28 DI OTUBRU DI 2022
NOTÍSIAS DI MUNDU INTERU
Nunbru di Tistimunhas di Jeová ki sta prézu na Rúsia i na Krimeia dja pasa 100
Ti dia 26 di otubru di 2022, 106 irmon i 4 irman na Rúsia i na Krimeia dja podu prézu ô sta ta spéra julgamentu, pamodi ses adorason pa Jeová. Irmon Dmitriy Dolzhikov, ki ten 44 anu, é kel sérvu di Jeová nunbru 100 ki dja podu prézu. Dmitriy podu prézu na dia 8 di setenbru di 2022. El akuzadu di partisipa na atividadis di un organizason prigozu, pamodi el sisti runions i el pâpia ku otus algen sobri se fé. Désdi anu 2017, uns 350 Tistimunha di Jeová dja podu prézu pamodi ses trabadju di pregason proibidu.
Pulísia prende Dmitriy dipôs ki es rabista se apartamentu, ki ta fika na zóna di Chelyabinsk. Dôs dia dipôs di kel-li, el mandadu pa un skuadra na zóna di Novosibirsk, ki ta fika uns 1.500 kilómetru lonji di se kaza.
Gósi, Dmitriy sta prézu na un séla djuntu ku más 12 algen. Se mudjer, Marina, ka ten autorizason pa vizita-l, má es ta skrebe kunpanheru karta.
Marina fla: “Kantu es pô-l prézu, N ka ta konsigiba durmi dretu i N ta kordaba txeu bês di noti. Alguns irmon di nos kongregason konvida-m pa N ba fika ku es, i kel-li djuda-m txeu.”
Marina fla ma Dmitriy sta kalmu i puzitivu. El fla: “Jeová sta ta kuida dretu di el.”
Marina ku Dmitriy Dolzhikov
Govérnu di Rúsia uza ses leis pa akuza nos irmons di faze atividadis prigozu. Anna Safronova, ki ten 57 anu di idadi, fazedu mésmu akuzason i es da-l 6 anu di kadia. Ti gósi, el é kel irman ki dadu más anu di kadia.
Kuzas ki kontise ku Dmitriy é más un próva di pirsigison di Rúsia kóntra Tistimunhas di Jeová. Enbóra alguns organizason internasional dja kondena pirsigison ki Rúsia sta faze kóntra Tistimunhas di Jeová, dja es ten 5 anu ta pirsigi-nu. Kantu kel Tribunal más altu di Rúsia disidi kóntra Tistimunhas di Jeová na anu 2017, autoridadis di Rúsia fla ma es ka ta meteba na ses atividadi di adorason. Má é ka kel-la kontise. Ti gósi, es abri 308 kazu na tribunal kóntra uns 700 Tistimunha di Jeová. Tanbê, dja es rabista 1.851 kaza di Tistimunhas di Jeová.
Nu sta ta ora pa Dmitriy i pa tudu kes otu irmon ku irmans ki sta ta pirsigidu pamodi ses fé. Nu sabe ma Jeová ta da-s kel forsa ki es ta meste pa es kontinua ta aguenta firmi. — Mateus 24:13.