Komemorason di mórti di Jizus di 2020 marka stória di povu di Deus. Pa primeru bês, prugrama di Komemorason dadu na tilivizon ku rádiu na txeu lugar na Áfrika i na línguas diferenti.

Pamodi kel-li, más di 407 mil publikador i tanbê otus algen ki mostra interesi konsigi odja prugrama di Komemorason. Nbóra nu ka ten sertéza di kantu algen ki sisti prugrama, nu sabe ma más di 150 milhon di algen ta konsigi sisti kes prugrama di kes tilivizon ku rádiu ki dadu Komemorason.

Pamodi koronavírus (COVID-19), maioria di algen sisti Komemorason através di vídiu, má na Áfrika txeu publikadoris ta vive na lugaris ki internet ku sirvisus di tilifóni é karu dimás, nton é difísil es konsigi odja ô diskarega vídius. Pur isu, Grupu Enkaregadu di Óbra aprova pa alguns filial faze kontratu pa un bon présu ku tilivizons i rádius pa es da prugrama di Komemorason na ses zóna i na país interu.

Antis di Komemorason, 11 filial ki ta fika na Angola, Benin, Kamaron, Kósta di Marfin, Repúblika Demokrátika di Kongu, Gana, Malauí, Mosanbiki, Senegal, Zánbia, i Zinbábue, pâpia ku enprézas di rádiu i tilivizon i es organiza tudu pa diskursu di Komemorason dadu na más di 36 lugar ki ta fika na 16 país.

Angola

Sais enpréza di rádiu da prugrama di Komemorason na 6 língua diferenti: na ibinda, kikongu, kinbundu, nianeka, purtugês i na unbundu. Kes rádiu li ta da na alguns di kes lugar ki ten más algen na Angola.

Kongu (Kinxasa)

Un studanti di Bíblia faze planu pa odja Komemorason el sô, pamodi se família éra kóntra Tistimunhas di Jeová. Má kantu el staba ta konpo pa sisti diskursu di Komemorason, se pai fla la di sala: “Dja kumesa!” El bai pa sala i el fika spantadu pamodi tudu se família staba djuntu pa sisti Komemorason na tilivizon. Dés algen di se família sisti Komemorason.

Na un zóna pértu di Luena, un algen ki é ka Tistimunha di Jeová fla: “Nos pastor ka faze nada. Má anhos, nhos kontinua ta adora nhos Deus sikrê ku koronavírus. Nu ta sisti nhos Komemorason!”

Gana

Un enpréza di tilivizon, ki ta da pa odja na kel país interu, da prugrama di Komemorason na língua tui. Inda es fika ta da un publisidadi ta konvida pesoas pa odja Komemorason. Ti es mostra vídius Pamodi ki Jizus móre? i Pamodi ki Deus ta dexa maldadi ku sufrimentu kontise? Inda es mostra vídius di kes múzika Kel mundu novu ki sta ben i Sta kuazi ta kontise.

Senegal

Un irman fla: “Papiadu di Jeová na tilivizon i na rádiu. Nen ka ta da pa kridita! Nu xinti txeu abensuadu i kontenti. Nu xinti orgulhu di nos Deus, Jeová!”

Un otu irman fla: “Kantu ki N obi ma ta dadu diskursu di Komemorason na tilivizon, N fla nha kabésa: ‘Kel-li é nos xansi di faze kel ki nu ka konsigi faze na kanpanha pamodi koronavírus.’ N kumesa lógu ta aviza nhas studanti, nhas revizita i tudu kes algen ki N konxe ki é ka Tistimunha di Jeová. Nóvi di nhas studanti di Bíblia i ses família konsigi sisti diskursu. Un di nhas primu ki odja prugrama na tilivizon na Ziguinchor pergunta-m si nu podia pâpia sobri kel téma más tardi. N fika kontenti i N fla-l ma sin.”

Kel-li é más un próva ma ka ten nada ki Jeová ka ta pode faze. — Mateus 19:26.