Kel dukumentu li, sobri privasidadi di informasons pesoal ta splika pamodi i modi ki Tistimunhas di Jeová ta guarda i uza informasons pesoal di publikadoris, i el ta mostra kes direitu ki publikadoris ten sobri ses informason pesoal. Óras ki es dukumentu ta uza kes palavra “bo”, “bu” ô “bus”, el sta ta pâpia di kes algen ki é publikador a ô ki é batizadu na kongregason di Tistimunhas di Jeová i ki ses informason pesoal sta ta ser uzadu pa Tistimunhas di Jeová pa es pode kuida i organiza ses relijion i tanbê kes atividadi relijiozu di Tistimunhas di Jeová.

Tistimunhas di Jeová é un organizason relijiozu ki sta na mundu interu. Na kel dukumentu li, kes palavra “Organizason Relijiozu”, “nos” ô “nu” krê fla organizason relijiozu di Tistimunhas di Jeová na mundu interu, ô krê fla un ô más di kes entidadi ki Tistimunhas di Jeová ta uza. Kes entidadi li ta inklui kongregason i skritóriu di filial di un lugar, i otus entidadi ki Tistimunhas di Jeová ta uza. Ten un ô más di kes entidadi li ki ta kontrola bus informason pesoal. Kel-li ta dipende di modi ki bu sta ligadu ku nos. L’Association cultuelle Les Témoins de Jéhovah de France ta kontrola kes informason pesoal di publikadoris na kes kongregason di Fransa.

Di akordu ku livru Organizados para Fazer a Vontade de Jeová, nu ta guarda bus informason pesoal ki nu toma diretamenti na bo, di otus fonti disponível pa públiku ô di otus algen óras ki bu bira publikador, asi pa bu pode partisipa na kes atividadi ki sta ligadu ku bu adorason i tanbê pa bu pode resebe ajuda spritual. — 1 Pedru 5:2.

Si bu ten algun pergunta sobri manera ki bus informason pesoal ta uzadu ô si bu krê pâpia ku kel algen ki é enkaregadu di proteson di informasons, favor manda un email, pa:

DataProtectionOfficer.fr@jw.org.

Dibaxu, bu ta atxa más informason sobri modi ki ta uzadu bus informason pesoal.

Bus informason pesoal ki nu ta guarda

É bo ki ta da, di livri vontadi, maioria di bus informason pesoal ki nu ta guarda i uza ku obijetivu di kuida i organiza nos relijion i atividadis relijiozu di Tistimunhas di Jeová. Pamodi kel-li, bu ta ben odja ma kes informason pesoal ki nu ta guarda é sô kes ki nu meste própi. Kel-li ta inklui:

• Informasons prinsipal, sima bu nómi, data di bu nasimentu, i si bo é ómi ô mudjer.

• Informasons di kontatu, sima bu inderésu, bu e-mail, nunbru di tilifóni i kontatu di kes algen ki nu ta pâpia ku es na kazu di un imerjénsia.

• Informasons spritual, sima data di bu batismu, si bo é “skodjedu ku spritu santu” ô “otus ovelha”, diziginason ô responsabilidadi ki bu ten na kongregason ô na nos Organizason Relijiozu, trabadju di pregason ki bu faze, priviléjius ki bu ten i otus data ki sta ligadu ku kel-li, i tanbê otus informason sima kes-li ki sta ligadu ku bu situason spritual.

Kes bus informason pesoal ki nu ta guarda pode inklui otus tipu di informason pesoal spesial (informasons di tipu spesial). Kes tipu di informason spesial ta inklui bu rasa, bus krénsa relijiozu i otus kuza.

Obijetivu i bazi legal pa nu uza bus informason pesoal

Nos régra é guarda sô kes informason pesoal ki nu meste pa nos obijetivus i nu ta uza-s di manera legal i ku bazi na kes lei ki ta aplika.

Óras ki bu bira un publikador, nu ta guarda i uza bus informason pesoal di manera legal i di akordu ku nos interesi di kuida i organiza relijion di Tistimunhas di Jeová, asi pa bu pode partisipa na kes atividadi ki sta ligadu ku bu adorason i tanbê pa bu pode resebe ajuda spritual. Óras ki nu ta guarda i uza informasons pesoal ki ta faze párti di kes informason di tipu spesial, sima bus krénsa relijiozu, nu ta uza kes régra di suguransa ki meste pa guarda i uza kes informason pesoal i nu ka ta da otus algen es sen bu aprovason, si es ka ta faze párti di nos Organizason Relijiozu. Antis di nu guarda i uza bus informason pesoal pa nos interesi, nu ta analiza modi ki kel-la ta afeta bus direitu.

Tanbê, nu pode uza bus informason pesoal pa kunpri lei. Na kazu di imerjénsia, nu pode uza-s ku midjór intenson pa djuda-u abo ô otu algen.

Normalmenti nu ka ta guarda i uza informasons pesoal sô pamodi nu dadu autorizason, dja ki ten leis ki ta permiti-nu faze kel-la. Má si bu da-nu un autorizason pa uza bus informason pesoal, nu ta uza bus informason ku bazi na kel autorizason. Favor, lenbra ma kes informason pesoal di un menór di idadi ta uzadu ku autorizason di mai ô di pai, ô di otu algen ki ten direitu legal di toma kónta di el.

Kel tabéla dibaxu ta mostra di ki maneras diferenti nu ta uza bus informason pesoal i kal ki é bazi pa nu faze kel-la. Favor, si bu meste di más informason bu pode uza kel kontatu ki sta di riba pa pâpia ku kel algen ki é enkaregadu di proteson di informasons.

Ténpu ki nu ta guarda kes informason

Nu ta guarda informasons pesoal sô pa ténpu ki meste di akordu ku obijetivu ki sta na párti “Obijetivu i bazi legal pa nu uza bus informason pesoal”, ki sta li di riba.

Pa nu sabe pa kantu ténpu ki nu meste guarda kes informason pesoal, nu ta analiza kes lei ki ta aplika na kel asuntu li i kuantidadi i tipu di informason ki mestedu i kal ki é grau di sensibilidadi di kel informason. Tanbê nu ta leba en kónta prublémas ki bu pode ben ten si bus informason pesoal uzadu ô dadu pa otu algen sen autorizason. Alén di kel-li, nu ta analiza kal ki é obijetivu di nu guarda i uza bus informason pesoal, i si nu ta konsigi faze kel-li di un otu manera.

Ténpu ki nu ta guarda bus informason pesoal pode muda konfórmi país ô konfórmi kel autoridadi ki ta kontrola kes informason i el ta disididu di akordu ku lei i régras di kel lugar. Tanbê bus informason pesoal pode guardadu pa más ténpu si lei ta iziji ô si nu meste faze kel-li pa nu pode konfirma, uza ô difende nos direitus legal.

Na alguns kazu, nu pode tra bu nómi di bus informason pesoal (asi pa ningen ka sabe má es é di bo) ku obijetivu di es uzadu pa faze piskizas ô rilatórius. Na kel kazu li, nu pode uza kes informason sen limiti di ténpu i sen aviza-u.

Favor, si bu ta gostaba di sabe más sobri kantu ténpu ki nu ta guarda bus informason pesoal, uza kel kontatu ki sta di riba pa pâpia ku kel algen ki é enkaregadu di proteson di informasons.

Muda kes informason pesoal di un lugar pa kel otu

Tistimunhas di Jeová ta trabadja na mundu interu. Pamodi kel-li nu ten ki djunta alguns trabadju pa es fazedu sô na un lugar, sima kes trabadju ki ten aver ku konputador ki nu ta faze pa alguns entidadi. Alguns informason ta fika disponível pa kes diferenti entidadi ki Tistimunhas di Jeová ta uza óras ki mestedu, di akordu ku kes obijetivu ki sta na es dukumentu li i sima na livru Organizados Para Fazer a Vontade de Deus. Pur izénplu, óras ki bu disidi muda pa un otu kongregason, bus informason pesoal (informasons prinsipal, informasons di kontatu i informasons spritual) ta mandadu pa bu novu kongregason. Na alguns kazu, kel (ô kes) Filial di Tistimunhas di Jeová di kel (ô kes) lugar pode guarda i uza bus informason pesoal pa bu konsigi kontinua ta partisipa di manera konplétu na kes atividadi di bu novu kongregason i tanbê pa nu konsigi mante nos rejistu di kongregason atualizadu. Kel-li pode inklui manda bus informason pa kes país ki ka ta faze párti di União Europeia (UE) ô Área Económica Europeia (AEE) i pa otus país ki ka ten leis di proteson di informasons pesoal.

Nu ta toma txeu kuidadu na sigi leis i na faze kuzas ki ta proteje bus informason, asi pa garanti ma es ta sta suguru i ma es ka ta mudadu óras ki es mandadu pa otu lugar déntu di nos Organizason Relijiozu. Óras ki nu ta guarda bus informason pesoal na UE/AEE, nu ta manda-s pa fóra di UE/AEE sô

• pa kes país ki ten un bon nível di proteson pa bus informason pesoal; i/ô

• ku bazi na un akordu ki ta kunpri kes lei ki UE ta iziji óras ki ta mandadu informasons pesoal pa kes responsável pa guarda i uza informasons fóra di UE/AEE, sima alguns tipu di kontratu ki Kumison di Europa ta aprova; i/ô

• ku bu aprovason.

Suguransa di informasons pesoal

Nu ta proteje kes informason ki nu ta resebe duránti nos atividadi asi pa es ka spadja i pa es fika suguru. É sô alguns algen ki ta konsigi odja kes informason, i ten régras i pasus ki nu ta da pa proteje kes informason asi pa es ka perde, pa es ka uzadu di manera mariadu i pa es ka mandadu pa kes ki ka ten autorizason.

Nu rezolve uza alguns medida di proteson tékiniku i di organizason pa garanti un bon nível di suguransa pa kes risku ki pode ten na guarda i uza informasons i omésmu ténpu nu leba en kónta kes tekinolojia más novu ki ten; kantu ki kusta pa kes medida uzadu; tipu, tamanhu, kontestu, i obijetivu di prosésu; i risku di poi na prigu kes direitu i liberdadi di pesoas. Kes medida li ta inklui kes kuza dibaxu, má pode inklui otus kuza tanbê:

• kontrola kenha ki pode uza, odja ô muda kes informason;

• kumunika i faze kuzas di manera suguru;

• troka ô tra nómi na kes informason pesoal, i enkripta kes informason;

• Nu ta djobe i nu ta konfirma si kes medida di proteson tékiniku i di organizason ta garanti ma nu sta ta guarda i uza kes informason di manera suguru;

Nu ta garanti ma kes algen ki sénpri ô manenti pode odja ô uza kes informason pesoal, ô kalker otu algen ki ta trabadja ku kes informason, ta resebe trenamentu i tanbê ma es ta fladu kal ki é ses direitu i responsabilidadi.

Manda informasons pesoal pa otus algen

Nu pode manda bus informason pesoal pa otus algen na kes situason li:

• si kel-li sta di akordu ku kes obijetivu ki sta na párti “Obijetivu i bazi legal pa nu uza bus informason pesoal”. Kel-li ta inklui manda informasons déntu di nos Organizason Relijiozu;

• si lei ta iziji kel-li;

• si nu ta atxa ma manda kel informason li ta proteje nos direitus, nos propriadadi ô nos suguransa;

• si meste pa kunpri un prosésu judisial, un órdi di tribunal, ô kalker otu obrigason legal, ô si meste pa algun invistigason di govérnu ô di otu autoridadi; ô

• si nu ten bu autorizason.

Kes ki ta resebe bus informason pesoal ta inklui:

• Autoridadis ki ta kontrola

• Tribunal, pulísia, i otus autoridadi di suguransa pa públiku

• Kes ki ta oferese algun sirvisu ô apoiu

Bus direitu legal sobri informasons pesoal

Lei di bu país pode da-u alguns direitu sobri bus informason pesoal ki nu ta guarda. Kel-li pode inklui kes direitu li:

• Direitu di sabe modi ki bus informason pesoal ta uzadu. Bu ten direitu di sabe modi ki nu sta ba uza bus informason pesoal i pa kenha ki nu sta ba manda-s.

• Direitu di odja informasons pesoal. Bu ten direitu di resebe un konfirmason óras ki nu ta guarda i uza bus informason pesoal i bu ten direitu di odja kes informason.

• Direitu di koriji kes informason pesoal ki sta mariadu. Bu ten direitu di koriji kalker informason pesoal ki sta inkonplétu ô ki sta mariadu. Pur izénplu, bu pode muda bus informason di kontatu.

• Direitu di paga informasons pesoal na alguns situason. Kel direitu li konxedu tanbê pa “direitu di skesedu di el”. Kel-li é ka un direitu ki ta dipende sô di bo, ki ta obriga pa tudu bus informason pesoal pagadu. Nu ta analiza kada pididu ku kuidadu, di akordu ku kes lei ki ta aplika.

• Direitu di kansela kel autorizason ki bu da. Si nu ta guarda i uza bus informason pesoal ku bazi na bu autorizason, bu ten direitu di kansela bu autorizason na kalker momentu. Normalmenti nu ka ta guarda i uza informasons pesoal sô pamodi nu dadu autorizason, dja ki ten leis ki ta permiti-nu faze kel-la.

• Direitu di poi limiti na guarda i uza informasons pesoal na alguns situason. Kel direitu li ta aplika si bu ta atxa ma bus informason pesoal sta mariadu, si bu fla ma bu ka krê pa bus informason guardadu i uzadu, si manera ki sta guardadu i uzadu bus informason ka sta di akordu ku lei i si bu ka krê pa bus informason pagadu i bu pidi pa poi limiti na manera ki es ta guardadu i uzadu, ô tanbê si nu ta atxa ma nu ka meste más di kes informason pesoal, má bu meste pa nu guarda-s pa konfirma, uza ô difende algun direitu legal ki bu iziji.

• Direitu di portabilidadi di informasons. Direitu di portabilidadi ta aplika sô si bu da autorizason, ô si bus informason pesoal ten ki uzadu pa faze un kontratu i si prosésu é fazedu di manera automátiku.

• Direitu di ka seta pa nu guarda i uza informasons pesoal na alguns situason. Bu ten direitu di ka seta pa nu guarda i uza bus informason pesoal di akordu ku bu interesi.

Bu pode uza kalker un di bus direitu. Pa bu faze kel-li, bu pode uza kel kontatu ki sta di riba pa bu pâpia ku kel algen ki é enkaregadu di proteson di informasons.

Talvês nu ta meste pidi-u alguns informason pa konfirma kenha ki bo é i pa garanti bu direitu di odja bus informason pesoal (ô di uza kalker un di kes otu direitu ki bu ten). Kel-li é un medida di suguransa ki ta garanti pa bus informason pesoal ka mandadu pa ningen ki ka ten direitu di resebe-s. Tanbê nu pode pâpia ku bo pa pidi-u más informason sobri bu pididu, pa nu pode da-u un respósta más rápidu.

Si bu ta atxa ma Tistimunhas di Jeová faze algun kuza ki ka sta di akordu ku kes lei di proteson di informasons ô ku kalker otu lei, bu pode uza kel kontatu di riba pa pâpia ku kel algen ki é enkaregadu di proteson di informasons. Kel algen ki é enkaregadu di proteson di informasons ta analiza bu pididu i el ta ben pâpia ku bo sobri modi ki kel asuntu ta rezolvedu. Tanbê bu ten direitu di kexa na kes autoridadi responsável pa faze kunpri kes lei di proteson di informasons na país undi bu ta mora, ô na kel lugar ki talvês kontise kel violason di lei, ô pa leba kel asuntu li pa un tribunal ki ten autoridadi pa rezolve-l.

Mudansas na kel dukumentu li

Pode ser ki di ténpu en ténpu, nu pode muda nos manera di trata informasons, pamodi mudansas na nos atividadis relijiozu, na lei ô na tekinolojia ki nu ta uza. Si algun bês nu meste muda kel pájina di “Uzu di informasons pesoal”, nu ta publika kes mudansa na kel pájina li. Asi publikadoris sénpri ta sabe kal ki é alguns informason ki nu ta guarda i modi ki nu ta uza-s. Favor, di ténpu en ténpu djobe si fazedu mudansas na kel pájina li.