuazi 100 mil algen bai odja-l. Tistimunhas di Jeová arma un lugar i es mostra publikasons ki ten bazi na Bíblia na 9 língua. Tanbê, na kel lugar ki es arma tinha spasu pa pesoas xintaba i prendeba más sobri nos studu di Bíblia. Duránti kel fera mostradu 227 bês modi ki nos studu di Bíblia ta funsiona i más di 100 algen pidi pa es fazedu un vizita na ses kaza.

Kantu un mudjer txiga pértu di kel armason i el fla ma el krê prendeba más sobri Bíblia, un irman oferese-l un studu di Bíblia. Duránti ses konbérsu, kel mudjer faze-l txeu pergunta i el mostra interesi prinsipalmenti na kes promésa di Bíblia sobri futuru. Gósi el sta ta studa Bíblia tudu simana ku nos irman.

Otu mudjer fika dimiradu kantu ki el fika ta sabe ma nu ka ta pagadu nada pa inxina otus algen sobri Bíblia. Nos irman splika-l ma nu ta faze kel-li pamodi nu krê pâpia di notísias sábi sobri Reinu di Deus pa más algen ki nu ta pode. Dipôs ki kel irman pasa ta sabe ma kel mudjer dja studaba Bíblia ku Tistimunhas di Jeová antis, el mostra-l vídiu Kuzê ki ta kontise na un Salon di Reinu? Kel mudjer fika kontenti di sabe ma tudu algen é konvidadu pa sisti nos runion i el fla ma el krê prendeba más.

Un mudjer di Purtugal, ki ba vizita kel fera, fika kontenti di odja Tistimunhas di Jeová la. El fla ma sénpri el ta pâpia ku se vizinha ki é Tistimunha di Jeová. Tanbê el fla: “Nhos organizason ta dexa-m txeu dimiradu! N krê prende más sobri el.” Kel mudjer fla ma óras ki el voltaba pa kaza el ta ba pidiba se vizinha pa studa Bíblia ku el.

Nu sta txeu kontenti pamodi txeu algen na Angola sta ta mostra interesi na prende más sobri Bíblia i es sta ta seta konviti di Jeová di ben toma di grasa kel “agu di vida.” — Apokalipse 22:17.