Kes otu artigu di es grupu di artigu mostra modi ki jw.org sta uzadu pa distribui vídius i publikasons na formatu dijital i tanbê modi ki sta dadu informasons di kunfiansa sobri kes kuza ki sta ta kontise gósi ki ta afeta Tistimunhas di Jeová. Kel últimu artigu li di es grupu di artigu, ta ben mostra modi ki jw.org sta ta uzadu pa apoia trabadju di pregason na mundu interu.

Línguas: Kantu kel novu verson di jw.org fika disponível na agostu di anu 2012, pájina prinsipal staba traduzidu na 139 língua. Má na agostu di anu 2014, kel anu ki fazedu kanpanha pa distribui kel folhetu pa djuda pesoas konxe jw.org, kel nunbru dja omentaba pa 500 língua. I é interesanti pamodi kel-la ta inkluiba 22 língua jestual. Oji, jw.org ten informasons disponível na más di 1070 língua i kel-li ta inklui más di 100 língua jestual.

Artigus déntu di óra: Na otubru di anu 2019, fazedu un novu verson di pájina prinsipal di jw.org pa mostra un imajen grandi ki ta txoma atenson di un artigu prinsipal i dibaxu di el ta parse três otu artigu. Modi ki pájina prinsipal sta gósi é kel midjór manera di txoma atenson pa kes informason ki sta na jw.org ki ten aver ku pregason. Dipôs, Dipartamentu di Redason i di Arti organiza un manera más rápidu di kria kes artigu prinsipal i kes imajen, asi pa pájina prinsipal sénpri ten artigus di kuzas ki sta kontise gósi na mundu. Pur izénplu, pájina prinsipal mostra artigus sobri duénsa di COVID-19 ki afeta mundu interu, géra entri Rúsia i Ukránia i kes txeu rafujiadu ki tevi pamodi géra.

Jw.org sta djuda pesoas atxa informasons sobri nos: Jw.org ta djuda kes algen ki sta interesadu atxa informasons di kunfiansa sobri nos organizason i nos trabadju. Tanbê kes algen ki sta interesadu pode pâpia ku Tistimunhas di Jeová através di jw.org, si es krê prende más. Un mudjer ki é surda, studa Bíblia ku Tistimunhas di Jeová kantu el staba na adulesénsia. Má dipôs ki el muda di kaza, el ka konsigi pâpia más ku Tistimunhas di Jeová. El krê kumesaba ta studa otu bês, má inda ningen ka ba vizitaba el na se novu kaza. El lenbra di jw.org i el prenxe kel formuláriu ta pidi pa un Tistimunha di Jeová vizita-l. Poku dia dipôs, dôs pionera spesial konku na se pórta. El volta ta studa i tanbê el kumesa ta sisti runions. Gósi el sta batizadu i el sta ta inxina se três fidju sobri Jeová. El fla: “N ta agradese Jeová pa jw.org, pamodi si N ka prenxeba kel formuláriu ta pidi un vizita, N tinha ki spera ti ki N inkontraba ku un Tistimunha di Jeová na algun lugar pur akazu.”

Sima trabadju di pregason ta ba ta omenta, nu ta fika kontenti di sabe ma organizason di Jeová ta kontinua ta da-nu feraméntas ki ta da rezultadus pa djuda kes algen ki ten interesi. — Isaías 60:22.

• Vídius ki diskaregadu tudu mês

• Kantu algen pur dia ki ta vizita jw.org tudu mês

• Na marsu di 2013 fazedu lansamentu di logotipu di jw.org

• Na julhu di 2014 jw.org fika disponível na língua jestual

• Na otubru di 2019 fazedu un novu verson di pájina prinsipal di jw.org pa txoma más atenson di pesoas

• Na janeru di 2021 dadu avizu di lansamentu di livru Vive filís pa tudu ténpu!