Na junhu di 2020, txobe txeu, riu intxi dimás na Rodna, ki é un zóna ki ta fika na Transilvánia, na Ruménia, i la fika xeiu di agu. Pur isu, kaza di 6 irmons fika tudu stragadu. Na dia 27 di junhu di 2020, kel enkaregadu di grupu di kongregason na Rodna, djuntu ku ansions di la, organiza di manera ki 25 irmon ku irmans di três kongregason, ki ta fika pértu, konsigi da kel ajuda ki staba ta mestedu. a Prizidenti di kanbra di Rodna odja kel-li i el ilôjia irmons na tilivizon i pa internet.

Rodna ta fika na un lugar ki ten rótxas i txeu riu. Pamodi kes riu intxi dimás, kes strada na kel zóna fika xeiu di lama i lixu. Kaza di un di nos irman ta fikaba na un lugar ki prizidenti di kanbra i se ekipa staba ta tra kel lama i kes lixu, má ka staba fásil pa es. Kantu nos irmons txiga, es djuda na linpa kel lugar asi pa es tra lixu i lama ki staba na kaminhu pa kaza di nos irman. Pamodi kel-li, kel trabadju ki nos irmons faze, kaba pa djuda kes autoridadi tanbê.

Más tardi, kel prizidenti di kanbra ilôjia irmons na un entrivista ki el da na un kanal di tilivizon di la. El fla: “N ta gostaba di pâpia sobri un bon izénplu ki dadu i ki mexe txeu ku mi. . . Na kel primeru dia, nu uza un kamion di lixu i un katrapila má nu ka konsigi tirmina kel trabadju. Kel txuba kaba ku kel lugar. Na kel otu dia, nu resebe ajuda. . . di más di 30 Tistimunhas di Jeová ki faze kel-li di ses livri vontadi. Na fin di dia, nu konsigi tirmina di linpa kel lugar.” El tirmina ta fla: “Kes algen li djuda-nu torna poi kuzas na órdi la. N ta agradese es tudu!”

Kel prizidenti tanbê poi un mensaji na internet pa nos irmons. El fla: “Pa Jeová abênsua nhos la di Séu ku vida kunpridu, saúdi i txeu kuza sábi!”

Kel spiriénsa li di Ruménia, é otu izénplu ki ta mostra modi ki nos bon konportamentu ta traze glória pa nos Pai na Séu, Jeová. — 1 Pedro 2:12.