Tistimunhas di Jeová na mundu interu staba txeu kontenti, pamodi na dia 1 di setenbru di 2022 es staba ta torna bai kumesa ta prega di kaza en kaza. Tistimunhas di Jeová é konxedu pa kel trabadju li. Un kanpanha spesial pa oferese studu di Bíblia na mês di setenbru pô-s ta fika más kontenti inda. Pa alguns irmon ku irmans, kel manera di prega li é un kuza ki dja es konxeba i ki es gosta txeu. Má pa otus kel-la éra primeru bês ki es staba ta bai di kaza en kaza pa leba mensaji di Bíblia pa ses vizinhu. Nu ben odja alguns spiriénsia ki irmons tevi na alguns párti di mundu. Kes spiriénsia li ta mostra modi ki anu di sirvisu di 2023 kumesa sábi.

Na dia 2 di setenbru di 2022, Nicole ku Tina, dôs irman di Petershagen na Rhine-Westphalia North, staba ta prega na un prédiu má es ka konsigi atxa ningen na kaza. Kantu es staba ta bai ses kaminhu, es obi un mudjer ta txoma-s. Kel mudjer fla-s ma el ka konsigi abri-s pórta kantu es konku na se apartamentu. Nton el pidi-s pa es volta pa es pâpia ku el sobri Bíblia. Kantu ki kes irman entra na se apartamentu, es odja un Traduson di Mundu Novu riba se méza. Kel mudjer fla ma dja ten três anu ki el dadu kel Bíblia, kantu ki el ta moraba na Itália. Má el fla ma dipôs ki el muda pa Alimanha, duránti es ténpu di koronavírus, el ka konsigi pâpia más ku Tistimunhas di Jeová. Nton es toma se nunbru di tilifóni i es konvida-l pa runion. Dôs dia dipôs, kel mudjer ku se dôs fidju bai sisti runion. I gósi es sta ta studa Bíblia ku Tistimunhas di Jeová.

Manuel ku Karol Gastelum, é pioneru spesial i es ta sirbi na un tiritóriu ki ta papiadu un língua ki txoma mam. Un dia es pâpia ku un mudjer sinpátika ki konvida-s pa es entra se kaza. Kel mudjer ka sabia ma Deus tinha un nómi, pur isu es kumesa ta pâpia ku el na lison 4 di livru Vive filís pa tudu ténpu! ku téma “Ken ki é Deus?”. Kantu es lé Isaías 42:8, kel mudjer fika spantadu di odja nómi di Deus, Jeová, na se Bíblia.

Kel mudjer kumesa ta txora i el fla ma el da kónta ma sô ten un Bíblia ka ta txiga. Má el meste prendeba kuzê ki Bíblia ta fla, asi pa el pode obiba ku Deus. Dipôs ki es tirmina kel lison kel mudjer fika kontenti ku kuzê ki el prende. I el fla ma el ta bai kontaba se maridu kuzê ki el prende. Manuel ku Karol konbina pa es volta i kontinua ta studa ku el.

Timenti kazal Nukamori staba na pregason na sidadi di Yokohama, es pâpia ku un mudjer pa interfóni. Dipôs es fla-l ses nómi, i ma es éra Tistimunha di Jeová. Kel mudjer fla pa es spéra un bokadinhu na pórta. Dipôs di un ténpu, kel mudjer abri pórta i el fla: “N staba ta spéra pa Tistimunhas di Jeová ben vizita-m.”

Kel mudjer fla ma el kumesa ta studa Bíblia ku Tistimunhas di Jeová na sidadi di Nagasaki. El fla ma el muda pa sidadi di Yokohama duránti es ténpu di koronavírus i ma el kontinua ta studa Bíblia pa Zoom. Na komésu di kel simana, kel algen ki ta fazeba el studu fla-l: “Ta ben ten un kanpanha na setenbru. Un Tistimunha di Jeová di sertéza ta vizita-u. Pidi kel algen pa faze-u studu na bu kaza.” Kel mudjer fika kontenti i dimiradu pamodi kel-li kontise faxi. El fla ma el krê sistiba runion i el marka un dia pa el kumesa ta studa Bíblia.

Dipôs ki un kazal oferese un mudjer un studu di Bíblia, el fla ma uns anu atras el ta studaba Bíblia ku Tistimunhas di Jeová i ti ma el ta sistiba runion. Dja tinha txeu ténpu ki el ka odjaba Tistimunhas di Jeová i el tinha vergónha di bai djobe-s, dja ki el ka sta viveba di akordu ku prinsípius di Bíblia. Dipôs ki el fla kel-li, el kumesa ta txora. Kel kazal le-l Salmo 10:17 i es splika-l ma Jeová ka skese di el. Es ilojia-l pamodi el mostra ma el krê vive di manera ki ta agrada Jeová. El fla ma el krê studa Bíblia i ma se fidju di 16 anu tanbê kria prende más sobri Bíblia.

Na kel otu dia, kantu kel kazal bai na ses kaza, kel mudjer ku se fidju staba ta spera-s. Dipôs di studa lison 1 di bruxura Vive filís pa tudu ténpu!, kel kazal konvida-s pa runion na fin di simana. Es bai pa runion i es kontinua ta studa i ta sisti runion.

Na kel primeru dia ki Ramon kumesa ta bai pregason di kaza en kaza otu bês, el ora ta pidi pa el atxa un algen pa el pâpia ku el. Kantu el konku na kel primeru pórta, un mudjer abri pórta un kuzinha sô pa el odja é kenha. Ramon kunprimenta-l i el fla-l el é kenha. I antis di el kumesa ta da-l tistimunhu, kel mudjer fla: “Bu ka sabe modi ki N tinha gana pa kel dia li txiga. N staba ta ora ta pidi pa nhos konku na nha pórta.”

Kel mudjer fla ma dja ten alguns anu ki Tistimunhas di Jeová pâpia ku el i ti ma el sisti un runion. Má dipôs ki el muda el ka konsigi pâpia ku Tistimunhas di Jeová más. Ramon splika-l ma pamodi koronavírus nu para pa algun ténpu di faze pregason di kaza en kaza. Ramon le-l Salmo 37:29 i dipôs el oferese-l un studu di Bíblia. Kel mudjer fika kontenti i el seta studa Bíblia. I Ramon ranja un irman pa bai studa ku el.

Dipôs di kel spiriénsia, Ramon fla: “N sabe ma Jeová i se anjus sta leba-nu na kes ki krê obi-l.”

Timenti irman Katelyn Thompson staba frenti di un kaza na Kentucky, el repara ma na kaxa di koreiu tinha alguns testu di Bíblia skrebedu na el i tanbê ma na frenti di jardin tinha un plaka ki ta flaba “Jizus ta ama-u.” Kantu Katelyn konku na pórta, un mudjer abri pórta. Katelyn fla-l el é kenha i el fla-l ma pamodi koronavírus, Tistimunhas di Jeová ka staba ta vizita pesoas na ses kaza. Tanbê el fla-l ma duránti es ténpu di koronavírus Tistimunhas di Jeová skrebe kartas i txoma pesoas pa konsola-s i nkoraja-s. Katelyn pergunta-l modi ki el ku se família staba. Kel mudjer fla-l ma el perde se pai duránti es ténpu di koronavírus. El fla: “N resebe un karta di nhos, i N xinti sima ki Deus staba ta daba mi kel ki N mesteba, déntu di óra!” Katelyn fla ma el fika tristi ku kuzê ki el pasa pa el. Dipôs el mostra-l lison 2 di bruxura Vive filís pa tudu ténpu!. Es lé kes testu di Bíblia ki sta na kel lison, má es pâpia más sobri kel speransa di resureison ki ta ben kontise na futuru. El kumesa ta txora i el fla ma kel dia faze un anu ki se pai móre. Kel mudjer da Katelyn se nunbru di tilifóni i el konkorda pa Katelyn vizita-l otu bês. Más tardi, Katelyn resebe un mensájen di kel mudjer ta fla: “Obrigadu! Éra kel-li própi ki N staba ta meste oji!”

Gósi ki dja nu torna kumesa pregason di kaza en kaza, nu ka ten dúvida ma Jeová sta ta abensua-nu i tanbê ma el sta ta abênsua kanpanha pa kumesa studus di Bíblia. Nu sta ku gana di odja kes bons rezultadu! — João 4:35.