Formatura di turma nunbru 148 di Skóla di Jiliádi di Tori di Vijia fazedu sima kes otu, má ku un diferénsa: ningen ka sisti-l na kel Salon. Irmons odja prugrama dirétu através di internet. Duránti es ténpu ki es duénsa dja spadja na mundu interu, formatura di Jiliádi foi un bon izénplu di modi ki organizason di Jeová ta konsigi kontinua ta trabadja di akordu ku situason.

Formatura fazedu na dia 14 di marsu di 2020, na Séntru di Skólas di Bíblia di Tistimunhas di Jeová na Patterson, Nova York. Prizidenti di prugrama éra irmon Stephen Lett, di Grupu Enkaregadu di Óbra. Kes irmon ki kursa skóla éra 55. a

Na kes simana antis di formatura, dadu txeu notísia na mundu interu ta fla ma koronavírus staba ta spadja. Sima avizadu na párti Notísias na jw.org, sédi mundial di Tistimunhas di Jeová sta atentu na es situason i es sta ta da orientasons pa tudu kongregason di akordu ku orientason di autoridadis.

Un di kes orientason é pa ivita djunta txeu algen sô na un lugar. Pamodi kel-li i otus razon, Grupu Enkaregadu di Óbra disidi ma es ka ta konvidaba ningen ki ka ta sta na Betel pa ba sisti prugrama. Tanbê, ka ta tinha ningen ta sisti na kel Salon. Família di Betel i kes studanti di Jiliádi da un bon izénplu na sigi kes orientason. — João 13:34, 35.

Má simé, kes konvidadu di studantis di Jiliádi konsigi sisti prugrama dirétu através di internet. Di kel manera li, más di 10 mil irmon ku irmans di mundu interu, i tanbê amigus i famílias di kes studanti sisti prugrama.

Grupu Enkaregadu di Óbra krê pa runions sima kel-li, prinsipalmenti kes runion di meiu di simana, kontinua ta ser un párti fíksu di nos adorason sikrê ku koronavírus. Pur isu, Grupu Enkaregadu di Óbra da orientasons klaru pa filial di mundu interu modi ki es ta faze runions di akordu ku ses situason. Na alguns kazu, kel-li krê fla ma irmons ten ki djunta na grupus pikinoti ô “djunta” pa faze runion através di internet. Nu ten sertéza ma nos irmons na mundu interu ta kontinua ta resebe orientason ô nkorajamentu ki organizason di Jeová ta kontinua ta da.

Kel-li ta mostra klaru ma nada ka ta tadja puder di Jeová di djuda se organizason vense kalker barera. — Salmo 18:29.