3 DI MARSU DI 2020
NOTÍSIAS DI MUNDU INTERU

Koronavírus: Últimus notísia i kuzas ki dja fazedu

TOKA

Sédi mundial di Tistimunhas di Jeová sta atentu ku es novu vírus (konxedu pa COVID-19) pa sabe na undi ki é el sta ta spadja. Tanbê es sta ta sigi orientason di autoridadis, asi pa djuda-nu sabe kuzê ki nu pode faze. Nu sabe ma Bíblia dja flaba ma na ténpu di fin ta ben tinha duénsas ki ta spadja. (Lucas 21:11) Óras ki kel-li ta kontise é inportanti nu toma medidas pa nu proteje nos kabésa i otus algen. — Provérbios 22:3.

Alguns sta ta pergunta modi ki nos irmons ku irmans sta na kes lugar ki es duénsa dja spadja. COVID-19 dja afeta txeu filial i kongregasons na Koreia di Sul, na Itália, na Japon i na otus país. Na alguns kazu, filial tevi ki kansela vizitas ki ta fazedu na kes Betel. Na otus, govérnus proíbi runions ku txeu algen, pur isu filial di kes lugar tevi ki kansela asenbleias. Tanbê, na alguns lugar kongregasons tevi ki muda ses manera di faze pregason i di sisti runions. Má sikrê ku kes prubléma li, nos irmons sta kontinua ta lé Bíblia, ta studa i ta da kunpanheru forsa. — Judas 20, 21.

Na kes situason li, nos irmons sigi alguns prinsípiu ki djuda-s. Kes prinsípiu li tanbê pode djuda-u abo ku bu família si parse algun tipu di duénsa ki ta spadja na undi bu ta vive.

Ka bu dizorienta. É verdadi ki nu debe toma kuidadu óras ki un duénsa ta spadja i nu debe faze kel ki nu pode pa nu ka panha kel duénsa. Má nu ka debe toma disizons pamodi medu. — Provérbios 14:15; Isaías 30:15.
Sigi orientasons di govérnu. Autoridadis di undi bu ta vive txeu bês ta disidi kria régras pa proteje pesoas. Nu debe sta informadu i sigi kuzê ki govérnu ta fla. — Romanos 13:1.
Faze linpéza. É inportanti laba mô sénpri ku agu i sabon ô dizinfeta-l ku álkuol. Tanbê nu debe sta sénpri ta linpa kes lugar ki nu ta sta tudu óra ta poi mô, na nos kaza i na nos Salon di Reinu. Alén di kel-li, alguns dotor ta fla ma nu debe ivita da mozada na kes situason li, pamodi kel-la pode spadja kel duénsa. Sobri koronavírus, Organização Mundial da Saúde dja da más informason pa pesoas.
Mostra amor pa otus. Nos tudu nu sabe ma é inportanti nu sisti runion i bai pregason, má si nu sta duenti é midjór nu fika na kaza pa ivita pasa duénsa pa otus algen. Asi nu ta mostra amor i nu ta proteje nos irmons i kes algen ki é ka Tistimunha Jeová. — Mateus 22:39.
Sigi kes mudansa ki fazedu pa poku ténpu na prugrama di kongregason. Na kes lugar undi ki duénsa dja spadja, filial ki ta kuida di kel país pode atxa ma es debe kansela pa un ténpu runions, asenbleias i otus runion spesial. Kel-li kontise na kes lugar ki koronavírus spadja más txeu, sima na Itália, Japon i Koreia di Sul. Di akordu ku situason di kada lugar ansions pode djuda irmons ten runions gravadu, pa es odja na ses kaza. Talvês, publikadoris pode partisipa na pregason através di tilifóni, manda mensaji, e-mails ô kartas.