Pamodi koronavírus (COVID-19), pa alguns irmon, sima kes ki sta na ospital ô na kes lugar ki ta kuidadu di kes algen ki dja sta grandi, foi difísil pa es konsigi sisti Komemorason. Na txeu di kes lugar, es ka tinha autorizason pa sai i nen pa resebe vizita. Sikrê ku kes dizafiu li, kes irmon konsigi sisti kel runion más inportanti di anu, ku ajuda di ansions di ses kongregason.

Na un sidadi ki txoma Naju, irman Lee Jeom-soon, ki ten 91 anu, i irman Kwon Ae-soon, ki ten 88 anu, i tanbê un sinhora, ki ten 96 anu i ki mostra interesi, staba disididu na sisti Komemorason. Un di kes dotor, ki ta trabadja na kel lugar ki es ta sta, é Tistimunha di Jeová. Dipôs di sisti Komemorason na kaza ku se kongregason, el torna volta pa kel lugar i el djuda kes irman i kel sinhora pa es konsigi sisti Komemorason na jw.org. Tanbê el leba-s pon ku vinhu di Komemorason.

Na sidadi di Uijeongbu, irmon Choi Jae-cheol ta trabadja na un lugar ki 14 irmon ki dja sta di idadi ta mora la. Sikrê ku koronavírus, nos irmons konsigi djuda kes irmon ki ta mora la i kes algen ki mostra interesi pa es sisti Komemorason através di vídiu. Es kumesa studus di Bíblia ku alguns di kes algen ki sisti Komemorason i ki mostra interesi.

Irman Kim Tae-sun ten 59 anu i el ta mora na Cheonan. Dja ten 5 anu ki irman Kim diskubri ma el tene kánser. Ka dura li el internadu na ospital pamodi el staba ta xinti txeu dór. Irman Kim ta sta na mésmu kuartu na ospital ku otu irman ki txoma Kim Jeong-mi. El ten 69 anu i el tene un kánser ki dja sta txeu avansadu. Nos irmans ka pode sai di ospital duránti koronavírus. Má, ku ajuda di ansions di ses kongregason, es konsigi sisti Komemorason djuntu ku ses kongregason através di vídiu.

Kes dôs irman skrebe un karta pa es mostra ses gratidon di korason pa kes ansion. Es fla: “Obrigadu pamodi nhos djuda-nu sisti Komemorason i sta djuntu ku nos irmons sikrê ku es situason di koronavírus i ku nos duénsa.”

Un irman ki txoma Mieko Fujiwara, ki ten 70 anu i ki ta mora na zóna di Mie, na Japon, staba na ospital. Nos irman ka ta konsigiba sisti Komemorason djuntu ku se kongregason através di vídiu, pamodi na kel ospital ka tinha internet pa duentis uza. Pur isu, algun ténpu antis, un ansion di se kongregason ku se mudjer konsigi pasa-l diskursu di Komemorason pa se aparelhu. Nton, nos irman konsigi sisti Komemorason na se kuartu na ospital.

Na sidadi di Zama, ki ta fika na Kanagawa, un irman ki ten 102 anu, ki txoma Yuki Takeuchi, ta mora na un lugar ki ta kuidadu di algen di idadi. Antis di Komemorason, maridu di se fidju-fémia i se fidju-fémia manda-l pon ku vinhu di Komemorason déntu di un kuza pikinoti. Nton, el konsigi sisti Komemorason djuntu ku se fidju-fémia i maridu di se fidju-fémia pa tilifóni.

Irmon Mimura, ki é maridu di se fidju-fémia, fla: “Nha sógra batiza na 1954 i nunka el ka falta un Komemorason. Nbóra kel Komemorason li foi diferenti di tudu kes otu, el fika txeu kontenti pamodi el konsigi sisti es anu tanbê.”

Nu ten sertéza ma Jeová odja sforsu ki kes irmon duenti li faze pa sisti Komemorason ku ajuda di ansions di ses kongregason. — Hebreus 6:10.