Na dia 25 di abril di 2022, lansadu un atualizason di Publikason pa djuda Tistimunhas di Jeová faze piskiza na aplikativu JW Library. Gósi ta da pa djobe un lista di referénsia más txeu ku splikason di testus di Bíblia.

Désdi ki publikason Faze piskiza lansadu na 2013, el ten splikason di testus di Bíblia ku referénsia di kes publikason más novu.

Na kes últimu anu, txeu di kes publikason más antigu podu na JW Library. Gósi maioria di kes publikason ki sta na BIBLIOTÉKA NA INTERNET di Tori di Vijia (WOL), tanbê sta na JW Library. Kel atualizason na publikason Faze piskiza ten kes referénsia di kes publikason más antigu, sima Estudo Perspicaz das Escrituras. Publikason Faze piskiza na JW Library ten testu di kada referénsia. Asi bu pode abri kes referénsia sikrê bu ka tene internet.

Kel atualizason li ten tanbê kes referénsia di kes lison di livru Vive filís pa tudu ténpu!. Un irman ki txoma Kari fla: “N ta fika nervoza óras ki N ta da tistimunhu pa tilifóni, má N sabe ma kes algen meste konsolu própi. Alvês N ta lenbra di kes testu di Bíblia, má N meste ajuda pa N mostra-s di un manera sinplis i interesanti asi pa N pode kontinua kel konbérsu. Pode faze piskiza di un testu di Bíblia i atxa kes referénsia na publikason Faze piskiza lógu, sima kes lison di Vive filís pa tudu ténpu!, ta djuda-m ten más kunfiansa i alegria na pregason.”

Manera di faze publikason Faze piskiza fika más sinplis asi pa el pode sta na mutu más língua. Un irmon ki txoma Ivu, ki ta sta na Betel di Xili, fla: “Kel-li é primeru bês ki publikason Faze Piskiza fazedu na língua mapudungun. Nunka N ka trabadjaba ku kel tipu di publikason li. Má el fazedu di un manera sinplis. Irmons fika dimiradu di ten kel publikason li na nos língua. Es ka ta imajinaba ma el ta fazedu na un língua ki ten poku algen ki ta papia-l. I es fika kontenti pamodi é un bon feraménta pa studu pesoal, pa pripara komentárius i diskursus.”

• Abri na Bíblia, bai na kel versíklu ki bu krê piskiza.

• Klika na nunbru di kel versíklu. Dipôs klika na kel boton di publikason Faze piskiza. Si kel boton di publikason Faze piskiza ka parse, kel-li krê fla ma ka ten ninhun referénsia na el sobri kel versíklu.

Kes primeru referénsia ki ta parse na publikason Faze piskiza é kes más novu. Si bu krê odja un referénsia más antigu, ba ta dixi na kel lista di referénsia ki ta parse na ladu direita di ekran. Na kes versíklu ki nu tevi un ntendimentu novu, kes referénsia más novu ta mostra kel ntendimentu atualizadu.