Itália é un di kes país ki fika más prujudikadu pa koronavírus (COVID-19). Grupu Enkaregadu di Óbra da filial di Itália orientason pa es djuda irmons ku kuzas ki es meste i tanbê pa es djuda-s mante ses amizadi ku Jeová fórti.

Três Kumison di Ajuda sta ta kuida di nisisidadis di irmons na nórti, na séntru i na sul di Itália. Enkaregadus di grupu di kongregason ta sta sénpri ta resebe informasons di ansions di kada kongregason, sobri nisisidadis di kes publikador ki fika prujudikadu ku es situason li i es ta pasa kes informason pa kes Kumison di Ajuda.

Alén di djuda publikadoris ku kuzas ki es meste, ansions sta ta djuda-s kontinua ku ses atividadi spiritual. Irmon Villiam Boselli, ki é un enkaregadu di grupu di kongregason, ta sirbi pértu di Milan, ki é un di kes primeru sidadi ki fika prujudikadu pa koronavírus. El fla: “Nbóra irmons ten ki fika déntu kaza, es ta kontinua ta pâpia ku kunpanheru. Tanbê es ta nkoraja kunpanheru i es ta pâpia di ses fé através di runions ki ta fazedu pa vídiu. Ti kes irmon ki dja sta grandi sta ta tra pruvetu di runions pa vídiu. N ta atxa ma gósi kongregason sta mutu más unidu!”

Alén di kel-li, famílias di nos irmons ki é ka Tistimunha di Jeová, gósi sta ta sisti runions djuntu ku es. Un irman fla: “Nha maridu nunka ka kria bai sisti runion, má gósi nu ten runions na nos kaza. . ., i nhos sabe un kuza? El sta ta gosta di es!”

Irmons sta ta pruveta tudu xansi pa da tistimunhu. Pur izénplu, kantu ki un irman staba ta konduzi pa el ba leba un kadera di róda pa otu irman ki dja sta di idadi, três pulísia manda-l para. Kel irman splika-s ma el staba ta bai djuda un sinhora ki dja sta grandi i el mostra-s autorizason ki el tinha pa faze kel-la. Dipôs el da kada un di es kes folhetu: Kuzê ki bu ta spéra di futuru? i Sufrimentu ta kaba un dia? Kes pulísia toma-s. Kantu ki kel irman staba ta volta kes pulísia torna para-l. Má di es bês, es agradise-l i es pidi-l más informason sobri speransa ki Bíblia ta da. Ti es konvida más dôs koléga pa obi kel konbérsu. Nos irman fika kontenti di mostra-s site jw.org. Un di kes pulísia fla-l: “Obrigadu sinhora, nha poi nos dia fika más sábi!”

Irmon Villiam fla: “Nbóra un di nhas responsabilidadi é da otus forsa i konsola-s, é mi ki irmons sta ta da forsa pamodi N ta odja ma es sta ta mante ses amizadi ku Jeová fórti i es sta disididu na aguenta firmi. Ses amor pa Jeová é sinseru própi i bunitu di tal manera ki ta pô-m ku lágua na odju. Nos irmons é un grandi prizenti di Jeová. Nu ka ta pode sta sen es!”

Ta fika klaru ma nos irmons sta ta mante ses amizadi ku Jeová fórti i ma es ka sta ‘ku medu pamodi kel tribulason li’. — 1 Tessalonicenses 3:2, 3.