Kumison di Filial na Brazil dja organiza 18 Kumison di ajuda na ténpu di dizastri, pa djuda kes publikador ki tene prubléma ku dinheru pamodi prubléma di koronavírus na mundu. Kes kumison sta ta djuda uns 12 mil kongregason na kel país interu, ki ta inklui nos irmons ki ta mora na kes lugar lonji, pértu di riu di Amazónia. Ti gósi 131 família na Amazónia dja resebe ajuda.

Kel kumison na Manaus, ki é kapital di stadu di Amazonas, pripara kuzas ki ta txiga pa un família uza duránti un mês. Es poi kumida sima fijon, farinha di mandióka, arôs i leti en pó. Tanbê es poi kuzas di linpéza sima sabon, papel di kaza-banhu, skovas di denti i pasta di denti. Irmons manda kes kuza li pa un kais di Manacapuru, ki ta fika pértu, i dipôs es leba kes kuza na boti pa alguns lugar ki ta fika izoladu sima Membeca i Lago do Castanho.

Dipôs ki irman Marinelma, ki ta mora na Lago do Castanho, resebe ajuda di kumida, el fla: “Primeru, N ta agradese Jeová pamodi el sta ta kuida di nos. Nu staba ta meste txeu di ajuda, pamodi nu ka tinha dinheru pa kunpra kumida. Tanbê, N ta gostaba di agradese irmons pamodi kuzas ki es da-nu i pamodi ses amor. Kantu nha fidju matxu, ki ten 6 anu, odja-m ta tra kes kuza ki nu dadu i ta ruma-s, N pruveta pa splika-l ma Jeová uza irmons pa djuda-nu. Nton el fla-m: ‘Mamá, nu pode faze un orason pa agradese Jeová?’”

Irmon Jonas Monteiro, ki ta mora ku se família na sidadi di Caapiranga, manda un karta pa kel kumison. Un párti di kel karta ta fla: “Nu ta agradese di korason pamodi kel ajuda ki nhos da-nu. Kel ki nhos faze pa nos ta mostra-nu ma Jeová ta ama-nu. Di sertéza é un priviléjiu grandi faze párti di es família ki sta na mundu interu.”

Kes irmon ki ta trabadja na kes kumison di ajuda tanbê xinti nkorajadu. Isaac Emannuel Ramalho de Oliveira, un ansion ki ta sirbi na un di kes kumison, fla: “Tudu dia ki N ta trabadja ku Kumisons di ajuda na ténpu di dizastri, N ta xinti ma nha fé sta ta fika kada bês más fórti. N ten sertéza ma nha trabadju na kel kumison li ta djuda-m mutu más txeu di ki kes irmon ki nu ta leba ajuda.”

Óras ki nu ta odja modi ki Jeová sta ta kuida di se sérvus duránti kel duénsa li, ka nporta na undi ki es sta, nos fé ta fika más fórti. — Salmo 94:14.