Pamodi risku ki ten pa kes algen di idadi si es panha koronavírus, nos irmons ku irmans di idadi sigi kes orientason ki autoridadis di saúdi da, pa es fika na kaza. Má es mante okupadu i es ka fika bandonadu. Es sta ta uza tekinolojia pa partisipa na runions i na trabadju di pregason.

Na Roma, na Itália, un irman di 94 anu, ki batiza na anu di 1952, ka ta pode sai di kaza pamodi se saúdi mésmu antis di kel duénsa li spadja. Nbóra el ta odjaba runions na JW Stream, dja tinha algun ténpu ki el ka ta konsigi sistiba runions na se kongregason. Má gósi ki ansions di la sta ta faze runion ta uza prugramas na internet, el ta konsigi odja tudu irmons ku irmans di se kongregason i sisti runion.

Na sidadi di Spanish Fork, na stadu di Utah, na Mérka, irman Stephanie Aitken, ki é surda, ta vive na un lugar ki ta podu algen di idadi i ki gósi es proíbi resebe vizitas. Un ansion ku se mudjer djuda kel irman instala un aplikativu na se tablet. Dja ki pórta di kel lugar éra di vidru es mostra-l modi ki el ta instalaba kel aplikativu através di língua jestual. Kantu irman Stephanie instala kel aplikativu el fika uma kontenti ki el brasa se tablet. El sta kontenti pamodi el ta konsigi kumunika ku se kongregason.

Sima nos irmons ku irmans, ti kes algen di idadi tanbê, ta uza tekinolojia pa pode nfrenta es situason difísil na mundu interu, nu ta lenbra ma Jeová promete ma se povu ta ben bebeba ‘leti di nasons’ ku sabedoria. (Isaías 60:16) Nu sabe ma Jeová ta bira kel ki se sérvus meste na ténpus di frónta.