Kumison di filial na Malauí faze planu pa dadu runions di kongregason na rádiu ku tilivizon. Otus algen, ki é ka nos irmons, tanbê sta ta sisti kes prugrama. Ten más di 100 mil Tistimunha di Jeová na Malauí, má kes enpréza di tilivizon ku rádiu ta fla ma talvês uns 2 milhon di algen ta sisti runion na tilivizon i uns 8 milhon ta obi-l na rádiu na fin di simana.

Sima sta kontise na otus país, nos irmons na Malauí ka sta ta sisti runion na Salon di Reinu, pa es pode kunpri kes limiti ki govérnu poi pamodi koronavírus. Kuazi tudu publikadoris di kes kongregason ta konsigi sisti tilivizon ô rádiu. Pur isu, mésmu kes ki ka ta pode paga ô ten un prugrama pa sisti runion na internet, pode sisti runion através di rádiu ô tilivizon.

Runions ta dadu na Xixeua, ki é língua prinsipal di Malauí. Tanbê kel prugrama ta traduzidu pa língua jestual di Malauí manenti, timenti sta ta dadu na tilivizon. Alén di un diskursu pa públiku, ta podu vídius ô leitura di Bíblia dramatizadu na runion pa públiku. Na fin, kes ki sta ta obi ô ta odja prugrama, ta konvidadu pa vizita site jw.org pa es pode ten más informason na otus língua.

Runions na tilivizon ku rádiu sta ta kaba ku txeu di kes ideia mariadu ki pesoas ten sobri Tistimunhas di Jeová. Un ómi skrebe kel-li: “N obi nhos diskursu na rádiu na kes últimu simana li. Es ta da respóstas ki ta mostra algen ma kes kuza mariadu ki gentis ta fla sobri nhos é kasí. Diskursus ki nhos ta faze é txeu diferenti di kes di otus relijion, pamodi es ta toka nos korason!” Kel ómi li kumesa ta studa Bíblia ku Tistimunhas di Jeová, djuntu ku se família.

Augustine Semo, ki é enkaregadu di Dipartamentu di Informason pa Públiku na Malauí, fla: “Runions na tilivizon ku rádiu sta ta djuda nos irmons mante ses amizadi ku Jeová fórti. Tanbê es sta ta djuda otus algen, ki é ka Tistimunha di Jeová, konxe kuzas ki nu ta inxina ku bazi na Bíblia. Óras ki kuzas volta pa normal na Malauí, nu ten speransa ma nu ta odja monti di algen djuntu ku nos na Salon di Reinu.”

Nu ta fika kontenti di sabe ma nos irmons i otus algen na Malauí sta ta resebe informasons ki ta bira ses fé fórti, duránti es ténpu difísil ki nu sta ta pasa pa el. Kel-li ta pô-nu xinti más gratidon pa ‘skravu fiel’ ki ta faze tudu pa kumida spritual txiga na nos tudu. — Mateus 24:45.