Tistimunhas di Jeová sta ta faze ses midjór pa proteje ses kabésa i pa proteje otus di koronavírus, má simé alguns di nos irmons móre pamodi kel vírus li. (Eclesiastes 9:11) Infilismenti, ti gósi na mundu interu, 872 irmon ku irmans dja móre pamodi koronavírus. Nos irmons sta ta djuda lógu kes ki perde ses família ô amigus i es sta konsola-s. (1 Coríntios 12:26) Má más inportanti inda é ki nos irmons sta ta kunfia na Jeová, ki é kel ki sénpri ta kunpri se promésa di da-nu ‘pas di Deus’, sima Filipenses 4:7 ta fla.

Un irman ki xinti konsolu ki organizason di Jeová ta da, é irman Hannchen Unnützer, ki é un pionera spesial na Bolzano, na nórti di Itália. Infilismenti, se maridu, irmon Manfred Unnützer, móre dia 28 di marsu di 2020 pamodi koronavírus. Irmon Manfred tevi kuazi 58 anu na sirvisu spesial i el ku se mudjer sirbi djuntu duránti kuazi 54 anu. Es tevi 25 anu djuntu ta sirbi kongregasons. Kuazi mil irmon di país diferenti sisti se funeral através di vídiu.

Irman Hannchen fla: “N ta xinti txeu gratidon pa nhas irmon. Nunka es ka dexa-m mi sô, nen un óra. N xinti ma es krê-m rei di txeu! Es djuda-m lida ku nhas sentimentu, es djuda-m kuida di nha amizadi ku Jeová i es djuda-m ku kuzas ki N meste. N ta ama tudu nhas irmon.”

Otu kazal ki sta ta resebe konsolu é Maria Jose Moncada i se maridu, ki txoma Darwin. Es ta sirbi na língua kixua na montanhas di Ekuador. Infilismenti mai ku pai di irman Maria Jose móre. Se mai txomaba Fabiola Santana Jordan, el tinha 56 anu i el éra pionera fíksu, i se pai éra irmon Ricardo Jordan, ki tinha 60 anu i el éra ajudanti di kongregason, na kongregason Praderas, na Guayaquil. Un di es móre na un dia i 6 dia dipôs kel otu móre. Dôs irmon di irman Maria Jose tanbê panha koronavírus má dipôs es fika dretu.

Irman Maria Jose staba tristi dimás, pur isu el staba ta pensa faze un viaji di kuatu óra pa bai vizita se família, pa konsola-s i djuda-s ku kuzas di ntéru. Má el ku se maridu faze txeu orason i es odja ma bai pa Guayaquil ka éra un bon ideia. Nton es disidi pâpia ku ses família através di vídiu. Irman Maria Jose fla: “Si nu ba fikaba djuntu ku nos família, nu podia poi nos saúdi i saúdi di otus na prigu.”

Irman Maria Jose fla ma el staba tristi dimás i txeu preokupadu, má el ku se maridu kontinua ku ses atividadi spritual i es ka para di faze orason, ta pidi orientason di Jeová. Es kontinua ta pripara pa Komemorason di mórti di Jizus. Es konvida ses studanti di Bíblia i es fika ta lé pártis di Bíblia, ki ta pâpia sobri kes últimu dia di Jizus na Téra. Tanbê es faze pregason através di kartas i es kontinua ta sisti runion através di vídiu. Nóvi algen di família di irman Maria Jose, ki é ka Tistimunha di Jeová, seta se konviti pa sisti Komemorason na spanhol.

Irman Maria Jose fla: “Kantu nu odja studantis di Bíblia ta sisti Komemorason através di vídiu, kel-la da-nu txeu forsa pamodi é ka un kuza fásil pa es.” El fla tanbê: “Nu fika dimiradu i nu xinti kontenti kantu nu odja nos família na otus país ta sisti Komemorason djuntu ku nos tanbê.”

Irman Maria Jose kontinua ta fla: “Kel spiriénsa li mostra-nu ma sikrê na situason ki ta traze-nu txeu dór, midjór manera di nu konsigi lida ku el é kontinua ku nos atividadi na sirvisu di Jeová. Asi nu ta da Jeová xansi di abensua-nu.”

Nos irmons i irmans na mundu interu sta ta sufri djuntu ku kes ki ses família ô amigus móre pamodi koronavírus. I nu ta kontinua ta faze orason pa es. Nu tene gana di odja kel ténpu ki Jeová ta ben kaba ku tudu kuza ki ta traze dór, sima duénsa i el ta ben resusita se sérvus fiel ki móre. — 1 Coríntios 15:21, 22.