Nos irmons i irmans na Venezuela sta kontinua ta pasa pa txeu prubléma, sima falta di dinheru i otus difikuldadi na ses país. Inda es ten ki lida ku duénsa di COVID-19. Má, es ranja maneras diferenti ka sô pa sisti Komemorason má tanbê pa konvida otus algen.

Pur izénplu, duránti kes dôs simana antis di Komemorason, kumesa géra ku tiru na La Victoria, ki ta fika na stadu di Apure, pértu di frontera ku Kulónbia. Tudu kes publikador di kongregason di la tevi ki fuji pa Kulónbia. Nos irmons i irmans di kongregason Araukita, na Kulónbia, konsigi djuda irmons di Venezuela sisti Komemorason.

Un kongregason, na stadu di Falcón, ta fika na un lugar ki é difísil konsigi ten tilifóni i internet. Nton, kel kongregason di 70 publikador uza kes rádiu pikinoti, ki ta da pa pega na mô, pa obi diskursu di Komemorason.

Un irman fla: “Nbóra nu ka ta konsigi odja kunpanheru ô da abrasu, nu ta obi vós di nos irmons. Nu ta xinti sima si nu sta tudu djuntu.”

Uns dia antis di Komemorason, kongregasons faze un sforsu spesial pa konvida kes algen ki ta mora na lugaris lonji na país pa obi prugrama. Pesoas konsigi obi diskursu di Komemorason di maneras diferenti. Mandadu más di 3 mil konviti. Kel sforsu li da bons rezultadu. Na un sidadi di Araya, ki ta fika pértu di mar, más di 100 algen obi diskursu di Komemorason pa tilifóni.

Betel di Venezuela tanbê ranja manera pa Komemorason dadu na 82 kanal di rádiu i na 9 kanal di tilivizon. Peloménus 8 mil algen sisti Komemorason di kes manera li. Kel nunbru li ta inklui irmons i kes algen ki konvidadu pa sisti Komemorason. Kel prugrama dadu na alguns língua di la, sima guaibo, pemon, piaroa, pumé, Warao, Wayuunaiki i Yekuana.

Na Guasipati, ki ta fika na stadu di Bolívar, diskursu di Komemorason staba markadu pa kumesa 6 i meia di tardi na rádiu di la. Má infilismenti, na kel lugar txeu bês gentis ta fika sen lus duránti un ténpu. Kel-li krê fla ma alguns algen ka ta konsigiba obi diskursu di Komemorason interu. Má, pamodi un prubléma ki kontise na kel rádiu di la, diskursu di Komemorason ripiti más di 10 bês na kel noti. Pamodi kel-li, kes algen di la konsigi obi diskursu di Komemorason interu na óra diferenti. Di akordu ku kónta ki fazedu, más di 600 algen konsigi obi diskursu na kel rádiu li. Un irmon fla si: “Jeová ka kreba pa ningen perde kel diskursu spesial li!”

Nbóra nos irmons sta ta pasa pa ‘txeu tipu di provason’, simé es ‘ta xinti txeu alegria’ pamodi es odja ma Jeová abênsua ses sforsu pa faze Komemorason i pa konvida otus algen. — 1 Pedro 1:6, 7.