Na dia 1 di junhu di 2023, txeu Betel na mundu interu kumesa ta resebe vizita otu bês. Kel-li kontise dipôs di más di três anu fitxadu pamodi COVID-19. Foi un dia spesial pa kes algen ki ta faze párti di família di Betel i pa kes milhar di algen ki bai vizita.

Sima kes algen ba ta txiga, kes betelita resebe-s ku kartás skrebedu nhos é ben-vindu, ku múzika, ku sorizu i abrasu. Ellis Bott, ki kumesa ta sirbi na sédi mundial na Warwick, na Nova Iórki, duránti pandemia, fla: “Foi un kuza inkrível odja betelitas na fila, na ladu fóra ku kartás ta fla nhos é ben-vindu! Txeu lágua di alegria ki N odja lenbra-m modi ki Betel é un lugar spesial própi.” Alexis Alexander, ki ta trabadja ku Betel, fika txeu kontenti di kunprimenta i di resebe dretu kes algen ki ba faze vizita. El fla: “Odja amor di irmons pa Jeová i pa Se kaza, foi un kuza spesial.”

Mi-yeon Jo staba txeu kontenti di leba se fidju di 8 anu, Yoon, pa vizita skritóriu di filial di Koreia di Sul. Yoon staba tantu kontenti di ba vizita Betel ki na kel noti antis el ka konsigi durmi. Mi-yeon fla: “Lógu ki nu korda, nu obi múzika di Pedru ku Sufia di óras ki es ta vizita Betel. Ti nu obi kel múzika na karu kantu nu staba ta viaja pa la.” Yoon gosta txeu di kel vizita ki el fla: “Úniku kuza ki falta pa Betel ser un paraízu é animal.”

Noah Johnsen, un rapás ki é di Alberta, na Kanadá, ki ten un duénsa gravi, sénpri krê ba vizitaba Betel na Nova Iórki, na Mérka. Dja ki el ka ta konsigi viaja di avion pamodi se prubléma di saúdi, se pai ku se mai konduzi uns 4.100 km pa ba vizita Betel di Wallkill, na Nova Iórki, na Mérka. Noah fla kel-li sobri kel vizita ki el faze: “Tudu kuza ki N pasa la, N pode rezumi-l sô na un palavra, amor. N xinti amor di Jeová i amor di irmons.”

Fyodor Zhitnikov, ki ten 76 anu, i se mudjer, Yulita, staba txeu kontenti pamodi es bai vizita muzeu di Betel na Kazakiston. Un párti di muzeu ta mostra stória di txeu irmon ki mante fiel duránti dékadas. Fyodor gosta txeu di kel aprizentason pamodi el sirbi Jeová djuntu ku txeu di kes irmon. Fyodor xinti txeu gratidon pa trabadju ki fazedu pa pripara kel aprizentason. El fla: “Si tudu kes anu li, irmons guarda kuzas ki nu faze na pregason i na otus atividadi, N ten serteza ma Jeová ta lenbra i el ta da valor pa trabadju ki kada un di nos ta faze.”

Nu sta txeu kontenti di torna resebe vizita na kes Betel na mundu interu. Nu sta ku vontadi di resebe kes milhar di algen ki fika di ben faze vizita! — Salmo 122:1.

Dibaxu sta alguns fotu di irmons ki vizita Betel i muzeus na mundu interu.