Na dia 12 di agostu di 2022, nu tirmina di filma kel primeru fazi di párti 1 di vídiu Stória di vida i trabadju di pregason di Jizus. Ka ta dura nu ta ben kumesa ta filma kel sugundu fazi i el ta tirmina na mês di otubru di 2022.

Sima dja nu flaba na otu rilatóriu, irmons kumesa ta filma kel vídiu Stória di vida i trabadju di pregason di Jizus na dia 20 di maiu di 2022. Maioria di kes gravason li fazedu na stúdiu. Na kel ténpu, irmons inda staba ta spéra kes últimu dukumentu pa es kumesa ta uza párti di un prédiu i tanbê dukumentu pa kes lugar fóra di stúdiu, ki es ta ba uzaba pa filma kes séna antigu. Es konsigi tudu kes dukumentu ki es mesteba na dia 15 di julhu di 2022. Dipartamentu di Konstruson di Filial di Australázia intrega Ekipa Rijional di Vídiu (RVT) kes lugar di gravason li pa es pode kumesa ta filma.

Más di 500 voluntáriu di Austrália i Nova Zilándia partisipa na konstrui kel lugar ki ten más di 7 mil métru kuadradu, ki ta ba filmadu kes séna antigu. Irmon Russell Grygorcewicz, ki é kordenador di Kumison di Konstruson, fla: “Enbóra nu pasa pa txeu dizafiu, nu odja klaru ma Jeová djuda-nu lida ku tudu es. Di sertéza, é spritu di Jeová ki djuda-nu faze tudu kes kuza li.”

Irmon Ronald Curzan, ki é ajudanti di Kumison di Ensinu, staba la kantu es kumesa ta filma primeru fazi. El fla: “Éra bunitu odja kes irmon voluntáriu di konstruson i kes di família di Betel ta trabadja unidu ku kunpanheru. Dipôs di txeu anu ta organiza i ta konstrui kel lugar li, nu sta kontenti di pode uza-l gósi. Odja tudu kel apoiu ki irmons di tiritóriu di Australázia sta ta da, ta anima-nu txeu. Di sertéza, kel grupu di vídiu li sobri vida i ensinus di Jizus, ki ten 18 párti, ta ben toka korason di pesoas na mundu interu.”

Irmon Kenneth Cook, di Grupu Enkaregadu di Óbra, ki staba la na kes dia ki es staba ta tirmina di filma kel primeru fazi di párti 1, fla: “Nu ta odja klaru ma nos Pai, Jeová, sta ta orienta kel prujétu li. Pur isu, nu ta agradese Jeová i tudu kes algen ki trabadja duru i ki partisipa di korason na pripara i na filma kel prujétu li. Nu ta ora pa kel grupu di vídiu li, ki é spesial, ben djuda txeu algen sigi Jizus más midjór i bira más amigu di Jeová.”